ବାରଙ୍ଗ,୩।୬(ଡି.ଏନ୍.ଏ.): ପ୍ରାଣୀ ଉଦ୍ୟାନ ନନ୍ଦନକାନନର ପ୍ରବେଶ ଟିକେଟ ଗାଇଡ୍ମାନେ କାଟିପାରିବେନି। ଏନେଇ ଗୁରୁବାର ଗାଇଡ୍ମାନଙ୍କ ଟିକେଟ୍ କାଟିବା ଉପରେ ରୋକ ଲଗାଇଛି ନନ୍ଦନକାନନ କର୍ତ୍ତୃପକ୍ଷ। ଗୁରୁବାର ଅପରାହ୍ନରେ ରାଜସ୍ବ ବିଭାଗ ରେଞ୍ଜର ସ୍ବାଗତିକା ସାହୁ ଅଚାନକ ଟିକେଟ କାଉଣ୍ଟରରେ ପହଞ୍ଚି ଗାଇଡ୍ମାନଙ୍କୁ ଟିକେଟ୍ ନ ଦେବାକୁ କର୍ମଚାରୀଙ୍କୁ କହିଥିଲେ। ଏହାପରେ ଗାଇଡ୍ମାନେ ସେଠାରେ ହୋହଲ୍ଲା କରିଥିଲେ। ରେଞ୍ଜର ଗାଇଡ୍ମାନଙ୍କୁ ବୁଝାଶୁଝା ନ କରିପାରିବାରୁ ଉପ ନିର୍ଦ୍ଦେଶକ ଘଟଣାସ୍ଥଳରେ ପହଞ୍ଚି କଳାବଜାରି ରୋକିବା ସହ ପର୍ଯ୍ୟଟକଙ୍କ ସୁରକ୍ଷାକୁ ଦୃଷ୍ଟିରେ ରଖି ଏପରି ପଦକ୍ଷେପ ନିଆଯାଇଥିବା କହିଥିଲେ। ପରେ ଖବରପାଇ ନନ୍ଦନକାନନ ଥାନା ପୋଲିସ ଆସି ଗାଇଡ୍ମାନଙ୍କୁ ବୁଝାଶୁଝା କରିବା ପରେ ପରିସ୍ଥିତି ଶାନ୍ତ ପଡ଼ିଥିଲା। ଭିଡ଼ରୁ ରକ୍ଷା ପାଇବା ପାଇଁ ପର୍ଯ୍ୟଟକଙ୍କ ଲାଗି ଅନ୍ଲାଇନ ଟିକେଟ କାଟିବାର ସୁବିଧା ରହିଛି। ଯଦି ଗୋଷ୍ଠୀ ଭାବେ ପର୍ଯ୍ୟଟକ ଆସନ୍ତି ତେବେ ସେମାନଙ୍କ ମଧ୍ୟରୁ ଜଣେ ଯାଇ ଟିକେଟ କାଟିପାରିବେ। ଏହାଦ୍ୱାରା କଳାବଜାର ରୋକିବା ସହ ପର୍ଯ୍ୟଟକଙ୍କ ସୁରକ୍ଷା ପାଇଁ ଏଭଳି ବ୍ୟବସ୍ଥା କରାଯାଇଥିବା ଉପନିର୍ଦ୍ଦେଶକ ଡ. ସଞ୍ଜିତ କୁମାର କହିଛନ୍ତି।
