ଭୁବନେଶ୍ୱର, ୧୧।୩: ବର୍ତମାନ ଦେଶରେ ବାହାଘର ସିଜିନ ଚାଲିଥିଲା ବେଳେ ସୁନା ଦର ହୁ ହୁ ହୋଇ ବୃଦ୍ଧି ପାଇବାରେ ଲାଗିଛି। ଏଥି ସହିତ ଭାରତରେ ସୁନାର ମୂଲ୍ୟ ଐତିହାସିକ ସ୍ତରରେ ପହଞ୍ଚିଛି। ବଜାରରେ ଜୋରଦାର କ୍ରୟ ହେତୁ ସୁନା ମୂଲ୍ୟ ୧୦ ଗ୍ରାମ ପିଛା ୬୭,୦୦୦ ଟଙ୍କା ଅତିକ୍ରମ କରିଛି। ଅନ୍ତର୍ଜାତୀୟ ବଜାରରେ ମଧ୍ୟ ସୁନା ରେକର୍ଡ ଉଚ୍ଚରେ ପହଞ୍ଚିଛି। ଆନ୍ତର୍ଜାତୀୟ ବଜାରରେ ସୁନା ଐତିହାସିକ ଉଚ୍ଚରେ ୨୧୭୨ ଡଲାରରେ କାରବାର କରୁଛି, ଯେଉଁ କାରଣରୁ ଘରୋଇ ବଜାରରେ ମଧ୍ୟ ସୁନା ଦର ବୃଦ୍ଧି ପାଇଛି।
ଗତ ୧୮ ଦିନ ମଧ୍ୟରେ ସୁନା ମୂଲ୍ୟରେ ଅନେକ ବୃଦ୍ଧି ପାଇଲାଣି। ଫେବୃଆରୀ ୨୦୨୪ ର ଚତୁର୍ଥ ସପ୍ତାହରେ ସୁନା ପ୍ରାୟ ୬୨,୦୦୦ ଟଙ୍କା କାରବାର କରିଥିଲା। କିନ୍ତୁ ସେହି ସ୍ତରରୁ, ବଜାରରେ ସୁନା ମୂଲ୍ୟ ୧୦ ଗ୍ରାମ ପିଛା ୫୦୦୦ ଟଙ୍କା ବୃଦ୍ଧି ପାଇଛି ଏବଂ ବର୍ତ୍ତମାନ ଏହାର ମୂଲ୍ୟ ୬୭,୦୦୦ ରୁ ଅଧିକ ହୋଇଛି। ଚେନ୍ନାଇରେ ସୁନା ମୂଲ୍ୟ ୬୭,୦୦୦ ରୁ ଅଧିକ ହୋଇଥିବାବେଳେ ଦିଲ୍ଲୀରେ ୧୦ ଗ୍ରାମ ପିଛା ମୂଲ୍ୟ ୬୬୪୧୦ ଟଙ୍କା ରହିଛି।
ବଜାର ବିଶେଷଜ୍ଞମାନଙ୍କ କହିବା ଅନୁଯାୟୀ ନିକଟ ଅତୀତରେ ବିଶ୍ୱର କେନ୍ଦ୍ରୀୟ ବ୍ୟାଙ୍କଗୁଡିକ ସ୍ଥାନୀୟ ମୁଦ୍ରାକୁ ସୁଦୃଢ କରିବା ପାଇଁ ସୁନା କିଣୁଛନ୍ତି। କେନ୍ଦ୍ରୀୟ ବ୍ୟାଙ୍କଗୁଡିକ କ୍ରୟ ଯୋଗୁଁ ଚାହିଦା ବୃଦ୍ଧି ପାଇଛି ଯାହା ସୁନା ଦର ବୃଦ୍ଧି କରୁଛି। ଏହା ଉପରେ, ଆମେରିକାର ସେଣ୍ଟ୍ରାଲ ବ୍ୟାଙ୍କ ସୁଧ ହାର ହ୍ରାସ କରିପାରିବ, ଯାହା ଏହା ପୂର୍ବରୁ ସୂଚିତ କରିସାରିଛି। ସୁଧ ହାର ହ୍ରାସ ହେତୁ ଡଲାର ଶସ୍ତା ହେବ ଯାହା ସୁନାର ମୂଲ୍ୟ ବୃଦ୍ଧି କରିବ। ଏହି ସମ୍ଭାବନା ହେତୁ ସୁନା ଦର ବୃଦ୍ଧି ପାଇବାରେ ଲାଗିଛି। ଫେଡେରାଲ ରିଜର୍ଭ ବ୍ୟାଙ୍କର ଚେୟାରମ୍ୟାନ୍ ଜେରୋମ ପାୱେଲ ଗତ ସପ୍ତାହରେ ପୁନର୍ବାର ସୂଚାଇ ଦେଇଛନ୍ତି ଯେ ଆମେରିକାର ସେଣ୍ଟ୍ରାଲ ବ୍ୟାଙ୍କ ଚଳିତ ବର୍ଷ ସୁଧ ହାର ହ୍ରାସ କରିପାରେ। ସେ କହିଛନ୍ତି ଯେ କେନ୍ଦ୍ରୀୟ ବ୍ୟାଙ୍କର ଉଦ୍ଦେଶ୍ୟ ହେଉଛି ଅଧିକ ନିଯୁକ୍ତି ସୃଷ୍ଟି କରିବା ଏବଂ ଆମେରିକୀୟ ନାଗରିକଙ୍କ ମୂଲ୍ୟରେ ସ୍ଥିରତା ଆଣିବା ଯାହା ଦ୍ୱାରା ଲୋକମାନେ ମୁଦ୍ରାସ୍ଫୀତିରୁ ମୁକ୍ତି ପାଇପାରିବେ।
ତେବେ ସୁନାରେ ଚାଲିଥିବା ବୃଦ୍ଧି ଏଠାରେ ଅଟକି ଯିବ ନାହିଁ, ବରଂ ବଜାର ବିଶେଷଜ୍ଞମାନେ ବିଶ୍ୱାସ କରନ୍ତି ଯେ ୨୦୨୪ ମସିହାରେ ୧୦ ଗ୍ରାମ ପ୍ରତି ସୁନା ଐତିହାସିକ ୭୦,୦୦୦ ଟଙ୍କା ଅତିକ୍ରମ କରିପାରିବ।
