ଭୁବନେଶ୍ୱର,୧୩।୨(ଅନୁରାଧା ମହାରଣା):ଗତ ପାର୍ବଣ ମହୋତ୍ସବରେ ଲୋକପ୍ରିୟ ଓଡ଼ିଆ ମନୋରଞ୍ଜନ ଚ୍ୟାନେଲ ଜୀ-ସାର୍ଥକରେ ‘ପାର୍ବଣରେ ସୁନାର ବର୍ଷା’ ପ୍ରତିଯୋଗିତା ହୋଇଥିଲା। ଲାଲ୍ଚାନ୍ଦ ଜୁଏଲର୍ସ ପ୍ରାୟୋଜିତ ଏହି ମେଗା ପ୍ରତିଯୋଗିତା ଅକ୍ଟୋବର ୫ରୁ ନଭେମ୍ବର ୨୦ ତାରିଖ ମଧ୍ୟରେ ଅନୁଷ୍ଠିତ ହୋଇଥିଲା। ସା ୬.୩୦ରୁ ରାତି ୯.୩୦ ମଧ୍ୟରେ ପ୍ରସାରିତ ଧାରାବାହିକ ଦେଖୁଥିବା ସମୟରେ ଟିଭି ସ୍କ୍ରିନରେ ପଚରାଯାଇଥିବା ପ୍ରଶ୍ନର ପ୍ରତିଦିନ ଠିକ୍ ଉତ୍ତର ଦେଇଥିବା ୪୦ଜଣ ଭାଗ୍ୟଶାଳୀ ବିଜେତାଙ୍କୁ ଲାଲଚାନ୍ଦ ଜୁଏଲର୍ସ ପକ୍ଷରୁ ପ୍ରତ୍ୟେକଙ୍କୁ ୧ ଗ୍ରାମ୍ ଓଜନର ସ୍ବର୍ଣ୍ଣମୁଦ୍ରା ମିଳିଛି। ଏଥିସହ ଜଣେ ମେଗା ବିଜେତାଙ୍କୁ ୨୦ ଗ୍ରାମ ଓଜନର ସ୍ବର୍ଣ୍ଣମୁଦ୍ରା ଉପହାର ଦିଆଯାଇଛି। ସୋମବାର ସ୍ଥାନୀୟ ଏକ ହୋଟେଲରେ ଆୟୋଜିତ ସ୍ବତନ୍ତ୍ର କାର୍ଯ୍ୟକ୍ରମରେ ଏହି ଉପହାର ପ୍ରଦାନ କରାଯାଇଛି l
ଜଗତ୍ସିଂପୁରର ଲଲାଟ କିଶୋର ସ୍ବାଇଁ ମେଗା ବିଜେତା ହୋଇ ୨୦ ଗ୍ରାମର ସ୍ବର୍ଣ୍ଣମୁଦ୍ରା ଉପହାର ପାଇଛନ୍ତି। ଉତ୍ସବରେ ଜୀ ସାର୍ଥକ ଚ୍ୟାନେଲ ହେଡ୍ ପ୍ରତୀକ ସିଲ୍ଙ୍କ ସମେତ ଲାଲଚାନ୍ଦ ଜୁଏଲର୍ସର ଡାଇରେକ୍ଟର ଅଜିତ ହଂସ, ସାଇନାଥ ପଣ୍ଡା ଏବଂ ବରିଷ୍ଠ ଅଧିକାରୀ ଉପସ୍ଥିତ ଥିଲେ l ମନୋରଞ୍ଜନ ସହ ପରିବାର ଦାୟିତ୍ୱ ମଧ୍ୟରେ ସବୁବେଳେ ଛନ୍ଦିହୋଇ ରହୁଥିବା ମହିଳାମାନଙ୍କ ଆମତ୍ବିଶ୍ୱାସ ବଢ଼ାଇବାରେ ଏପରି ପ୍ରତିଯୋଗିତା ଏକ ମାଧ୍ୟମ ହେବ ବୋଲି ପ୍ରତୀକ ସିଲ୍ ମତ ଦେଇଥିଲେ ।
