ନିଜ ଦେଶର ମଙ୍ଗଳ ପାଇଁ ଯେ ଜୀବନ ଦିଏ ତାହାଙ୍କୁ ଶହୀଦ୍ କୁହାଯାଏ। ଜଣେ ନିଜର ବିଚାରଧାରା ପାଇଁ କୌଣସି ବିରୋଧୀ କିମ୍ବା ଶତ୍ରୁ ଦ୍ୱାରା ନିହତ ହେଲେ ସେହି ଦେଶ, ଜାତି, ଧର୍ମ ଓ ସମାଜ ‘ଶହୀଦ’ର ମର୍ଯ୍ୟାଦା ଦେଇଥାଏ। ଅନେକ ବୈଜ୍ଞାନିକ ଓ ଚିକିତ୍ସା ବିଜ୍ଞାନୀ ବିଶ୍ୱର ମଙ୍ଗଳ ପାଇଁ ଜୀବନ ଦେଇ ଅମର ହୋଇଛନ୍ତି। କିନ୍ତୁ ଶହୀଦର ମର୍ଯ୍ୟାଦା ପିନ୍ଧି ନାହିଁ। ବିଜ୍ଞାନର ପ୍ରଗତି ଫଳରେ ମଣିଷର ସୁଖ, ସ୍ବାଛନ୍ଦ୍ୟ, ସୁସ୍ଥତା, ସ୍ବପ୍ନ ଓ ସମୃଦ୍ଧିର ପ୍ରଗତି ହୋଇଛି। ଅନେକ ଡାକ୍ତର ଓ ବୈଜ୍ଞାନିକ ଏଥିପାଇଁ ଅକଥନୀୟ ଅତ୍ୟାଚାର, ନିର୍ଯାତନା ଓ ଲାଞ୍ଛନା ସହ୍ୟ କରି ଜେଲ୍ ଯାଇଛନ୍ତି, ବିଷପାନ କରିଛନ୍ତି ଓ ଜଳନ୍ତା ନିଆଁରେ ପୋଡ଼ି ହୋଇ ମୃତ୍ୟୁବରଣ କରିଛନ୍ତି। ତାଙ୍କର ବଳିଦାନ ମାନବ ସମାଜ ପାଇଁ ଅମର ହୋଇ ରହିଛି।
କରୋନା ଯୁଦ୍ଧର ପ୍ରଥମ ଶହୀଦ୍ ଚାଇନାର ଉହାନ୍ ସହରର ଡାକ୍ତର ଲି ୱେନ୍ଲିୟାଙ୍ଗ୍। କୋଭିଡ୍-୧୯ ଭୂତାଣୁର ସୃଷ୍ଟି ଓ ସଂକ୍ରମଣ ବିଷୟରେ ପ୍ରଥମେ ଡାକ୍ତର ଲିୱେନ୍ଳିୟାଙ୍ଗ୍ ଜାଣି ତାଙ୍କର ଡାକ୍ତର ବନ୍ଧୁମାନଙ୍କୁ ଜଣାଇଲେ। ଏଥିରେ ପ୍ରଶାସନ କ୍ଷୁବ୍ଧ ହୋଇ ତାଙ୍କୁ ଜେଲ୍ ଦଣ୍ଡ ଦେଲେ। ଅପରପକ୍ଷେ ସେ ନିଜେ କରୋନାରେ ସଂକ୍ରମିତ ହୋଇ ମୃତ୍ୟୁବରଣ କଲେ। ଏହି ତଥ୍ୟକୁ ଗୁଜବ କହି ଲୁଚାଇବାକୁ ଚେଷ୍ଟା କରିବା ଫଳରେ ଏହା ବିଶ୍ୱ ମହାମାରୀରେ ପରିଣତ ହେଲା।
ସୂଚନାଯୋଗ୍ୟ ବହୁ ପୁରାତନ ‘ହିପୋକ୍ରାଟିକ୍ ଶପଥ’ ରୋଗୀ ଚିକିତ୍ସା ପ୍ରାରମ୍ଭରୁ ଡାକ୍ତରମାନେ ନେଇଥାନ୍ତି। ସେମାନେ ଈଶ୍ୱରଙ୍କୁ ସାକ୍ଷୀ ରଖି ଶପଥ କରନ୍ତି ଯେ, ରୋଗୀ ସେବା ମୋର ପରମ ଧର୍ମ ହେବ। ମୋର ଶକ୍ତି ଓ ବିଚାରକୁ ନେଇ ରୋଗୀମାନଙ୍କ ଚିକିତ୍ସାରେ ଅବହେଳା କରିବି ନାହିଁ। ଏହି ଗୁରୁତ୍ୱପୂର୍ଣ୍ଣ ଦାୟିତ୍ୱକୁ ନମ୍ରତା ଓ ଶ୍ରଦ୍ଧାର ସହିତ ପାଳନ କରିବା ପାଇଁ ଈଶ୍ୱର ପ୍ରେରଣା ଦିଅନ୍ତୁ। ନିଷ୍ଠାପର ଡାକ୍ତର ସର୍ବଦା ରୋଗୀର କଷ୍ଟ, ଯନ୍ତ୍ରଣା ଓ ଦୁଃଖ ଅପନୋଜଦନ କରି ବିଶ୍ୱାସଭାଜନ ହୁଅନ୍ତି। ମାନବ ସେବା ହିଁ ମାଧବ ସେବା। ଏହା କିନ୍ତୁ ସତ୍ୟ ଯେ- ସ୍ବାସ୍ଥ୍ୟ ସେବା ହେଉଛି ବିପଦପୂର୍ଣ୍ଣ। ଏଥିରେ ଅନେକ ଉନ୍ନତି ସମ୍ଭବ ହୋଇଛି। ଅନେକ ସଂକ୍ରାମକ ରୋଗ, କୀଟବାହକ ରୋଗ ଓ ଭୟାନକ କ୍ୟାନ୍ସର ଅପସରି ଗଲାଣି। ବଞ୍ଚିବାର ବୟସ ସୀମା ଦ୍ୱିଗୁଣିତ ହେଲାଣି। ଏହା ସବୁ ଡାକ୍ତରଙ୍କର ଅବଦାନ। ବର୍ତ୍ତମାନ କରୋନା ଭୂତାଣୁ ସଂକ୍ରମଣ ସାର୍ବଦେଶିକ ହୋଇ ବିଶ୍ୱରେ ଭୟାନକ ରୂପ ନେଇଛି। ଏଥିପାଇଁ ଫଳପ୍ରଦ ଔଷଧ ଓ ଟିକା ନାହିଁ। କେବଳ ଉପଯୁକ୍ତ ରୋଗୀ ଲୋକ ଓ ଭୂତାଣୁଠାରୁ ଦୂରେଇ ରହିବା ବାଞ୍ଛନୀୟ। ଏହି ପରିସ୍ଥିତିରେ ରୋଗୀ ଡାକ୍ତରଠାରୁ ସାନ୍ତ୍ୱନା, ଶ୍ରଦ୍ଧା ଓ ସେବା ଆଶା କରେ। ତା’ର ପ୍ରତିବଦଳରେ ପ୍ରତିଦାନ ଦେବା ସମ୍ଭବ ନୁହେଁ। ସେହି ପ୍ରତିଦାନ ହେଉଛି ଚିକିତ୍ସା କରୁଥିବା ଡାକ୍ତରଙ୍କର ଅମାପ, ଅକ୍ଷୟ ଓ ଅତୁଳନୀୟ ଧର୍ମ।
ମାଆ ଆମକୁ ଜନ୍ମ ଦିଅନ୍ତି; କିନ୍ତୁ ଡାକ୍ତର ପୁନର୍ଜନ୍ମ ଦିଅନ୍ତି। ଡାକ୍ତରମାନେ ଅନେକ ପ୍ରତିକୂଳ ପରିସ୍ଥିତିରେ ରୋଗୀ ସେବା କରନ୍ତି। କରୋନା ଯୁଦ୍ଧରେ ଯୋଦ୍ଧାଭାବେ ପରିଗଣିତ କେତେକ ଡାକ୍ତର ଶହୀଦ୍ ହେଲେଣି। ଆଜି ଦିନରେ ଜନସାଧାରଣଙ୍କୁ ଅନୁରୋଧ ଡାକ୍ତରଙ୍କର ବହୁମୂଲ୍ୟ ଅବଦାନ ପାଇଁ ସ୍ନେହ ଓ ଶ୍ରଦ୍ଧା ସୁମନ ଅର୍ପଣ କରନ୍ତୁ।
– ଡା. ଦ୍ୱିଜେଶ କୁମାର ପଣ୍ଡା
୧୨, ଆଚାର୍ଯ୍ୟ ବିହାର,ଭୁବନେଶ୍ୱର
ମୋ:୯୪୩୮୪୭୦୭୭୭
