ବିବାହ ଜୀବନର ଏକ ଗୁରୁତ୍ୱପୂର୍ଣ୍ଣ ପର୍ଯ୍ୟାୟ। ନୂଆ ଦାୟିତ୍ୱ, ନୂଆ କାର୍ଯ୍ୟ, ନୂଆ ଇଚ୍ଛା। କିନ୍ତୁ ସମସ୍ତେ ଏହାକୁ ପସନ୍ଦ କରନ୍ତି ନାହିଁ। ଅନେକ କୁହନ୍ତି,ବିବାହ ପରେ ପ୍ରତିବନ୍ଧକ ଆରମ୍ଭ ହୋଇଯାଏ। ଏପରି ପରିସ୍ଥିତିରେ, ଏହି ବନ୍ଧନକୁ ବଜାୟ ରଖିବା କଷ୍ଟକର ହୋଇପଡ଼ିଥାଏ। ଏହା ମଧ୍ୟ ପ୍ରାୟତଃ ଅନୁଭବ କରାଯାଏ ଯେ, ବିବାହ ପରେ ସାଙ୍ଗମାନଙ୍କ ସହିତ ମିଳାମିଶା ବନ୍ଦ ହୋଇଯାଏ। କାରଣ ନବ ବିବାହିତ ଦମ୍ପତି ପରସ୍ପର ସହିତ ସେମାନଙ୍କର ସମ୍ପର୍କ ଦୃଢ଼ କରିବାକୁ ଅଧିକ ସମୟ ଅତିବାହିତ କରନ୍ତି। ତେଣୁ ଏହି ବନ୍ଧନକୁ ଭାଙ୍ଗିବା ପାଇଁ କେରଳର ଏକ ଦମ୍ପତି ନିଆରା ଉପାୟ ବାଛିଛନ୍ତି। ସେମାନେ ଏଥିପାଇଁ ଏକ ଚୁକ୍ତିନାମା ସ୍ବାକ୍ଷର କରିଛନ୍ତି। ଏହା ଶୁଣିବାକୁ ଅଜବ ଲାଗୁଥିଲେ ମଧ୍ୟ ସତ।
ଉଭୟ ନଭେମ୍ବର ୫ରେ ପଲକଡ୍ର କାଞ୍ଜିକୋଡ୍ରେ ବିବାହ କରିଥିଲେ। ସାଙ୍ଗମାନେ ବର ରଘୁଙ୍କୁ ଉପହାର ସ୍ବରୂପ ଏକ ଚୁକ୍ତିନାମା କାଗଜ ଦେଇଥିଲେ। ସୋସିଆଲ ମିଡିଆରେ ଶେୟାର କରିବା ପରେ ଏହା ଭାଇରାଲ ହୋଇଥିଲା। ରଘୁ କାଞ୍ଜିକୋଡ୍ରେ ଥିବା ଏକ ଘରୋଇ କମ୍ପାନୀର କର୍ମଚାରୀ ଏବଂ କନ୍ୟା ଅର୍ଚ୍ଚନା ବ୍ୟାଙ୍କ ପରୀକ୍ଷା ପାଇଁ ପ୍ରସ୍ତୁତ ହେଉଛନ୍ତି।
ଅର୍ଚ୍ଚନା ୫୦ ଟଙ୍କାର ଏକ ଷ୍ଟାମ୍ପ୍ ପେପରରେ ଦସ୍ତଖତ କରିଛନ୍ତି। ଯେଉଁଥିରେ ଲେଖା ଅଛି, ‘ବିବାହ ପରେ ମଧ୍ୟ ମୋ ସ୍ବାମୀ ରଘୁ ଏସ୍ କେଡିଆରଙ୍କୁ ତାଙ୍କ ସାଙ୍ଗମାନଙ୍କ ସହିତ ରାତି ୯ଟା ପର୍ଯ୍ୟନ୍ତ ସମୟ ଅତିବାହିତ କରିବାକୁ ଅନୁମତି ଦିଆଯିବ ଏବଂ ମୁଁ ପ୍ରତିଶ୍ରୁତି ଦେଉଛି ଏହି ସମୟରେ ମୁଁ ତାଙ୍କୁ ଫୋନରେ ବିବ୍ରତ କରିବି ନାହିଁ।
ଏହି ଘଟଣା ସୋସିଆଲ ମିଡିଆରେ ଭାଇରାଲ ହୋଇଥିଲା। ରଘୁ ୧୭ଟି ବ୍ୟାଡ୍ମିଣ୍ଟନ ଖେଳାଳିଙ୍କ ହ୍ବାଟ୍ସଆପ୍ ଗ୍ରୁପ୍ରେ ଅଛନ୍ତି। ସେ ନିଜ ବିବାହ ପରେ ଏପରି ଚୁକ୍ତିନାମା କରିବେ ବୋଲି ଯୋଜନା କରିଥିଲେ।
ଦେଶରେ ଏଭଳି ଘଟଣା ସାଧାରଣ ହେବାରେ ଲାଗିଛି। ନିକଟରେ ଆସାମର ଜଣେ ବରକୁ ବିବାହ ପରେ ଚୁକ୍ତି ସ୍ବାକ୍ଷର କରିବାକୁ କୁହାଯାଇଥିଲା। ଚୁକ୍ତିରେ ମାସକୁ ଗୋଟିଏ ପିଜା ଖାଇବାକୁ ଦେବା ସହିତ କିଛି ଜିନିଷ ଉଲ୍ଲେଖ କରାଯାଇଥିଲା। ସେ ଏକ ସ୍ବତନ୍ତ୍ର ଚୁକ୍ତିନାମା ମଧ୍ୟ କରିଥିଲେ। ଯେଉଁଥିରେ ସେମାନେ ଏକାଠି କରିବାକୁ ଚାହୁଁଥିବା ଅନେକ ମଜାଦାର କଥା ଅନ୍ତର୍ଭୁକ୍ତ କରିଥିଲେ। ଯେମିତିକି ପ୍ରତିଦିନ ଜିମ ଯିବା, ପ୍ରତି ୧୫ ଦିନ ପରେ ଶପିଂ କରିବା ଏବଂ ପ୍ରତି ମାସରେ ଥରେ ପିଜା ଖାଇବା ପାଇଁ ତାରିଖ ଉଲ୍ଲେଖ କରିଥିଲେ।
