ମୁମ୍ବାଇ,୧୩।୧୦ : ମହାରାଷ୍ଟ୍ରରେ କୃଷକ ଆତ୍ମହତ୍ୟା ସଂଖ୍ୟା ଚିନ୍ତା ବଢ଼ାଇବାରେ ଲାଗିଛି। ଏକ ରିପୋର୍ଟରୁ ପ୍ରକାଶ ଯେ, ଚଳିତ ୨୦୨୨ ବର୍ଷ ଜାନୁୟାରୀରୁ ଅଗଷ୍ଟ ମଧ୍ୟରେ ୧୮୭୫ କୃଷକ ଋଣ ଏବଂ ସରକାରଙ୍କ ଉଦାସୀନତା କାରଣରୁ ଜୀବନ ଶେଷ କରିଛନ୍ତି। ଗୋଟିଏ ପଟେ ରାଜ୍ୟରେ ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ଏବଂ ଉଦ୍ଧବ ଠାକରେ ନିଜ ନିଜର ରାଜନୈତିକ ପରିଚିତି ନେଇ ବିବାଦରେ ଲାଗି ରହିଛନ୍ତି।
ଅନ୍ୟପଟେ କୃଷକଙ୍କ ସମସ୍ୟା ବଢ଼ିବା ଯୋଗୁ କୌଣସି ଉପାୟ ନ ପାଇ ସେମାନେ ଆତ୍ମହତ୍ୟା ପଥକୁ ବାଛି ନେଉଛନ୍ତି। ପରିସଂଖ୍ୟାନ ଦର୍ଶାଉଛି ଯେ ଏହି ସମୟ ମଧ୍ୟରେ ଅଧିକାଂଶ କୃଷକ ଅମରାବତୀରେ ଆତ୍ମହତ୍ୟା କରିଛନ୍ତି। ବିଶେଷ କଥା ହେଉଛି ଉଦ୍ଧବ ସରକାରଙ୍କ କ୍ଷମତାଚ୍ୟୁତ ପରେ ଜୁନ ମାସରେ ଭାରତୀୟ ଜନତା ପାର୍ଟି ଏବଂ ଏକନାଥ ଶିନ୍ଦେଙ୍କ ସମର୍ଥକ ସରକାର ଗଠନ କରିଥିଲେ।
ରାଜ୍ୟ ରିଲିଫ ଏବଂ ପୁନର୍ବାସ ବିଭାଗର ତଥ୍ୟରୁ ଜଣାପଡିଛି ଯେ ୮ ମାସ ମଧ୍ୟରେ ୧୮୭୫ କୃଷକ ଆତ୍ମହତ୍ୟା କରିଛନ୍ତି। ୨୦୨୧ ମସିହାରେ ଏହି ସମୟ ମଧ୍ୟରେ ୧୬୦୫ କୃଷକ ଆତ୍ମହତ୍ୟା କରିଥିଲେ। ବିଶେଷ କଥା ହେଉଛି ଉଦ୍ଧବଙ୍କ ଏମଭିଏ ସରକାରଙ୍କ ଦ୍ୱାରା ଋଣ ଛାଡ ଘୋଷଣା ଏବଂ ମୁଖ୍ୟମନ୍ତ୍ରୀ ଶିନ୍ଦେ ଦେଇଥିବା ପ୍ରତିଶ୍ରୁତି ପରେ ମଧ୍ୟ ଆତ୍ମହତ୍ୟା ସଂଖ୍ୟା ବୃଦ୍ଧି ପାଉଛି।
ମହାରାଷ୍ଟ୍ରରେ କୃଷକ ଆତ୍ମହତ୍ୟା ପଛର କାରଣ ଜାଣିବା ପାଇଁ ଅନେକ ସଂଗଠନ ଏବଂ ସରକାରୀ ଏଜେନ୍ସି ସୂଚନା ସଂଗ୍ରହ କରୁଛନ୍ତି। ଏହା ଜଣାପଡିଛି ଯେ ଉତ୍ପାଦର ସଠିକ ମୂଲ୍ୟ ନ ପାଇବା, ପରିବାରର ଚାପ ଏବଂ ଦାୟିତ୍ୱ, ସରକାରଙ୍କ ଉଦାସୀନତା, ଉପଯୁକ୍ତ ଜଳସେଚନ ବ୍ୟବସ୍ଥାର ଅଭାବ, ଋଣ ପ୍ରଦାନରେ ଦୁର୍ନୀତି, ସବସିଡି ଏବଂ ପାଣିପାଗ ପରିସ୍ଥିତି ଆଦି ଏହାର ଅନେକ ମୁଖ୍ୟ କାରଣ ରହିଛି।
ରାଜ୍ୟର ଅମରାବତୀରେ ୨୦୨୨ ମସିହାରେ ସର୍ବାଧିକ ୭୨୫ କୃଷକଙ୍କ ମୃତ୍ୟୁ ଘଟିଛି। ଯେତେବେଳେ କି, ୨୦୨୧ ରେ ଏହି ସଂଖ୍ୟା ୬୬୨ ଥିଲା । ଏହା ପରେ ଔରଙ୍ଗାବାଦରେ ଏହି ସଂଖ୍ୟା ୫୩୨ ରୁ ୬୬୧ କୁ ବୃଦ୍ଧି ପାଇଛି। ଗତ ବର୍ଷ ନାସିକରେ ୨୦୧ ମୃତ୍ୟୁ ତୁଳନାରେ ୨୫୨ କୃଷକ ଏଥର ଆତ୍ମହତ୍ୟା କରିଛନ୍ତି। ନାଗପୁରରେ ଏହି ସଂଖ୍ୟା ୨୦୨୧ ରେ ୧୯୯ରୁ ୨୦୨୨ରେ ୨୨୫ କୁ ବୃଦ୍ଧି ପାଇଛି। ଭଲ ଖବର ହେଉଛି ଗତ ଦୁଇ ବର୍ଷ ମଧ୍ୟରେ କୋଙ୍କଣ ଅଞ୍ଚଳରେ କୌଣସି କୃଷକ ଆତ୍ମହତ୍ୟା କରିବାର ପଦକ୍ଷେପ ନେଇ ନାହାଁନ୍ତି।
ଚଳିତବର୍ଷଜାନୁଆରୀରୁ ଅଗଷ୍ଟ ମଧ୍ୟରେ ଆତ୍ମହତ୍ୟା କରିଥିବା ୧୮୭୫ କୃଷକଙ୍କ ମଧ୍ୟରୁ ୯୮୧ କୃଷକ ସରକାରୀ ନିୟମ ଅନୁଯାୟୀ ଆର୍ଥିକ ସହାୟତା ପାଇବାକୁ ଯୋଗ୍ୟ ହୋଇଥିଲେ। ଯେତେବେଳେ କି, ୪୩୯ଙ୍କୁ ଅଯୋଗ୍ୟ ବୋଲି ବିବେଚନା କରାଯାଇଥିଲା। ଏଥି ସହିତ,୪୫୫ କୃଷକଙ୍କ ବିରୋଧରେ ଯାଞ୍ଚ ମାମଲାର ତଦନ୍ତ ଚାଲିଥିଲା। ବର୍ତ୍ତମାନ ବିଭାଗ ପକ୍ଷରୁ ମୃତକଙ୍କ ସମ୍ପର୍କୀୟଙ୍କୁ ୧ ଲକ୍ଷ ଟଙ୍କାର ଅନୁକମ୍ପାମୂଳକ ସହାୟତା ପ୍ରଦାନ କରାଯାଉଛି।
