ନୂଆଦିଲ୍ଲୀ,୧୮।୮: ଦେଶର ଅର୍ଥନୀତିକୁ ସବଳ କରିବା ସହ ଟିକସ ଆଦାୟ କ୍ଷେତ୍ରରେ ରହିଥିବା କିଛି କାର୍ଯ୍ୟକୁ ଶେଷ କରିବା ପାଇଁ ନିକଟରେ ଶେଷ ହୋଇଥିବା କେନ୍ଦ୍ର କ୍ୟାବିନେଟ ବୈଠକରେ ଏଭଳି କିଛି ବିଷୟ ଉପରେ ଗୁରୁତ୍ୱପୂର୍ଣ୍ଣ ଆଲୋଚନା ହୋଇଥିଲା। ସେହିଭଳି ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ଶେଷ ହୋଇଥିବା ମୁଖ୍ୟମନ୍ତ୍ରୀ ସ୍ତରୀୟ ବୈଠକରେ ମଧ୍ୟ ଜିଏସ୍ଟି ସମ୍ପର୍କିତ ବିଭିନ୍ନ ବିଷୟରେ ଆଲୋଚନା ହୋଇଥିଲା। ସେହିପରି ସାମଗ୍ରୀ ଓ ସେବା ଟିକସ (ଜିଏସ୍ଟି) ହାରରେ ଆଉ ଥରେ ପରିବର୍ତ୍ତନ କରିବା ସହ ଓଲଟା ଟିକସ ଢାଞ୍ଚାରେ ଆଉ କିଛିଟା କାମ ବାକି ରହିଛି ଯାହାକୁ ଶେଷ କରିବା ବିଷୟରେ କର୍ନାଟକ ମୁଖ୍ୟମନ୍ତ୍ରୀ ବସବରାଜ ବୋମାଇଙ୍କ ନେତ୍ୱତ୍ୱାଧୀନ ମନ୍ତ୍ରୀ ଗୋଷ୍ଠୀ ଏ ନେଇ ବିଚାର କରୁଛି। ଆସନ୍ତା ସେପ୍ଟେମ୍ବରରେ ତାମିଲନାଡୁର ମଦୁରାଇଠାରେ ଜିଏସ୍ଟି ପରିଷଦର ଆଗାମୀ ବୈଠକ ଅନୁଷ୍ଠିତ ହେବ ବୋଲି ଜଣାପଡ଼ିଛି।
ଉକ୍ତ ବୈଠକ ପୂର୍ବରୁ ଟିକସ ହାରରେ ପରିବର୍ତ୍ତନ ପାଇଁ ମନ୍ତ୍ରୀ ଗୋଷ୍ଠୀ ସୁପାରିସ କରିବ ବୋଲି ସୂଚନା ମିଳିଛି। ଫଳରେ ଓଲଟା ଟିକସ ଢାଞ୍ଚାକୁ ନେଇ ଗତ ଦୁଇ ଥରରେ ବହୁତ ଭଲ କାମ ହୋଇଛି। ଆଉ ଯାହା କିଛି ବାକି ରହିଛି ତାହା ଏଥର ଶେଷ କରାଯିବ। ବିଶେଷ କରି ବୟନ, ଅଟୋମୋବାଇଲ୍, ୟୁରିଆ ଓ ଅନ୍ୟାନ୍ୟ ସାରର କଞ୍ଚାମାଲ, କେତେକ ଇଲେକ୍ଟ୍ରୋନିକ୍ ଉପାଦାନ ଓ ଇଲେକ୍ଟ୍ରିକ୍ ଗାଡ଼ିକୁ ନେଇ ରହିଥିବା ଟିକସ ଢାଞ୍ଚାରେ ପରିବର୍ତ୍ତନ କରାଯିବ। ବର୍ତ୍ତମାନ ଏହି କ୍ଷେତ୍ରର କମ୍ପାନୀଗୁଡ଼ିକ ପୁଞ୍ଜି ସାମଗ୍ରୀ ମଗାଇବା ବେଳେ ଯେଉଁ ଇନ୍ପୁଟ୍ ଟ୍ୟାକ୍ସ ଦେଉଛନ୍ତି ତାହାକୁ ବ୍ୟବହାର କରିପାରୁ ନ ଥିବା ବେଳେ ସେସବୁ ମଧ୍ୟ ଫେରି ପାଉନାହାନ୍ତି। ଫଳରେ ସେମାନଙ୍କ କାର୍ଯ୍ୟକାରୀ ପୁଞ୍ଜି ଖର୍ଚ୍ଚ ଅଧିକ ରହୁଛି।
ଗତ ବର୍ଷ ସେପ୍ଟେମ୍ବରରେ ଜୋତା, ଚପଲ ଓ ବୟନ କ୍ଷେତ୍ରର ଓଲଟା ଟିକସ ଢାଞ୍ଚାକୁ ବଦଳାଇବା ଲାଗି ଜିଏସ୍ଟି ପରିଷଦ ନିଷ୍ପତ୍ତି ନେଇଥିଲା। ଏକ ହଜାର ଟଙ୍କା ପର୍ଯ୍ୟନ୍ତର ଜୋତା, ଚପଲ ଉପରେ ୧୨% ହାରରେ ଜିଏସ୍ଟି ଲଗାଇବାକୁ ନିଷ୍ପତ୍ତି ହୋଇଥିଲା, ଯାହା ଚଳିତ ବର୍ଷ ଜାନୁୟାରୀରୁ ଲାଗୁ ହୋଇଛି। ପୂର୍ବରୁ ଏଥିରେ ୫% ଜିଏସ୍ଟି ଲଗାଯାଇଥିଲା। ବୟନ ସାମଗ୍ରୀ ପାଇଁ ମଧ୍ୟ ସେହି ନିଷ୍ପତ୍ତି ନିଆଯାଇଥିଲା। କିନ୍ତୁ ରାଜସ୍ଥାନ,ତେଲଙ୍ଗାନା, ପଶ୍ଚିମବଙ୍ଗ ଓ ଦିଲ୍ଲୀ ଭଳି ବହୁ ରାଜ୍ୟ ସେହି ପ୍ରସ୍ତାବକୁ ବିରୋଧ କରିବା ପରେ ତାହା ପ୍ରତ୍ୟାହାର ହୋଇଥିଲା। ଚଳିତ ବର୍ଷ ଜୁନ୍ରେ ଆଉ କିଛି ସାମଗ୍ରୀ ଯଥା ଖାଇବା ତେଲ, ସୋଲାର ୱାଟର ହିଟର,ଏଲ୍ଇଡି ଲ୍ୟାମ୍ପ୍, ଛାପା କାଳି ଓ ଛୁରି ଭଳି ସାମଗ୍ରୀ ଉପରେ ଓଲଟା ଟିକସ ଢାଞ୍ଚାରେ ପରିବର୍ତ୍ତନ କରାଯାଇଥିଲା। ଏଥି ସହିତ ପୂର୍ବରୁ ପ୍ୟାକେଟ୍ ହୋଇ ବିକ୍ରି ହେଉଥିବା ଓ ପୂର୍ବରୁ ଲେବୁଲ୍ ହୋଇଥିବା ରିଟେଲ୍ ପ୍ୟାକ୍ ଉପରେ ୫% ଜିଏସ୍ଟି ଲାଗୁ କରାଯାଇଥିଲା।
