ବଇଣ୍ଡା,୨୪।୩(ଡି.ଏନ.ଏ.): ରାଜ୍ୟ ସରକାରଙ୍କ ବସୁଧା ଯୋଜନାରେ ପଞ୍ଚାୟତରେ ପାନୀୟ ଜଳ ପ୍ରକଳ୍ପ ରହିଛି। ହେଲେ ପଞ୍ଚାୟତର ସମସ୍ତ ସାହିକୁ ପାଇପ୍ ପାଣି ମିଳୁନି। ଏପରି ଅସୁବିଧାର ସମ୍ମୁଖୀନ ହେଉଛନ୍ତି ଅନୁଗୋଳ ଜିଲା କିଶୋରନଗର ବ୍ଲକ ନୁନୁକାପଶି ପଞ୍ଚାୟତର ବୈଷ୍ଣବସାହିବାସୀ। ସାହିରେ ନଳକୂଅ କିମ୍ବା କୂଅଟିଏ ନ ଥିବାରୁ ଲୋକେ ପିଇବା ପାଣି ପାଇଁ ଦୈନିକ ଅଧ କିଲୋମିଟର ଦୂର ଏକ ଖୋଲା କୂଅ ଉପରେ ନିର୍ଭର କରୁଛନ୍ତି। ଦୀର୍ଘବର୍ଷ ହେଲା ଏହି ସମସ୍ୟାର ସମାଧାନ ହେଉ ନ ଥିବାରୁ ସାହିରେ ତୀବ୍ର ଅସନ୍ତୋଷ ସୃଷ୍ଟି ହୋଇଛି।
ସାହିବାସୀଙ୍କ କହିବା ଅନୁଯାୟୀ, ଏଠାରେ ୨୦ ପରିବାର ବସବାସ କରୁଥିବାବେଳେ ପାନୀୟ ଜଳର କୌଣସି ବ୍ୟବସ୍ଥା ନାହିଁ। କୂଅ କିମ୍ବା ନଳକୂଅ ସ୍ଥାପନ ହୋଇ ନ ଥିବାରୁ ଅଧ କିଲୋମିଟର ଦୂରରେ ଥିବା ଏକ ଖୋଲାକୂଅରୁ ବର୍ଷ ତମାମ ପାଣି ଆଣିବାକୁ ପଡ଼ୁଛି। ପ୍ରତିବର୍ଷ ଖରା ଦିନେ ଏହି ସମସ୍ୟା ଅଧିକ ଉତ୍କଟ ହେଉଛି। ଉକ୍ତ ଖୋଲା କୂଅ ଶୁଖିଯାଉଥିବାରୁ ପାଣି ସଂଗ୍ରହ ଅଧିକ କଷ୍ଟକର ହୋଇପଡ଼ୁଛି। ସାହିରେ ଏକ ନଳକୂଅ ଖୋଳିବା ପାଇଁ ୨୦୧୯ ମେ ୧୫ ଓ ୨୦୨୦ ମାର୍ଚ୍ଚ ୨୦ରେ ନୁନୁକାପଶି ପଞ୍ଚାୟତ କାର୍ଯ୍ୟାଳୟଠାରୁ ଆରମ୍ଭ କରି ବ୍ଲକ ପ୍ରଶାସନ ପର୍ଯ୍ୟନ୍ତ ଅଭିଯୋଗ କରାଯାଇଥିଲେ ମଧ୍ୟ ସୁଫଳ ମିଳିନାହଁି। ତୁରନ୍ତ ଉକ୍ତ ସାହିରେ ଏକ ନଳକୂଅ ସ୍ଥାପନ ସହ ପାଇପ୍ ମାଧ୍ୟମରେ ପାଣି ଯୋଗାଇ ଦେବାକୁ ଗୌତମ ପ୍ରଧାନ, ଅନାଦି ପ୍ରଧାନ, ଗୋଲେଖ ପ୍ରଧାନ, ବୁଲା ପ୍ରଧାନ, ପ୍ରଭାକର ପ୍ରଧାନ, ପ୍ରମୋଦା ପ୍ରଧାନ, ସୁବର୍ଣ୍ଣ ପ୍ରଧାନ ପ୍ରମୁଖ ଦାବି କରିଛନ୍ତି। ଏ ନେଇ ନୁନୁକାପଶି ସରପଞ୍ଚ ଦୀପ୍ତିମୟୀ ସାହୁ କହିଛନ୍ତି, ସାହିବାସୀଙ୍କ ସମସ୍ୟା ସମ୍ପର୍କରେ ବ୍ଲକ ପ୍ରଶାସନକୁ ଅବଗତ କରାଯିବ।
