ବାରିପଦା ଅଫିସ, ୧୯।୧୨: ଦୋଷୀ ନ ହୋଇ ବି ଅନ୍ଧାର କୋଠରୀ ଭିତରେ ବିତିଯାଇଛି ଦୀର୍ଘ ୧୮ବର୍ଷ ୧୧ମାସ ୧୫ଦିନ। ବାଟ ଭୁଲିଯାଇଥିବା ମଣିଷଟିଏ ପୁନର୍ବାର ସମାଜର ମୁଖ୍ୟସ୍ରୋତରେ ସାମିଲ ହେବାକୁ ଅଣ୍ଟା ଭିଡିଛନ୍ତି। ପରିବାରଠାରୁ ବହୁ ଦୂରରେ ରହି ସ୍ତ୍ରୀ ଓ ସନ୍ତାନକୁ ଝୁରି ଝୁରି ଦିନ ପରେ ଦିନ ବିତିଯାଇଛି। ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶ ପରେ ଆଜୀବନ କାରାଦଣ୍ଡ ଭୋଗୁଥିବା ଜଣେ କୋହ୍ଳ ସମ୍ପ୍ରଦାୟର ହାବିଲ ସିଦ୍ଧୁ(୫୯) ନିର୍ଦ୍ଦୋଷରେ ଖଲାସ ହୋଇ ଗାଁ ଅଭିମୁଖେ ବାହାରିଛନ୍ତି। ଦଣ୍ଡ ଭୋଗିବା ବେଳେ ଜେଲ ମଧ୍ୟରେ କାମ କରି ଉପାର୍ଜିତ ଅର୍ଥକୁ ସାଙ୍ଗରେ ଧରି ଘରକୁ ଫେରୁଛନ୍ତି। କିଛି ବ୍ୟବସାୟ କରି ପରିବାର ମୁହଁରେ ହସ ଫୁଟାଇବା ବୋଲି ସେ ଚେଷ୍ଟା କରିବେ ବୋଲି କହିଛନ୍ତି।
ଅଧ୍ୟୁଷିତ ବଣପାହାଡ ଘେରା ଜିଲାରେ ଅନ୍ଧବିଶ୍ୱାସର ବଶବର୍ତ୍ତୀ ହୋଇ ନୃଶଂସକାଣ୍ଡ ଘଟିଚାଲିଛି। ଏହାର ଠିକ୍ ତଦନ୍ତ ନ ହେବାରୁ ବହୁ ଅପରାଧୀ ନିର୍ଦ୍ଦୋଷରେ ଖଲାସ ହେଉଥିବା ବେଳେ ଅନେକଙ୍କୁ ଅପରାଧରେ ଛନ୍ଦି ଦେଇ ଅପରାଧୀ ସଜାଇ ଦିଆଯାଇଛି। ଦୀର୍ଘ ୧୮ବର୍ଷ ହେଲା ଯଶିପୁର ଥାନା ବଳରାମପୁର ଅଞ୍ଚଳର ହାବିଲ ସିଦ୍ଧୁ ଏକ ଟ୍ରିପଲ ମର୍ଡର ମାମଲାରେ ଆଜୀବନ କାରାଦଣ୍ଡ ବାରିପଦା ମଣ୍ଡଳ କାରାଗାରରେ ଭୋଗୁଥିଲେ। ତାଙ୍କ ପରିବାର ଅତ୍ୟନ୍ତ ଗରିବ ଶ୍ରେଣୀର ହୋଇଥିବାରୁ ବାରିପଦାକୁ ଆସି ମାମଲା ଲଢିବା ସମ୍ଭବ ହୋଇପାରି ନ ଥିଲା। ମାତ୍ର ହାବିଲ ନିଜକୁ ନିର୍ଦ୍ଦୋଷ ପ୍ରମାଣିତ କରିବାକୁ ଯାଇ ଉଚ୍ଚ ନ୍ୟାୟାଳୟର ଆଶ୍ରୟ ନେଇଥିଲେ। ଜିଲା ଓ ଦୌରାଜଜ୍ ଡିସେମ୍ବର ୧୫ ତାରିଖରେ ତାଙ୍କୁ ନିର୍ଦ୍ଦୋଷରେ ଖଲାସ କରିଥିଲେ। ତେବେ ହାବିଲ ଜେଲ୍ରୁ ଖଲାସ ହୋଇଥିବା ଖବର ତାଙ୍କ ସ୍ତ୍ରୀ ଦାରମିଗା, ବିବାହିତ ପୁଅ ଅଗସ୍ତି ଓ ଝିଅ ରାନ୍ଧାଙ୍କ ସହ ନାତୁଣୀ ନାତିମାନେ ଜାଣିପାରି ନାହାନ୍ତି ା ଘରକୁ ଫେରିବା ପାଇଁ ହାତରେ ଅର୍ଥ ନ ଥିବାରୁ ସେ ଶନିବାର ପର୍ଯ୍ୟନ୍ତ ବାରିପଦାରେ ରହି ଶ୍ରମଦାନରେ ଉପାର୍ଜିତ ୯୬ହଜାର ୯୭୮ଟଙ୍କା ପୋଷ୍ଟଅଫିସରୁ ଉଠାଇଛନ୍ତି। ଟଙ୍କା ଉଠାଇବା ପରେ ରବିବାର ନିଜ ଗ୍ରାମକୁ ଫେରିଯିବାର ଖୁସିରେ ସେ ଆତ୍ମହରା ହୋଇପଡିଛନ୍ତି। ପୋଲିସ ମାଡ ଓ ଗ୍ରାମବାସୀଙ୍କ କଟୁ କଥା ବାରମ୍ବାର ତାଙ୍କ ମନକୁ ଆନ୍ଦୋଳିତ କରୁଛି ା ଅନ୍ଧାର ସେଲରେ ଯୌବନ ବିତିଯାଇଥିବା ବେଳେ ବୃଦ୍ଧାବସ୍ଥା ତାଙ୍କୁ ନୂଆ ସକାଳ ସଦୃଶ ମନେ ହେଉଛି ା ଦଣ୍ଡ ଭୋଗିବା ସମୟରେ ପରିବାର ପାଇଁ ୨୦ହଜାର, ଉଚ୍ଚ ନ୍ୟାୟାଳୟ ମାମଲା ପରିଚାଳନା ପାଇଁ ୧୧ହଜାର ଓ ନିଜର ଖର୍ଚ୍ଚ ବାବଦକୁ ୧୦ହଜାର ଟଙ୍କା ସେ ନିଜର ଉପାର୍ଜିତ ଅର୍ଥ ରାଶିରୁ ଖର୍ଚ୍ଚ କରିଛନ୍ତି ା ଆଗାମୀ ଦିନରେ ନିଜ ପରିବାର ସହ ଖୁସିରେ ରହି ଅବଶିଷ୍ଟ ଜୀବନ ବିତାଇବେ ବୋଲି ପ୍ରକାଶ କରିଛନ୍ତି ା
