ନୂଆଦିଲ୍ଲୀ,୬।୧: ବର୍ତ୍ତମାନ ସମୟରେ ଉଭୟ କେନ୍ଦ୍ର ଓ ରାଜ୍ୟ ସରକାର ବୈଦ୍ୟୁତିକ ଯାନ ( ଇଲେକଟ୍ରିକ ଭେହିକିଲ ବା ଇଭି) ର ବ୍ୟବହାରକୁ ଗୁରୁତ୍ୱ ଦେଉଛନ୍ତି। ଏପରିକି ଇଭି ଯାନ କ୍ରୟ କରୁଥିବା କ୍ରେତାଙ୍କୁ ସରକାରୀ ଆର୍ଥିକ ସହାୟତା ଯୋଗାଇ ଦେଇଛନ୍ତି। ଏହି ପରିପ୍ରେକ୍ଷୀରେ ଇଭି ଶିଳ୍ପର ବିକାଶ ଓ ଚାହିଦା ବୃଦ୍ଧି ପାଇଁ କେନ୍ଦ୍ର ସରକାର ଇଭି ଚାର୍ଜିଂ ଷ୍ଟେଶନ ଭିତ୍ତିଭୂମିର ବିକାଶ ଓ ସର୍ବସାଧାରଣ ବ୍ୟବହାର କେନ୍ଦ୍ର ସ୍ଥାପନ ପାଇଁ ପ୍ରାୟ ୮୦%ର ସହାୟତା ରାଶି ପ୍ରଧାନମନ୍ତ୍ରୀ ଇଲେକ୍ଟ୍ରି ଡ୍ରାଇଭ ରିଭ୍ୟୁଲେଶନ ଇନ୍ ଇନୋଭେଟିଭ ଭେହିକିଲ ଏନହାନ୍ସମେଣ୍ଟ (ପିଏମଇ ଡ୍ରାଇଭ) ସ୍କିମ୍ ଅଧୀନରେ ହିତାଧିକାରୀଙ୍କୁ ଯୋଗାଇ ଦେଉଛନ୍ତି। ସେହିଭଳି ସାରା ଦେଶରେ ଇଭି ଚାର୍ଜିଂ ଷ୍ଟେଶନ ଭିତ୍ତିଭୂମିର ବିକାଶ ଓ ସର୍ବସାଧାରଣ ବ୍ୟବହାର କେନ୍ଦ୍ର ସ୍ଥାପନ ପାଇଁ ସରକାର ୨୦୦୦ କୋଟି ଟଙ୍କା ପିଏମ ଇଡ୍ରାଇଭ ଯୋଜନା ଅଧୀନରେ ହିତାଧିକାରୀଙ୍କୁ ଯୋଗାଇ ଦେଉଥିଲାବେଳେ ଇଭି କ୍ଷେତ୍ରରେ ବୈପ୍ଳବିକ ପରିବର୍ତ୍ତନ ଆଣିବା ସହ ସବୁ ସ୍ତର ଓ ବର୍ଗର ଲୋକଙ୍କୁ ଶିଳ୍ପ ପରିସର ମଧ୍ୟକୁ ଆଣିବା ପାଇଁ ଉଭୟ ଶିଳ୍ପସଂସ୍ଥା ଓ ସରକାର ପ୍ରୟାସ କରୁଛନ୍ତି। ସେହିପରି ବର୍ତ୍ତମାନ ସୁଦ୍ଧା ସରକାର ୪୮,୪୦୦ ଇଭି ଫାଷ୍ଟ ଚାର୍ଜିଂ ଷ୍ଟେଶନ ସ୍ଥାପନ ପାଇଁ ଆର୍ଥିକ ସହାୟତା ଯୋଗାଇ ଦେଇଛନ୍ତି। ଏପରିକି ଦୁଇ ଚକିଆ ଇଭି ଯାନ ପାଇଁ ୫୮୧ କୋଟି ଟଙ୍କାର ସହାୟତା ଦିଆଯାଇଥିଲାବେଳେ ଚାରି ଚକିଆ ଇଭି ଯାନ ପାଇଁ ମୋଟ ୨୨,୧୦୦ ଷ୍ଟେଶନ ସ୍ଥାପନ ପାଇଁ ୧୦୬୧କୋଟି ଆର୍ଥିକ ସହାୟତା ଦିଆଯାଇଛି।
