ଟୋକିଓ: ହଜାର ହଜାର ସଂଖ୍ୟାରେ ଦର୍ଶକଙ୍କ ଉପସ୍ଥିତିରେ ଜାପାନରେ ରବିବାର ଏକ ପ୍ରଦର୍ଶନୀ ଜିମ୍ନାଷ୍ଟିକ୍ ମିଟ୍ ଅନୁଷ୍ଠିତ ହୋଇଯାଇଛି। ଏଥିରେ ରୁଷିଆ, ଚାଇନା ଓ ଯୁକ୍ତରାଷ୍ଟ୍ର ଆମେରିକାର ୨୨ଜଣ ଆଥଲେଟ୍ ଅଂଶଗ୍ରହଣ କରିଥିଲେ। ଆୟୋଜକ ଦେଶରୁ ମଧ୍ୟ ୮ଜଣ ଭାଗ ନେଇଥିଲେ। ଆଗକୁ ଟୋକିଓ ଅଲିମ୍ପିକ୍ସ ଦୃଷ୍ଟିରୁ ନିଶ୍ଚିତ ଏହା ଏକ ଭଲ ଖବର। ପ୍ରତିଯୋଗିତା ପୂର୍ବରୁ ଅଣଜାପାନୀ ପ୍ରତିଯୋଗୀମାନଙ୍କୁ ଟୋକିଓସ୍ଥିତ ସେମାନଙ୍କ ହୋଟେଲରେ ୧୪ ଦିନ କ୍ୱାରାଣ୍ଟାଇନରେ ରହିବାକୁ ହୋଇଥିଲା। ଟୋକିଓ ଅଲିମ୍ପିକ୍ସ ଆଉ ୯ ମାସରୁ କମ୍ ସମୟ ରହିଛି। ଏଥିରେ ୨୦୬ ଟିଦେଶରୁ ୧୧,୦୦୦ ଆଥଲେଟ ଭାଗ ନେବେ। ପୁନଶ୍ଚ ଅତିରିକ୍ତ ୪,୪୦୦ରୁ ଅଧିକ ପାରାଅଲିମ୍ପିଆନ୍ ହଜାରରୁ ଅଧିକ ଅଫିସିଆଲ ଜଜ୍, ଭିଆଇପି, ମିଡିଆ, ବ୍ରଡକାଷ୍ଟର ଏବଂ ସ୍ପନସର ମଧ୍ୟରେ ଜାପାନରେ ପ୍ରବେଶ କରିବେ। ଇଭେଣ୍ଟରେ ଯୋଗଦେବା ଲାଗି ପ୍ରାୟ ୧୦ ହଜାର ଅଣଜାପାନୀ ଖେଳପ୍ରେମୀଙ୍କୁ ଅନୁମତି ଦିଆଯିବ ଗେମ୍ସକୁ କେବଳ ଜାପାନୀ ଦର୍ଶକଙ୍କ ମଧ୍ୟରେ ସୀମିତ ରଖାଯିବ ବର୍ତ୍ତମାନ ତାହା ଏକ ପ୍ରଶ୍ନ। ଆସନ୍ତା ବର୍ଷ କରୋନା ଭ୍ୟାକ୍ସିନ ଯଦି ଆସେ ଏବଂ ରାପିଡ୍ ଟେଷ୍ଟିଂ ଉପଲବ୍ଧ ହୁଏ ତା’ ହେଲେ କିଛି ପରିମାଣରେ ସମସ୍ୟାର ସମାଧାନ ହୋଇ ପାରିବ ବୋଲି ଟୋକିଓ ଆୟୋଜକ ଏବଂ ଅନ୍ତର୍ଜାତୀୟ ଅଲିମ୍ପିକ କମିଟି (ଆଇଓସି) ମନେ କରୁଛନ୍ତି। ଜାପାନର ୩ ଥର ଅଲିମ୍ପିକ ସ୍ବର୍ଣ୍ଣ ପଦକ ବିଜେତା କୋହେଇ ଉଚିମୁରା କହିଛନ୍ତି, ରବିବାର ପ୍ରଦର୍ଶନୀ ଇଭେଣ୍ଟ ସଫଳତାର ସହ ଆୟୋଜନ ହୋଇ ପାରିଥିବାରୁ ଅଲିମ୍ପିକ୍ସ ଆୟୋଜନରେ ସମସ୍ୟା ରହିବ ନାହିଁ ବୋଲି ସ୍ପଷ୍ଟ ସୂଚନା ମିଳିଛି। ମାତ୍ର ଦୁର୍ଭାଗ୍ୟର ବିଷୟ ଏହିକି ଯେ, କୋଭିଡ୍ ଯୋଗୁ ଟୋକିଓ ଅଲିମ୍ପିକ୍ସ ଆୟୋଜନ ହୋଇପାରିବ ନାହିଁ ବୋଲି ୮୦% ଜାପାନୀଙ୍କ ମନରେ ଧାରଣା ସୃଷ୍ଟି ହୋଇଛି।
