ଗୁଣପୁର,୨୧ା୪(ସଙ୍କେତ ପାତ୍ର): ଗୁଣପୁର ସବ-ରେଜିଷ୍ଟ୍ରାର କାର୍ଯ୍ୟାଳୟରେ ପିଅନ ଭାବେ କାର୍ଯ୍ୟରତ ଚକ୍ରଗୁଡ଼ା ଗ୍ରାମ ନିବାସୀ ପୀତାମ୍ବର ଶବରଙ୍କର ମଙ୍ଗଳବାର ବ୍ରହ୍ମପୁର ମେଡିକାଲରେ ଚିକିତ୍ସାଧୀନ ଅବସ୍ଥାରେ ଦେହାନ୍ତ ଘଟିଛି। ସେ ବହୁଦିନ ଧରି ଟିବି ରୋଗରେ ପୀଡ଼ିତ ଥିଲେ। କିଛିଦିନ ସୁସ୍ଥ ହେବା ପରେ ପୁଣି ନିଜ କାର୍ଯ୍ୟରେ ଯୋଗ ଦେଇଥିଲେ। କିନ୍ତୁ ହଠାତ୍ ସ୍ବାସ୍ଥ୍ୟ ଅବସ୍ଥା ଗୁରୁତର ହେବାରୁ ତାଙ୍କୁ ବ୍ରହ୍ମପୁର ମେଡିକାଲରେ ଭର୍ତ୍ତି କରାଯାଇଥିଲା। ତେବେ ଚିକିତ୍ସାଧୀନ ସମୟରେ ଆଜି ସକାଳେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ଦିବଙ୍ଗତ ପୀତାମ୍ବର ଜଣେ ସରଳ, ନିଷ୍କପଟ, ମିଷ୍ଟଭାଷୀ ଓ ମେଳାପୀ ବ୍ୟକ୍ତି ଭାବେ ପରିଚିତ ଥିଲେ। ତାଙ୍କ ବିୟୋଗରେ ସମସ୍ତ କର୍ମଚାରୀ ତାଙ୍କୁ ଝୁରି ହେଉଛନ୍ତି। ଏହା ବ୍ୟତୀତ ସେ ଜଣେ ଭଲ ସଂଗଠକ ଭାବରେ ଶବର ସମାଜ ମଧ୍ୟରେ ବିଶେଷ ପ୍ରିୟ ଥିଲେ। ସୌରା ଭାଷାରେ ତାଙ୍କର ସରଳ ଓ ଆତ୍ମୀୟ କଥାବାର୍ତ୍ତା ସମସ୍ତଙ୍କୁ ଆକର୍ଷିତ କରୁଥିଲା। ତାଙ୍କର ହସମୁଖୀ ସ୍ବଭାବ ଓ ସରଳ ଜୀବନ ଶୈଳୀ ସମସ୍ତଙ୍କ ହୃଦୟରେ ଏକ ଛାପ ଛାଡ଼ିଯାଇଛନ୍ତି। ସେ ଶବର ସାଂସ୍କୃତିକ ସଂଘର ଜଣେ ସକ୍ରିୟ ସଦସ୍ୟ ଥିଲେ ଏବଂ ସଂଘର ପ୍ରତ୍ୟେକ କାର୍ଯ୍ୟରେ ନିଷ୍ଠା ଓ ଆନ୍ତରିକତାର ସହିତ ଦାୟିତ୍ୱ ପାଳନ କରୁଥିଲେ। ତାଙ୍କର ଅକାଳ ବିୟୋଗ ସଂଘ ପାଇଁ ଏକ ଅପୂରଣୀୟ କ୍ଷତି ବୋଲି ସଂଘ ପକ୍ଷରୁ କୁହାଯାଇଛି। ତାଙ୍କର ଦେହାନ୍ତରେ ଶବର ସାଂସ୍କୃତିକ ସଂଘ ପକ୍ଷରୁ ଗଭୀର ଶୋକ ପ୍ରକାଶ କରାଯାଇଛି। ଏହି ଦୁଃଖଦ ସମୟରେ ମହାପ୍ରଭୁଙ୍କ ନିକଟରେ ପରିବାରବର୍ଗଙ୍କୁ ଧୈର୍ଯ୍ୟ ଓ ସାହସ ପ୍ରଦାନ ପାଇଁ ପ୍ରାର୍ଥନା କରାଯାଇଛି। ବର୍ତ୍ତମାନ ତାଙ୍କର ମୃତଦେହ ଚକ୍ରଗୁଡ଼ା ଗ୍ରାମକୁ ଆଣାଯିବା ସୂଚନା ମିଳିଛି ଏବଂ ସେଠାରେ ଶେଷକୃତ୍ୟ ସମ୍ପନ୍ନ କରାଯିବ। ସଂଘର ସଦସ୍ୟ, ବନ୍ଧୁବର୍ଗ ଓ ପରିଜନମାନଙ୍କୁ ଚକ୍ରଗୁଡ଼ାରେ ଉପସ୍ଥିତ ରହି ଶେଷ ଦର୍ଶନ କରିବା ସହ ମହାପ୍ରୟାଣରେ ସାମିଲ ହେବାକୁ ଅନୁରୋଧ କରାଯାଇଛି। ଦିବଂଗତ ପୀତାମ୍ବରଙ୍କ ଅମର ଆତ୍ମା ଭଗବାନଙ୍କ ଚରଣରେ ଲୀନ ହେଉ ଏହି କାମନା ସହ ଶବର ସାଂସ୍କୃତିକ ସଂଘ ପକ୍ଷରୁ ଶ୍ରଦ୍ଧାଞ୍ଜଳି ଜଣାଯାଇଛି।