ପଟ୍ଟାମୁଣ୍ଡାଇ,୨୦।୩(ସ୍ବ.ପ୍ର.): କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ପୌରାଞ୍ଚଳର ୧୧ ନଂ. ୱାର୍ଡରେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ଯୋଗୁ ସହରରେ ଉତ୍ତେଜନା ମୂଳକ ପରିସ୍ଥିତି ସୃଷ୍ଟି ହୋଇଛି। ଯାହାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ଶନିବାର ୧୪୪ ଧାରା ଜାରି କରାଯାଇଛି।
ପ୍ରକାଶ ଯେ, ପଟ୍ଟାମୁଣ୍ଡାଇ ପୌରାଞ୍ଚଳ୧୧ନଂ. ଓ୍ବାର୍ଡରେ ଥିବା ଊର୍ଦ୍ଧୁ ସ୍କୁଲର ପାଚେରି ନିର୍ମାଣକୁ କେନ୍ଦ୍ରକରି ଦଳିତ ଓ ସଂଖ୍ୟାଲଘୁଙ୍କ ମଧ୍ୟରେ ଗତ ତିନିଦିନ ହେଲା ଗଣ୍ଡଗୋଳ ଲାଗିରହିଥିଲା। ଶୁକ୍ରବାର ସନ୍ଧ୍ୟାରେ କେତେକ ଗୋଟିଏ ଗୋଷ୍ଠୀର କେତେକ ଯୁବକ ଅନ୍ୟ ଗୋଷ୍ଠୀର ଯୁବକଙ୍କୁ ଆକ୍ରମଣ କରିବା ସହିତ ଟେକାମାଡ କରିଥିଲେ। ଟେକା ମାଡରେ ପୁରୁଷୋତ୍ତମ ମଳିକଙ୍କ ସ୍ତ୍ରୀ ମଞ୍ଜୁଲତା ଗର୍ଭବତୀ ଥିବାବେଳେ ତାଙ୍କ ପେଟରେ ଇଟାବାଜି ଗୁରୁତର ଆହତ ହୋଇଛନ୍ତି। ସେହିପରି କରୁଣାକର ମଳିକଙ୍କ ପୁଅ ଆଶିଷ ଶୁକ୍ରବାର ଉକ୍ତ ରାସ୍ତାଦେଇ କାର ନେଉଥିବା ବେଳେ ତାଙ୍କୁ ଅନ୍ୟ ଗୋଷ୍ଠୀର କିଛି ଯୁବକ ଆକ୍ରମଣ କରିଥିଲେ। ମାଧବ ମଳିକଙ୍କ ପୁଅ ବଳରାମ ଶୁକ୍ରବାର ପଟ୍ଟାମୁଣ୍ଡାଇ ଥାନାରେ ଏତଲା ଦେବାକୁ ଯାଇଥିବା ବେଳେ ପୋଲିସ ତାଙ୍କୁ ଗାଳିଗୁଲଜ କରି ଅଟକ ରଖିଥିଲା। ବସ୍ତିର ଅନ୍ୟ ୧୫-୨୦ ଯୁବକ ଦଳିତମାନଙ୍କ ଉପରେ ଆକ୍ରମଣ ଘଟଣାକୁ ନେଇ ଶନିବାର ସକାଳେ ଥାନା ଘେରାଉ କରିବା ସହିତ ପଟ୍ଟାମୁଣ୍ଡାଇ କେନାଲ ପୋଲ ଛକ ଡାକ ବଙ୍ଗଳା ଛକରେ ଟାୟାର ଜାଳି,ବାଉଁଶ ବାନ୍ଧି ରାସ୍ତାରୋକୋ କରିଛନ୍ତି। ପଟ୍ଟାମୁଣ୍ଡାଇ ବଜାରରେ ଉତ୍ତେଜନା ମୂଳକ ପରିସ୍ଥିତି ଲାଗି ରହିଥିବାରୁ ପ୍ରଶାସନ ପକ୍ଷରୁ ଦୃଷ୍ଟି ରଖାଯାଇଛି । କେନ୍ଦ୍ରାପଡା ଏସ୍ପି ମଧ୍ୟାହ୍ନରେ ପଟ୍ଟାମୁଣ୍ଡାଇରେ ପହଞ୍ଚି ଘଟଣାର ଅନୁଧ୍ୟାନ କରି ଧାରଣାରତ ଦଳିତମାନଙ୍କ ସହ ଆଲୋଚନା କରିଥିଲେ। ଏହି ସମୟରେ ୫୦ରୁ ଊର୍ଦ୍ଧ ମୁସଲମାନ ବସ୍ତିର ଯୁବକମାନେ ଏସ୍ପି ଓ ପୋଲିସ ଅଧିକାରୀଙ୍କ ସମ୍ମୁଖରେ ଆକ୍ରମଣ କରିବାକୁ ଉଦ୍ୟମ କାରିଥିଲେ। ଫଳରେ ପରିସ୍ଥିତି ସାମ୍ପ୍ରଦାୟିକ ଦଙ୍ଗାର ରୂପ ନେଇଥିବା ବେଳେ ପୋଲିସ ପକ୍ଷରୁ ୧୪୪ ଧାରା ଜାରି କରାଯାଇଛି। ଦୋକାନ ବଜାର ବନ୍ଦ ଥିବାବେଳେ ଧାରଣା କାରିମାନେ ବସିରହିଛନ୍ତି। ପୋଲିସ ଉଭୟ ଗୋଷ୍ଠୀ ପକ୍ଷରୁ ପୃଥକ ଭାବେ ଦୁଇଟି ମାମଲା ରୁଜୁକରି ତଦନ୍ତ ଚଳାଇଛି। ତେବେ ପଟ୍ଟାମୁଣ୍ଡାଇ ବଜାରରେ ଉତ୍ତେଜନା ମୂଳକ ପରିସ୍ଥିତି ଲାଗି ରହିଛି। ବିଭିନ୍ନ ସ୍ଥାନରେ ଅଧିକ ପୋଲିସ ଫୋର୍ସ ମୁତୟନ କରାଯାଇଛି।
