କରୋନା ସଂକ୍ରମଣକୁ ରୋକିବାକୁ ହେଲେ ମାସ୍କ ପିନ୍ଧିବା ଜରୁରୀ। ଲୋକମାନଙ୍କ ଆବଶ୍ୟକତାକୁ ଦୃଷ୍ଟିରେ ରଖି ବଜାରରେ ବିଭିନ୍ନ ପ୍ରକାରର ମାସ୍କ ଉପଲବ୍ଧ ହେଉଛି। ଏବେ ବିବାହ ସମୟ ଚାଲିଥିବାରୁ ବରକନ୍ୟାଙ୍କ ପାଇଁ ସ୍ବତନ୍ତ୍ର ମାସ୍କ କରାଯାଉଛି। ଏହାର ଡିମାଣ୍ଡ ମଧ୍ୟ ବଢ଼ୁଥିବା ଦେଖାଯାଉଛି।
ସେଭଳି ଏକ ଘଟଣାକ୍ରମରେ ପୁଣେର ଏକ ଗହଣା ଦୋକାନୀ ସ୍ବତନ୍ତ୍ର ସୁନାର ମାସ୍କ ତିଆରି କରିଛନ୍ତି। ଏଥିରେ ୧୨୪ ଗ୍ରାମର ସୁନା ବ୍ୟବହାର କରାଯାଇଛି। ମାସ୍କର ଦାମ ରହିଛି ୬.୫ ଲକ୍ଷ ଟଙ୍କା। ଏହାକୁ ଉଭୟ ମାସ୍କ ଏବଂ ହାର ଭାବେ ବ୍ୟବହାର କରିହେବ। ମାସ୍କଟିକୁ ଏନ୍-୯୫ ମାସ୍କ ଉପରେ ଷ୍ଟିଚ୍ କରାଯାଇଛି। ଫଳରେ ଏହା ଚୋକର୍ ଭଳି ଲାଗୁଛି। ଲଗାତାର ୨୫ ଦିନ ପିନ୍ଧିବା ପରେ ଏହାକୁ ଧୋଇ ଆଉ ଥରେ ବ୍ୟବହାର କରିହେବ।
ଗହଣାର ସ୍ବତନ୍ତ୍ରତା ହେଉଛି ଏହାକୁ ବ୍ୟବହାର କରିବା ପରେ ସହଜରେ ଏହାକୁ ବଦଳାଯାଇପାରିବ। ଅଥବା ମାସ୍କ ଖରାପ ହେବା ପରେ ଅନ୍ୟ ମାସ୍କରେ ଏହାକୁ ଲଗାଯାଇପାରିବ। ଏହାକୁ ଡିଜାଇନ୍ କରିବା ପାଇଁ ଦୁଇରୁ ତିନି ସପ୍ତାହ ସମୟ ଲାଗିଛି। ଏବେ ଏହି ମାସ୍କର ଚାହିଦା ବହୁତ ବଢ଼ିଥିବା ଦୋକାନୀ ପ୍ରତିକ୍ରିୟା ରଖିଛନ୍ତି।
