ଚମ୍ପୁଆ,୧୭ା୪(ଡି.ଏନ.ଏ.): ଇଚ୍ଛା ଶକ୍ତି ଥିଲେ ଅସାଧ୍ୟ କାର୍ଯ୍ୟ ବି ସାଧନ ହୋଇପାରିବ। ଦିନେ ଯେଉଁ ସ୍ଥାନରେ ଦୂବ କଅଁଳୁ ନ ଥିଲା, ସେଠାରେ ଏବେ ସବୁଜ ବଳୟ ହୋଇଛି। ପାଣି ଅଭାବ ଓ ଅନ୍ୟାନ୍ୟ ଅସୁବିଧା ଯୋଗୁ ଚାଷୀ ଚାଷଠାରୁ ଦୂରେଇ ଯାଉଥିବା ବେଳେ କେନ୍ଦୁଝର ଜିଲା ଚମ୍ପୁଆ ଏନ୍ଏସି ଅଧୀନ ଗୋଧୂଳି ଗ୍ରାମର ଚାଷୀମାନେ ଟାଙ୍ଗରା ଭୂଇଁରେ ଫସଲ ଫଳାଇଛନ୍ତି। ଉଠାଜଳସେଚନ ଏବଂ କୃଷିବିଭାଗର ସହାୟତାରେ ଏନ୍ଏସି ଅଞ୍ଚଳର ଚାଷୀ ବିଭିନ୍ନ ପ୍ରକାର ପନିପରିବା ଚାଷ କରି ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି।
ସୂଚନା ଅନୁଯାୟୀ, ପାରମ୍ପରିକ ମକା ଚାଷ ପାଇଁ ଗୋଧୂଳି ଚମ୍ପୁଆ ଉପଖଣ୍ଡରେ ସ୍ବତନ୍ତ୍ର ପରିଚୟ ସୃଷ୍ଟି କରିଛି। ପୂର୍ବରୁ ଉକ୍ତ ଗ୍ରାମର ଚାଷୀ ନିଜ ଫସଲର ବିହନ ବ୍ୟବହାର କରି ମକା ଓ ଚଣା ଚାଷ କରିଆସୁଥିଲେ। ମାତ୍ର ସମୟର ପରିବର୍ତ୍ତନରେ ସରକାରଙ୍କ ସହାୟତାକୁ ଠିକ୍ ଭାବେ ଉପଯୋଗ କରି ଦୁଇଗୁଣା ସଫଳତା ପାଇବାରେ ସମର୍ଥ ହୋଇପାରିଛନ୍ତି। ଚଳିତବର୍ଷ ଗୋଧୂଳି ଗ୍ରାମରେ ୪୧ ଜଣ ଚାଷୀ ୩୫ ଏକର ଜମିରେ ମକା ଚାଷ, ୨୦ ଏକର ଜମିରେ ଚଣା ଚାଷ କରିଛନ୍ତି। ପୂର୍ବରୁ ମକା ୨୦ ଟଙ୍କାରେ ୬ ଗୋଟି ମିଳୁଥିବା ବେଳେ ଚଳିତ ବର୍ଷ ୫୦ ଟଙ୍କାରେ ୭ ବିକି ଲାଭବାନ ହେଉଛନ୍ତି। ସେହିପରି ଚଣା ଚାଷରେ ମଧ୍ୟ ୨ ଗୁଣା ଲାଭ ହୋଇଥିବା ଚାଷୀ ଇଶ୍ୱର ଚନ୍ଦ୍ର ନାଏକ ପ୍ରକାଶ କରିଛନ୍ତି। ଚାଷୀ ନିର୍ମଳ ନାଏକଙ୍କ ମତରେ ଗୋଧୂଳିରେ ଥିବା ଚାଷ ଜମିଗୁଡ଼ିକ ଢିପ ତଥା ପାହାଡ଼ିଆ ହୋଇଥିବାରୁ ପାଣିର ସମସ୍ୟା ଲାଗି ରହୁଥିଲା। ସରକାରୀ ସହାୟତାରୁ ବର୍ତ୍ତମାନ ଉଭୟ ରବି ଓ ଖରିଫ ଋତୁରେ ଜଳ ସମସ୍ୟା ଦୂର ହୋଇଛି। ଉଠା ଜଳସେଚନ ଏବଂ କୃଷି ଅଧିକାରୀ ମନୋରଞ୍ଜନ ମଣ୍ଡଳ କହିଛନ୍ତି, ସରକାରଙ୍କ ପକ୍ଷରୁ ଚାଷୀ କିପରି ଚାଷରେ ଦୁଇ ଗୁଣା ଲାଭ ପାଇପାରିବେ ସେଥିପ୍ରତି ଗୁରୁତ୍ୱ ଦିଆଯାଉଛି। ଉଠା ଜଳସେଚନ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ରମେଶ ଚନ୍ଦ୍ର ନାଏକଙ୍କ କହିବା ଅନୁଯାୟୀ, ଚାଷୀଙ୍କ ସୁବିଧା ପାଇଁ ଗୋଧୂଳି ଗ୍ରାମରେ ୫ଟି ଉଠା ଜଳସେଚନ ପ୍ରକଳ୍ପ ବୈତରଣୀ ନଦୀ ଉପରେ କରାଯାଇଛି। ଚାଷୀ ଏହି ଜଳ ବ୍ୟବହାର କରି ଉଭୟ ରବି ଓ ଖରିଫ ଋତୁରେ ଚାଷ କାର୍ଯ୍ୟ ସମାପନ କରିପାରୁଛନ୍ତି।
