ଗୁଡ଼ାରି,୨ା୯(ଡି.ଏନ୍.ଏ.):ରାୟଗଡ଼ା ଜିଲା ଗୁଡାରି ସହରର ପିଲାଙ୍କ ଆମୋଦ ପ୍ରମୋଦ ନିମନ୍ତେ ଏନ୍ଏସି ପକ୍ଷରୁ ୨୦୨୧ ଅଗଷ୍ଟରେ ଲକ୍ଷାଧିକ ଟଙ୍କା ଖର୍ଚ୍ଚରେ ଏକ ଶିଶୁ ଉଦ୍ୟାନ ସ୍ଥାପିତ ହୋଇଥିଲା। ଏବେ ଏହି ଏକମାତ୍ର ଶିଶୁ ଉଦ୍ୟାନ ସମସ୍ୟା ମଧ୍ୟରେ ରହିଛି। ଉଦ୍ୟାନ ସ୍ଥାପନ ହେବାର କିଛିଦିନ ପରେ ହିଁ ଦୋଳି ଛିଣ୍ଡିଯାଇ ଅଚଳ ହୋଇଥିଲା। ସେହିପରି ଏଠାରେ ଆବଶ୍ୟକତା ଅନୁଯାୟୀ ଅଲୋକ ବ୍ୟବସ୍ଥା ମଧ୍ୟ ନାହିଁ। ଅନେକ ଖୁଣ୍ଟରେ ଲାଇଟ ଜଳୁନି। ପିଲାମାନେ ଖେଳିବା ସମୟରେ ମା’ ବାପା ଅନ୍ଧାରରେ ମୋବାଇଲ ଟର୍ଚ୍ଚ ଦେଖାଇ ବୁଲୁଛନ୍ତି। ପରିତାପର ବିଷୟ ହେଲା ଏଠାରେ ସ୍ଥାପନ ହୋଇଥିବା ସେଲଫି ପଏଣ୍ଟରୁ ପ୍ରାୟ ୬ମାସ ହେଲା ‘ଲଭ୍ ସିମ୍ବଲ୍’ ଗାଏବ ହୋଇଥିଲେ ମଧ୍ୟ ତାହାକୁ ଠିକ୍ କରାଯାଇ ପାରିନି। ଶିଶୁ ଉଦ୍ୟାନରେ ଆଣ୍ଠୁଏ ଉଚ୍ଚର ଘାସ ରହିଥିଲେ ମଧ୍ୟ ତାହାକୁ କାଟି ସଫା କରାଯାଉନି। ଏଭଳି ପରିସ୍ଥିତିରେ ଅନ୍ଧାରରେ ଘାସ ମଧ୍ୟରେ ବିଷାକ୍ତ କୀଟ କାମୁଡ଼ିବା ଆଶଙ୍କା ରହିଛି। ଅନେକ ମା’ ବାପା ପିଲାଙ୍କୁ ଏଠାକୁ ଆଣିବାକୁ ଅସୁରକ୍ଷିତ ମଣୁଛନ୍ତି।
ଏହି ଶିଶୁ ଉଦ୍ୟାନର ନିୟମିତ ଯତ୍ନ ଏବଂ ଆବଶ୍ୟକ ପରିମାଣର ଅଲୋକୀକରଣ କରାଗଲେ ସହରର ପିଲାମାନେ ନିଶ୍ଚିତ ଭାବେ ଏଠାରେ ନିରାପଦରେ ଖେଳିବା ସହ ମଜା ଉଠାଇପାରନ୍ତେ। ତେଣୁ ଶିଶୁ ଉଦ୍ୟାନର ସମସ୍ତ ସମସ୍ୟା ଶୀଘ୍ର ସମାଧାନ କରାଯାଉ ବୋଲି ସହରର ବୁଦ୍ଧିଜୀବୀ ଦାବି କରିଛନ୍ତି। ଏ ନେଇ ଏନ୍ଏସି କାର୍ଯ୍ୟ ନିର୍ବହୀ ଅଧିକାରୀ ଶୋଭା ଭୂଷଣ ଶବର କହିଛନ୍ତି, ଶୀଘ୍ର ଘାସ ସଫା ସହ ଅଲୋକୀକରଣ ବ୍ୟବସ୍ଥା କରାଯିବ।
