ବମ୍ବେ: ଅଭିନୟ ହେଉ ଅଥବା ନୃତ୍ୟ, ସବୁଥିରେ ପାରଦର୍ଶିତା ଲାଭ କରିଥିଲେ ବଲିଉଡ୍ ଅଭିନେତା ଗୋବିନ୍ଦା। ଖାସ୍ ଏଥିପାଇଁ ଦର୍ଶକଙ୍କ ଭଲପାଇବା ତାଙ୍କୁ ଭରପୂର ମିଳୁଥିଲା। ୧୯୮୬ରେ ସେ ଫିଲ୍ମ ‘ଇଲ୍ଜାମ’ରୁ ଡେବ୍ୟୁ କରିଥିଲେ। ଏହାପରେ ସେ ‘ଆଣ୍ଟି ନମ୍ବର ଓ୍ବାନ୍’, ‘କୁଲି ନମ୍ବର ଓ୍ବାନ୍’, ‘ହିରୋ ନମ୍ବର ଓ୍ବାନ୍’, ‘ରାଜା ବାବୁ’, ‘ହସିନା ମାନ ଜାଏଗୀ’ ଭଳି ସୁପରହିଟ୍ ଫିଲ୍ମ କରିଥିଲେ। ଏବେ ସିନେମାରେ ସେତେଟା ସକ୍ରିୟ ନ ଥିଲେ ବି ବିଳାସପୂର୍ଣ୍ଣ ଜୀବନ ଜିଇଁ ଆସୁଛନ୍ତି ଗୋବିନ୍ଦା। ଟଙ୍କା ପଇସାର ତାଙ୍କ ପାଖରେ କୌଣସି ଅଭାବ ନାହିଁ। ଗୋବିନ୍ଦାଙ୍କ ପାଖରେ ମୁମ୍ବାଇ ଏବଂ ଏହାର ଆଖପାଖ ଅଞ୍ଚଳରେ ୩ ବଙ୍ଗଳା ରହିଛି। ହେଲେ ଜୁହୁରେ ଥିବା ଘରେ ସେ ତାଙ୍କ ପରିବାର ସହ ରୁହନ୍ତି।
ନବେ ଦଶକରେ ସବୁଠାରୁ ଅଧିକ ପସନ୍ଦ କରାଯାଉଥିବା କଳାକାର ଥିଲେ ଗୋବିନ୍ଦା। ଏବେ ସେ ଫିଲ୍ମରୁ ଦୂରେଇ ଯାଇଛନ୍ତି ସତ ହେଲେ ବିଜ୍ଞାପନରେ ନଜର ଆସୁଛନ୍ତି। ଏହାଛଡ଼ା ସେ ରିଅଲ ଇଷ୍ଟେଟ୍ ବ୍ୟବସାୟରେ ନିବେଶ କରିଛନ୍ତି। ଏପରି ଭାବେ ସେ ବାର୍ଷିକ ୧୬ କୋଟି ଟଙ୍କା ରୋଜଗାର କରୁଛନ୍ତି। ଗୋବିନ୍ଦାଙ୍କ ପାଖରେ ଏବେ ୧୫୧.୨୮ କୋଟି ଟଙ୍କାର ସମ୍ପତ୍ତି ରହିଛି।
