ପାଟଣା,୧୭ା୬(ସ୍ବ.ପ୍ର.): କେନ୍ଦୁଝର ଜିଲା ପାଟଣା ବ୍ଲକ ବୁଢ଼ୀକାପୁଡ଼ି ପଞ୍ଚାୟତ ଅଧୀନ ତେନ୍ତେଳା ଗ୍ରାମରେ ବୁଧବାର ପ୍ରାଣୀ ଓ ମଣିଷ ଭିତରେ ଥିବା ଅନାବିଳ ସମ୍ପର୍କ ଦେଖିବାକୁ ମିଳିଛି। ପୁଅ ଭଳି ପାଳି ଆସିଥିବା ଖାସି ଛେଳି ‘ମାତାଲ’ର ମୃତ୍ୟୁରେ ମ୍ରିୟମାଣ ହେବା ସହ ତା’ର ଅନ୍ତ୍ୟେଷ୍ଟିକ୍ରିୟା କରିଛନ୍ତି ନିଃସନ୍ତାନ ଦମ୍ପତି।
ସୂଚନା ଅନୁଯାୟୀ, ଗ୍ରାମର ଦମ୍ପତି ଧନେଶ୍ୱର ନାଏକ ଓ ସ୍ତ୍ରୀ ମିନତୀଙ୍କ ବିବାହର ୩୦ ବର୍ଷ ବିତି ଯାଇଥିଲେ ମଧ୍ୟ ନିସନ୍ତାନ ଅଛନ୍ତି। ଏ ନେଇ ଅନେକ ଚିନ୍ତାରେ ସେମାନେ କାଳାତିପାତ କରୁଥିବା ବେଳେ ଛେଳି ପାଳନ କରି ଚଳୁଥିଲେ। ସେମାନେ ୩୦ରୁ ଅଧିକ ଛେଳି ରଖିଛନ୍ତି। ସେଥି ମଧ୍ୟରୁ ‘ମାତାଲ’ ଥିଲା ଅନ୍ୟତମ। ସନ୍ତାନ ସନ୍ତତି ନ ଥିବାରୁ ‘ମାତାଲ’କୁ ନିଜର ପୁଅ ଭଳି ଆଦର କରୁଥିଲେ। ୮ ବର୍ଷର ହୋଇଥିବା ‘ମାତାଲ’ ମଣିଷ ଭଳି ସେମାନଙ୍କ ପାଖରେ ଶୁଏ, ଭାତ, ଡାଲି ଓ ତରକାରୀ ଖାଏ। ବୁଧବାର କୋଣସି କାରଣରୁ ‘ମାତାଲ’ର ମୃତ୍ୟୁ ପରେ ଉକ୍ତ ଦମ୍ପତି ସାହି ପଡ଼ିଶାଙ୍କୁ ଡାକି ମଣିଷଙ୍କ ଭଳି ନିଜ ବାଡ଼ିରେ ତା’ର ଶେଷକୃତ୍ୟ ସମ୍ପନ୍ନ କରିଥିଲେ। ବାଉଁଶ କୋକେଇ କରି ସାହି ପଡ଼ିଶା ବନ୍ଧୁବାନ୍ଧବଙ୍କ ଗହଣରେ ଜୁଇରେ ନିଆଁ ଦେଇଥିଲେ। ଏବେ କରୋନା ଭୟରେ ମଣିଷଙ୍କ ଶେଷକୃତ୍ୟ ପାଇଁ ଆତ୍ମୀୟସ୍ବଜନ ଶବ ପାଖ ମାଡ଼ୁ ନ ଥିବା ବେଳେ ଏହି ଦମ୍ପତି ଏକ ଛେଳିକୁ ପୁଅ ଭଳି ସ୍ନେହ ଦେବା ଆଉ ତା’ର ମୃତ୍ୟୁ ପରେ ମଣିଷଙ୍କ ପରି ଶବ ସତ୍କାର କରିବା ଚର୍ଚ୍ଚାର ବିଷୟ ପାଲଟିଛି।