ଅହମ୍ମଦାବାଦ୍,୧୨।୧୨: ଦ୍ୱିତୀୟ ଥର ଗୁଜରାଟର ମୁଖ୍ୟମନ୍ତ୍ରୀ ହୋଇଛନ୍ତି ଭୂପେନ୍ଦ୍ର ପଟେଲ। ରେକର୍ଡ ଭୋଟରେ ଜିତିଥିବା ଭୂପେନ୍ଦ୍ର ଭାଜପାର ଆଗଧାଡିର ନେତାଙ୍କ ମଧ୍ୟରେ ଜଣାଶୁଣା। ୧୫ ଜୁଲାଇ ୧୯୬୨ରେ ଅହମ୍ମଦାବାଦରେ ଜନ୍ମ ହୋଇଥିବା ବୃତ୍ତି ଅନୁଯାୟୀ ସେ ସିଭିଲ ଇଞ୍ଜିନିୟର ତଥା ବିଲଡର ଭାବରେ କାର୍ଯ୍ୟ କରିଛନ୍ତି। ତାଙ୍କ ପିତାଙ୍କ ନାମ ରଜନୀକାନ୍ତ ପଟେଲ। ମୁଖ୍ୟମନ୍ତ୍ରୀ ହେବା ପୂର୍ବରୁ ସେ ଅହମ୍ମଦାବାଦ ନଗର ଉନ୍ନୟନ ପ୍ରାଧିକରଣର ଅଧ୍ୟକ୍ଷ ରହିସାରିଛନ୍ତି।
ଭୂପେନ୍ଦ୍ର ଅହମ୍ମଦାବାଦର ଜେବି ଶାହା ଜ୍ୟୋତି ଉଚ୍ଚ ମାଧ୍ୟମିକ ବିଦ୍ୟାଳୟରୁ ପ୍ରାରମ୍ଭିକ ଅଧ୍ୟୟନ କରିଥିଲେ। ୧୯୮୨ରେ ଅହମ୍ମଦାବାଦ ସରକାରୀ ପଲିଟେକ୍ନିକ ଠାରୁ ସିଭିଲ ଇଞ୍ଜିନିୟରିଂରେ ଡିପ୍ଲୋମା ହାସଲ କରିଥିଲେ। ୧୯୯୫ରେ ରାଷ୍ଟ୍ରିୟ ସ୍ବୟଂ ସେବକ ସଂଗଠନ (ଆରଏସଏସ)ରେ ସକ୍ରିୟ ଥିବା ଭୁପେନ୍ଦ୍ର ରାଜନୀତିରେ ଯୋଗ ଦେଇଥିଲେ। ୧୯୯୯ରେ ସେ ମେମନଗର ପୌରପାଳିକାର ସଭାପତି ଭାବରେ ନିର୍ବାଚିତ ହୋଇଥିଲେ। ତା’ପରେ ୨୦୦୮ ରୁ ୨୦୧୦ ପର୍ଯ୍ୟନ୍ତ ସେ ଅହମ୍ମଦାବାଦ ମ୍ୟୁନିସିପାଲିଟି କର୍ପୋରେସନର ଉପାଧ୍ୟକ୍ଷ ମଧ୍ୟ ଥିଲେ।
ଭୁପେନ୍ଦ୍ର ପଟେଲ ମୋଟ ୮,୨୨,୮୦,୬୮୮ ଟଙ୍କା ସମ୍ପତ୍ତିର ମାଲିକ। ତାଙ୍କର ମୋଟ ୩,୬୩,୪୦,୬୮୮ ସ୍ଥାବର ଏବଂ ୪,୫୯,୪୦,୦୦୦ ଅସ୍ଥାବର ସମ୍ପତ୍ତି ରହିଛି। ନିର୍ବାଚନ ଆଫିଡେଭିଟ୍ରେ ଭୂପେନ୍ଦ୍ର ତାଙ୍କ ଆୟର ଉତ୍ସକୁ ବେତନ, ଭଡା ଏବଂ ଅନ୍ୟାନ୍ୟ ଆୟ ବୋଲି ଉଲ୍ଲେଖ କରିଛନ୍ତି। ତାଙ୍କ ନାଁାରେ ଗୋଟିଏ ଆକ୍ଟିଭା ସ୍କୁଟର ରହିଛି।
ଭୂପେନ୍ଦ୍ରଙ୍କ ସ୍ତ୍ରୀ ଅଳଙ୍କାରକୁ ବହୁତ ଭଲ ପାଆନ୍ତି। ତାଙ୍କ ପାଖରେ ୪ କିଲୋଗ୍ରାମରୁ ଅଧିକ ସୁନା ଓ ରୂପା ଅଳଙ୍କାର ଅଛି। ସେହିଭଳି ଭୂପେନ୍ଦ୍ରଙ୍କ ପାଖରେ ୨୫ ଲକ୍ଷ ଟଙ୍କା ମୂଲ୍ୟର ହୀରା ଅଳଙ୍କାର ରହିଛି।
