ନୂଆଦିଲ୍ଲୀ,୫ ।୭: ଗତ ନିର୍ବାଚନରେ ପରାଜୟ ସ୍ୱୀକାର କରିଥିବା କଂଗ୍ରେସର ଶୀର୍ଷ ନେତୃତ୍ୱ ଦଳର ଗୁଜରାଟ ୟୁନିଟକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ବ୍ୟକ୍ତିଗତ ଟିପ୍ପଣିଠାରୁ ଦୂରେଇ ରହିବାକୁ କହିଛି । ଏହାସହ ଦଳ ମୁଖିଆ କହିଛନ୍ତି ଚଳିତ ବର୍ଷ ଶେଷକୁ ହେବାକୁ ଥିବା ବିଧାନସଭା ନିର୍ବାଚନରେ ‘ମୋଦି ବନାମ କଂଗ୍ରେସ’ ଲଢେଇ ହେବା ଅନୁଚିତ ।
ନ୍ୟୁଜ ଏଜେନ୍ସି ଏଏନଆଇର ସୂଚନା ଅନୁଯାୟୀ, ୨୦୨୪ର ଲୋକ ସଭା ନିର୍ବାଚନ ପାଇଁ ରଣନୀତି ପ୍ରସ୍ତୁତ କରିବାକୁ କଂଗ୍ରେସ ଟାସ୍କ ଫୋର୍ସ ଏକ ବୈଠକ ଡାକିଥିଲା । ଏଥିରେ ଗୁଜରାଟ ବିଧାନସଭା ନିର୍ବାଚନର ରଣନୀତି ଉପରେ ଚର୍ଚ୍ଚା କରିବାକୁ ସୋମବାର ଗୁଜାଟର ଦଳୀୟ ନେତାଙ୍କ ସହ ବୈଠକ ହୋଇଥିଲା । ରାଷ୍ଟ୍ରୀୟ ରାଜଧାନୀ ଦିଲ୍ଲୀରେ କଂଗ୍ରେସର ୱାର ରୁମରେ ହୋଇଥିବା ଏହି ବୈଠକରେ ପ୍ରିୟଙ୍କା ଗାନ୍ଧୀ ଭଦ୍ରା, କେସି ବେଣୁଗୋପାଳ, ପି ଚିଦାମ୍ବରମ, ରଣଦୀପ ସୁରଜେୱାଲା, ଅଜୟ ମାକନ, ଜୟରାମ ରମେଶ, ମୁକୁଳ ବାସନିକ, ସୁନିଲ କାନୁନଗୋଲୁ ଓ ଗୁଜରାଟ କଂଗ୍ରେସ ନେତୃତ୍ୱ ଉପସ୍ଥିତ ଥିଲେ ।
ସାଢେ ଚାରି ଘଣ୍ଟା ଧରି ଚାଲିଥିବା ଏହି ବୈଠକରେ ନିର୍ଣ୍ଣୟ ନିଆଯାଇଛି କି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିରୋଧରେ କୌଣସି ବ୍ୟକ୍ତିଗତ ଟିପ୍ପଣି କରାଯିବ ନାହିଁ । ଏହାସହ ନିର୍ବାଚନକୁ ମୋଦି ବନାମ କଂଗ୍ରେସ ଲଢେଇ ମଧ୍ୟ କରାଯିବ ନାହିଁ । ହେଲେ ଆମ ଆଦମୀ ପାର୍ଟି(ଏଏପି)କୁ ଭାଜପାର ଟିମ ବି ଦଳ ଭାବେ ପ୍ରଚାରିତ କରାଯିବ ।
