ନୂଆଦିଲ୍ଲୀ,୨୨।୬: ନିଜ କ୍ୟାରିୟର ପରେ ଜୀବନରେ ଅନ୍ୟ କୌଣସି ଜିନିଷରେ ସଉକ ରଖିବା ଭଲ କଥା। ଏବେ ସରକାର ମଧ୍ୟ ସମାନ କଥା କହୁଛନ୍ତି। କାରଣ ସରକାର ଆପଣଙ୍କର ସଉକରୁ ହିଁ ଅତିରିକ୍ତ ଆୟ କରୁଛନ୍ତି । ଏହି ପରିମାଣ ମଧ୍ୟ ଅଳ୍ପ ନୁହେଁ। ସରକାର ଏଥିରୁ ୭୦,୦୦୦କୋଟି ଟଙ୍କା ଆୟ କରୁଛନ୍ତି। ଅର୍ଥନୀତିର ଭାଷାରେ କହିଲେ, ସରକାର ଆପଣଙ୍କର ‘ହବି’ରୁ ଅତିରିକ୍ତ ଟ୍ୟାକ୍ସ ଉପାର୍ଜନ କରୁଛନ୍ତି। ଯାହାକୁ ସିନ ଟ୍ୟାକ୍ସ କୁହାଯାଏ।
ସାଧାରଣତଃ ପାନ ମସଲା, ମଦ, ସିଗାରେଟ, କୋଲ୍ଡ ଡ୍ରିଙ୍କ୍ସ, ମହଙ୍ଗା ପରଫ୍ୟୁମ, ଆମଦାନୀ ସାମଗ୍ରୀ ଏବଂ ଯାନ ଉପରେ ସିନ ଟ୍ୟାକ୍ସ ଆଦାୟ କରୁଛନ୍ତି। ଏହା ଏକ ପ୍ରକାର ଆପଣଙ୍କ ‘ବିଳାସବ୍ୟସନ’ ବା ଲଗଜରୀ ଉପରେ ଲାଗୁଥିବା ଟ୍ୟାକ୍ସ ଅଟେ। ଯଦିଓ ସିନ୍ର ଅର୍ଥ ହେଉଛି ପାପ। ଏପରି ପରିସ୍ଥିତିରେ, ଏହି ଜିନିଷଗୁଡ଼ିକରେ ନିଜ ଟଙ୍କା ଖର୍ଚ୍ଚ କରିବା ପ୍ରକୃତରେ ଏକ ’ପାପ’ କି ନୁହେଁ ତାହା ବ୍ୟକ୍ତି ଉପରେ ନିର୍ଭର କରେ। ସରକାର ଏହାକୁ ବିଳାସପୂର୍ଣ୍ଣ ଟ୍ୟାକ୍ସ ପରି ସଂଗ୍ରହ କରନ୍ତି।
ଯେତେବେଳେ ଜୁଲାଇ ୨୦୧୭ରେ ଦେଶରେ ଜିଏସଟି ବ୍ୟବସ୍ଥା ଆରମ୍ଭ ହୋଇଥିଲା, ସେତେବେଳେ ସର୍ବାଧିକ ଟ୍ୟାକ୍ସ ସ୍ଲାବକୁ ୨୮ ପ୍ରତିଶତରେ ରଖାଯାଇଥିଲା। କିନ୍ତୁ ବିଳାସପୂର୍ଣ୍ଣ ଦ୍ରବ୍ୟ ପାଇଁ ୧୫ ପ୍ରତିଶତ ପର୍ଯ୍ୟନ୍ତ ପୃଥକ ଲାଗୁ କରାଯାଇଥିଲା। ଏହା ଲାଗୁ କରିବାର ଉଦ୍ଦେଶ୍ୟ ଥିଲା ଯେ ଏହି ଆଇଟମରୁ ଆସୁଥିବା ଅର୍ଥ ରାଜ୍ୟଗୁଡିକର ରାଜସ୍ବ କ୍ଷତି ପୂରଣ କରିବ, ଯାହା ଜିଏସଟି ଲାଗୁ ହେତୁ ଘଟିପାରେ। ବର୍ତ୍ତମାନ ଏହି ଟ୍ୟାକ୍ସ ସରକାରଙ୍କ ପାଇଁ ସୁନା ଅଣ୍ଡା ପାଲଟିଛି। ଏହି ଖର୍ଚ୍ଚ ସରକାରଙ୍କୁ ୭୦ହଜାର କୋଟିର ଲାଭ ଦେଇଛି।
