ନୂଆଦିଲ୍ଲୀ, ୧୧ା୩: ଇନ୍ଫ୍ଲୁଏଞ୍ଜାର ଏଚ୍୩ଏନ୍୨ ଉପପ୍ରଜାତି ଭୂତାଣୁ ସଂକ୍ରମଣରେ ଭାରତରେ ପ୍ରଥମ ମୃତ୍ୟୁ ଘଟିଛି। କର୍ନାଟକ ଓ ହରିୟାଣାରେ ଜଣେ ଲେଖାଏ ଏହି ରୋଗରେ ପ୍ରାଣ ହରାଇଛନ୍ତି। କର୍ନାଟକର ୮୨ ବର୍ଷୀୟ ହିରେ ଗୌଡ଼ା ଏଚ୍୩ଏନ୍୨ ଭୂତାଣୁ ସଂକ୍ରମଣରେ ମାର୍ଚ୍ଚ ୧ରେ ପ୍ରାଣ ହରାଇଥିବା ହାସନ ଜିଲା ସ୍ବାସ୍ଥ୍ୟ ଅଧିକାରୀ କହିଛନ୍ତି। ଗୌଡ଼ା ମଧୁମେହ ଏବଂ ଉଚ୍ଚ ରକ୍ତଚାପରେ ପୀଡ଼ିତ ଥିଲେ। ତାଙ୍କୁ ଫେବୃୟାରୀ ୨୪ରେ ହସ୍ପିଟାଲରେ ଭର୍ତ୍ତି କରାଯାଇଥିଲା। ମାର୍ଚ୍ଚ ୬ରେ ନମୁନା ପରୀକ୍ଷାରୁ ଇନ୍ଫ୍ଲୁଏଞ୍ଜା ସଂକ୍ରମଣ ସ୍ପଷ୍ଟ ହୋଇଥିଲା। ସେହିପରି ହରିୟାଣା ଜିନ୍ଦ୍ ଜିଲାର ଜଣେ ୫୬ ବର୍ଷୀୟ ଫୁସ୍ଫୁସ୍ କ୍ୟାନ୍ସର ରୋଗୀଙ୍କର ଏଚ୍୩ଏନ୍୨ ସଂକ୍ରମଣରେ ଗତ ମାସ ୮ ତାରିଖରେ ମୃତ୍ୟୁ ଘଟିଛି। ସେ ଏହି ଭୂତାଣୁରେ ସଂକ୍ରମିତ ଥିବା ଜାନୁୟାରୀ ୧୭ରେ ଜଣାପଡ଼ିଥିଲା।
କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ସଂକ୍ରମଣ ସ୍ଥିତି ଉପରେ ତୀକ୍ଷ୍ଣ ନଜର ରଖିଛି ଏବଂ ମାସ ଶେଷ ସୁଦ୍ଧା ଏହା ହ୍ରାସ ଘଟିବ ବୋଲି ଆଶା କରିଛି। ମନ୍ତ୍ରଣାଳୟ ତଥ୍ୟ ଅନୁଯାୟୀ, ଗତ ଜାନୁୟାରୀ ୨ରୁ ମାର୍ଚ୍ଚ ମଧ୍ୟରେ ଦେଶରେ ୫,୪୫୧ ଜଣ ଏହି ଇନ୍ଫ୍ଲୁଏଞ୍ଜାରେ ସଂକ୍ରମିତ ଥିବା ରିପୋର୍ଟ ହୋଇଛି। ମାର୍ଚ୍ଚ ୯ ସୁଦ୍ଧା ୩,୦୩୮ ଜଣ ସଂକ୍ରମିତ ଥିବା ଲାବରେଟୋରି ପରୀକ୍ଷାରୁ ସ୍ପଷ୍ଟ ହୋଇଛି। ଛୋଟ ପିଲା ଏବଂ ବହୁବିଧ ରୋଗ ଥିବା ବରିଷ୍ଠ ନାଗରିକ ଇନ୍ଫ୍ଲୁଏଞ୍ଜା ଦ୍ୱାରା ସଂକ୍ରମିତ ହେବାର ଅଧିକ ସମ୍ଭାବନା ରହିଛି।
ଋତୁକାଳୀନ ଇନ୍ଫ୍ଲୁଏଞ୍ଜା ହେଉଛି ଅତ୍ୟଧିକ ଶ୍ୱାସନଳୀ ସଂକ୍ରମଣ। ସାରା ବିଶ୍ୱରେ ନିର୍ଦ୍ଦିଷ୍ଟ ଋତୁରେ ଏହି ଭୂତାଣୁ ସଂକ୍ରମଣ ବୃଦ୍ଧି ପାଇଥାଏ। ଭାରତରେ ପ୍ରତିବର୍ଷ ଦୁଇଥର ଋତୁକାଳୀନ ଇନ୍ଫ୍ଲୁଏଞ୍ଜା ସଂକ୍ରମଣ ଶୀର୍ଷ ଛୁଇଁଥାଏ। ତାହା ହେଲା ଜାନୁୟାରୀରୁ ମାର୍ଚ୍ଚ ଏବଂ ବର୍ଷାଋତୁ ପରବର୍ତ୍ତୀ ସମୟ। ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ଅନୁଯାୟୀ ଇନ୍ଫ୍ଲୁଏଞ୍ଜା ଭୂତାଣୁ ସଂକ୍ରମଣ ଯୋଗୁ ଜ୍ୱର ଓ କାଶ ହୋଇଥାଏ। ସଂକ୍ରମଣ ବଢ଼ିଲେ ଏହା ଗୁରୁତର ନିମୋନିଆ, ଶ୍ୱାସନଳୀ ଅତ୍ୟଧିକ ସଂକ୍ରମିତ ହୋଇ ଚେତାଶୂନ୍ୟ ହେବା ସହ ମୃତ୍ୟୁ ଘଟିପାରେ। ଥଣ୍ଡା ଲାଗିବା, କାଶ, ଜ୍ୱର, ବାନ୍ତି ହେବା, ମୁଣ୍ଡ ବୁଲାଇବା, ଗଳା ଦରଜ ହେବା ଓ ଦେହ ଘୋଳାବିନ୍ଧା ହେବା ଏଚ୍୩ଏନ୍୨ ଭୂତାଣୁ ସଂକ୍ରମଣର ଲକ୍ଷଣ। କେତେକ କ୍ଷେତ୍ରରେ ପତଳା ଝାଡ଼ା, ଶର୍ଦ୍ଦି ହୋଇଥାଏ। ଶ୍ୱାସକ୍ରିୟାରେ କଷ୍ଟ, ଛାତିରେ ଯନ୍ତ୍ରଣା ଅନୁଭବ କରିବା ସହ କ୍ରମାଗତ ଜ୍ୱର ଲାଗିରହିଲେ ଓ ଗଳାରେ ଯନ୍ତ୍ରଣା ହେଲେ ତୁରନ୍ତ ଡାକ୍ତରଙ୍କ ପରାମର୍ଶ ନେବା ଆବଶ୍ୟକ। ସଂକ୍ରମଣ ବୃଦ୍ଧିକୁ ନେଇ ଜନସ୍ବାସ୍ଥ୍ୟଜନିତ ଚ୍ୟାଲେଞ୍ଜ ସୃଷ୍ଟି ହୋଇଥିବାବେଳେ ଏହାକୁ ରୋକିବା ଦିଗରେ ସ୍ବାସ୍ଥ୍ୟ ବିଭାଗ ପକ୍ଷରୁ ପୂରା ଦମ୍ରେ ଉଦ୍ୟମ ଚାଲିଛି। ଇଣ୍ଟିଗ୍ରେଟେଡ୍ ଡିଜିଜ୍ ସର୍ଭିଲାନ୍ସ ପ୍ରୋଗ୍ରାମ୍ (ଆଇଡିଏସ୍ପି) ନେଟ୍ଓ୍ବର୍କ ଜରିଆରେ ସଂକ୍ରମଣ ଉପରେ ପୂରା ନଜର ରଖାଯାଇଥିବା ମନ୍ତ୍ରଣାଳୟ କହିଛି।
