ନୂଆଦିଲ୍ଲୀ,୯।୯: ଦେଶର ପ୍ରମୁଖ ଘରୋଇ ଟେଲିକମ୍ ସେବା ପ୍ରଦାନକାରୀ ସଂସ୍ଥା ଭୋଡାଫୋନ-ଆଇଡିଆ ଗତ କିଛି ବର୍ଷ ହେବ ବ୍ୟବସାୟିକ ହ୍ରାସ ଯୋଗୁ ମାନ୍ଦାବସ୍ଥା ଦେଇ ଗତି କରୁଛି। ଏପରିକି ଋଣଗ୍ରସ୍ତ ଭୋଡାଫୋନ-ଆଇଡିଆ ଲିମିଟେଡ୍ (ଭିଆଇଏଲ୍)ର ଅଂଶଧନ ସରକାର ହାସଲ କରିବେ ବୋଲି ସୂଚନା ମିଳିଛି। ବିଶେଷକରି କମ୍ପାନୀର ଷ୍ଟକ୍ ମୂଲ୍ୟ ୧୦ଟଙ୍କା କିମ୍ବା ତା’ଠାରୁ ଅଧିକରେ ସ୍ଥିର ହେବା ପରେ ଏହି କାରବାର (ଅଧିଗ୍ରହଣ) ହେବ ବୋଲି ସରକାରୀ ସୂତ୍ରରୁ ଜଣାପଡ଼ିଛି। ସେହିଭଳି ଭିଆଇଏଲ୍ ବୋର୍ଡ ପକ୍ଷରୁ ମଧ୍ୟ ଶେୟାର ପିଛା ୧୦ଟଙ୍କା ମୂଲ୍ୟରେ ସରକାରଙ୍କୁ ଏକ ଅଂଶ ପ୍ରଦାନ କରିଛି। ସେହିଭଳି ବଜାର ନିୟାମକ ସେବିର ନିୟମାବଳୀ ଅନୁସାରେ ଅଂଶ ବା ଶେୟାର ଅଧିଗ୍ରହଣ ସମାନ ମୂଲ୍ୟରେ ହିଁ ହେବା ଜରୁରୀ। ଭିଆଇଏଲ୍ର ଶେୟାର ମୂଲ୍ୟ ୧୦ ଟଙ୍କା ପାଖାପାଖିରେ ସ୍ଥିର ହେବା ପରେ ଡିଓଟି ବା ଦୂରସଞ୍ଚାର ବିଭାଗ ଏହାର ଅଂଶଧନକୁ ଅଧିଗ୍ରହଣ କରିବା ପାଇଁ ମଞ୍ଜୁରୀ ପ୍ରଦାନ କରିବ। ସେହିପରି ଭିଆଇଏଲ୍ର ଶେୟାର ୧୯ ଅଗଷ୍ଟରୁ ହିଁ ୧୦ ଟଙ୍କା ତଳେ କାରବାର ହେଉଛି। ଅପରପକ୍ଷରେ ଗୁରୁବାର ବମ୍ବେ ଷ୍ଟକ୍ ଏକ୍ସଚେଞ୍ଜ (ବିଏସ୍ଇ) ରେ ଏହାର ଶେୟାର ୧.୦୨% ହ୍ରାସ ସହ ୯.୬୮ ଟଙ୍କାରେ ବନ୍ଦ ହୋଇଥିଲା। ବର୍ତ୍ତମାନ ସମୟରେ ଉକ୍ତ କମ୍ପାନୀର ୧୬ ହଜାର କୋଟି ଟଙ୍କା ସରକାରଙ୍କୁ ଦେୟ ରହିଛି। ଏହି ଦେୟ ବଦଳରେ ଏହାର ନିର୍ଦ୍ଦେଶକ ବୋର୍ଡ ସରକାରଙ୍କୁ ପ୍ରତି ଶେୟାର ୧୦ ଟଙ୍କାରେ ପ୍ରଦାନ କରିବାକୁ ପ୍ରସ୍ତାବ ଦେଇଛନ୍ତି। ଜୁଲାଇରେ ଅର୍ଥ ମନ୍ତ୍ରଣାଳୟ କମ୍ପାନୀର ଅଂଶଧନ ହାସଲ କରିବା ପ୍ରସ୍ତାବକୁ ଅନୁମୋଦନ କରିଥିଲା। ଋଣଗ୍ରସ୍ତ ଭିଆଇଏଲ୍ ସରକାରଙ୍କୁ ପ୍ରଦାନ କରାଯିବାକୁ ଥିବା ପ୍ରାୟ ୧୬,୦୦୦ କୋଟି ଟଙ୍କା ସୁଧ ଦାୟିତ୍ୱକୁ ଇକ୍ୱିଟିରେ ରୂପାନ୍ତର କରିବାକୁ ନିଷ୍ପତ୍ତି ନେଇଛି, ଯାହା କମ୍ପାନୀର ପ୍ରାୟ ୩୩% ଅଂଶଧନ ହେବ ଏବଂ ପ୍ରମୋଟରଙ୍କ ହୋଲ୍ଡିଂ ୭୪.୯୯% ରୁ ହ୍ରାସ ପାଇ ୫୦% ପର୍ଯ୍ୟନ୍ତ ରହିବ। କମ୍ପାନୀର ମୋଟ ଋଣ, ଲିଜ୍ ଦାୟିତ୍ୱକୁ ବାଦ୍ ଦେଇ ସୁଧକୁ ଅନ୍ତର୍ଭୁକ୍ତ କରି କିନ୍ତୁ ଧାର୍ଯ୍ୟ ହୋଇ ନ ଥିଲା।
