ନୂଆଦିଲ୍ଲୀ, ୫।୧(ପି.ଟି.): କେନ୍ଦ୍ର ସରକାର ଆଣିଥିବା ୩ କୃଷି ଆଇନ ପ୍ରତ୍ୟାହାର ହେବନି। ସେଗୁଡ଼ିକର ପ୍ରତ୍ୟାହାର ଚାହୁଁଥିଲେ ଚାଷୀ ସୁପ୍ରିମକୋର୍ଟ ଯାଆନ୍ତୁ। ସୋମବାର ଆଲୋଚନା ବେଳେ କୃଷିମନ୍ତ୍ରୀ ନରେନ୍ଦ୍ର ସିଂ ତୋମାର ଏଭଳି କହିଥିବା କିଷାନ ମଜଦୁର ସଂଘର୍ଷ କମିଟି ନେତା ସରଓ୍ବାନ ସିଂ ପାନ୍ଧେର ସୂଚନା ଦେଇଛନ୍ତି। ଆଇନ ପ୍ରତ୍ୟାହାର ଦାବିରେ କୃଷକନେତାମାନେ ଅଡ଼ି ବସିଥିବାବେଳେ ସରକାର ଏଥିରେ ରାଜି ନ ହେବାରୁ ସପ୍ତମ ପର୍ଯ୍ୟାୟ ଆଲୋଚନା ମଧ୍ୟ ବିନା ନିଷ୍କର୍ଷରେ ଶେଷ ହୋଇଛି। ଆଇନ ନ ହଟିବା ପର୍ଯ୍ୟନ୍ତ ଆନ୍ଦୋଳନ ପ୍ରତ୍ୟାହାର ହେବନି ବୋଲି କୃଷକ ପ୍ରତିନିଧିମାନେ ରୋକ୍ଠୋକ୍ ଶୁଣାଇଥିଲେ। ଫଳରେ ୮ ତାରିଖରେ ପରବର୍ତ୍ତୀ ପର୍ଯ୍ୟାୟ ଆଲୋଚନା ପାଇଁ ସ୍ଥିର ହୋଇଛି। ସମାଧାନରେ ପହଞ୍ଚତ୍ବା ପାଇଁ ଉଭୟ ପକ୍ଷର ଉଦ୍ୟମ ଆବଶ୍ୟକ ବୋଲି କୃଷିମନ୍ତ୍ରୀ କହିଛନ୍ତି।
ଦିଲ୍ଲୀ ବିଜ୍ଞାନ ଭବନଠାରେ ଅନୁଷ୍ଠିତ ସପ୍ତମ ପର୍ଯ୍ୟାୟ ବୈଠକରେ ସରକାରଙ୍କ ପକ୍ଷରୁ କେନ୍ଦ୍ରମନ୍ତ୍ରୀ ତୋମାର, ପୀୟୂଷ ଗୋୟଲ ଏବଂ ସୋମ ପ୍ରକାଶ ଯୋଗଦେଇଥିବାବେଳେ ଚାଷୀ ସଂଗଠନରୁ ୪୧ ଜଣ ପ୍ରତିନିଧି ଉପସ୍ଥିତ ଥିଲେ। ଦେଶର କୃଷି ସେକ୍ଟରର ଅଭିବୃଦ୍ଧିରେ ନୂଆ ଆଇନ କିଭଳି ସହାୟକ ହେବ ତାହାର ଏକ ତାଲିକା ସରକାରଙ୍କ ପକ୍ଷରୁ ଉପସ୍ଥାପନ କରାଯାଇଥିଲା। ଆଇନର ପ୍ରତି ଧାରା ଉପରେ ଆଲୋଚନା କରିବାକୁ ସରକାର ପ୍ରସ୍ତୁତ। ସେଥିରେ କୌଣସି ଆପତ୍ତିଜନକ ପ୍ରସଙ୍ଗ ଥିଲେ ଜଣାଇବାକୁ ମନ୍ତ୍ରୀମାନେ ଚାଷୀ ପ୍ରତିନିଧିଙ୍କୁ କହିଥିଲେ। ତେବେ ଆଇନ ପ୍ରତ୍ୟାହାର ଦାବିରେ ଚାଷୀ ନେତାମାନେ ଅଟଳ ରହିବାରୁ କୌଣସି ନିଷ୍କର୍ଷ ବାହାରିପାରିଲାନି ବୋଲି ତୋମାର କହିଛନ୍ତି। ଅନ୍ୟପକ୍ଷରେ ସୋମବାର ଆଲୋଚନା ବିଫଳ ହେବା ଲାଗି ଚାଷୀ ନେତାମାନେ ସରକାରଙ୍କୁ ଦୋଷ ଦେଇଛନ୍ତି। ସମାଧାନ ରାସ୍ତାରେ ସରକାରଙ୍କ ଅହଂକାର ପ୍ରତିବନ୍ଧକ ସୃଷ୍ଟି କଲା ବୋଲି ସେମାନେ କହିଛନ୍ତି।
ଫସଲର ସର୍ବନିମ୍ନ ସହାୟକ ମୂଲ୍ୟ (ଏମ୍ଏସ୍ପି) ଉପରେ ଆଇନଗତ ଗ୍ୟାରେଣ୍ଟି ଦାବି ଉପରେ ଆଲୋଚନା ପାଇଁ ସରକାର ପ୍ରସ୍ତାବ ଦେଇଥିଲେ।
କିନ୍ତୁ କୃଷକ ସଂଗଠନଗୁଡ଼ିକ ପ୍ରଥମରୁ ଆଇନ ପ୍ରତ୍ୟାହାର ଦାବି ଉପରେ ଆଲୋଚନା ଚାହିଁଥିଲେ। ଆଇନ ପ୍ରତ୍ୟାହାର ଦାବି ପୂରଣ ନ
ହେଲେ ଜାନୁୟାରୀ ୨୬ ସାଧାରଣତନ୍ତ୍ର ଦିବସରେ ଦିଲ୍ଲୀକୁ ଟ୍ରାକ୍ଟର ରାଲି ହେବ ବୋଲି କୃଷକ ନେତାମାନେ ଚେତାବନୀ ଦେଇଥିଲେ। ଅନ୍ୟପକ୍ଷରେ ତୋମାର କହିଥିଲେ, ଅନ୍ୟ ରାଜ୍ୟଗୁଡ଼ିକର କୃଷକ ସଂଗଠନ ପ୍ରତିନିଧିମାନଙ୍କ ସହ ଆଇନ ଉପରେ ଆଲୋଚନା ହେବ। ଆଇନର ପ୍ରତି ଧାରା ଉପରେ ଆଲୋଚନା ପାଇଁ ଓ କୌଣସି ଆପତ୍ତି ଥିଲେ ତାହାର ଆବଶ୍ୟକ ସଂଶୋଧନ ଲାଗି ସରକାର ପ୍ରସ୍ତୁତ ବୋଲି କୃଷିମନ୍ତ୍ରୀ କହିଥିଲେ।
ଆଲୋଚନା ମଝିରେ ମଧ୍ୟାହ୍ନ ଭୋଜନ ବିରତି ହୋଇଥିଲା। ତେବେ ମନ୍ତ୍ରୀମାନଙ୍କ ସହ ଏକାଠି ଭୋଜନ କରିବାକୁ ଚାଷୀନେତା ମନା କରିଦେଇଥିଲେ। ଆପଣମାନେ ନିଜ ଖାଦ୍ୟ ଖାଆନ୍ତୁ, ଆମେ ଆମ ଖାଦ୍ୟ ଖାଇବୁ ବୋଲି କୃଷକ ପ୍ରତିନିଧିମାନେ କହିଥିଲେ। ଅପରାହ୍ନ ୫ଟା ୧୫ରେ ପୁଣିଥରେ ଆଲୋଚନା ଆରମ୍ଭ ହୋଇଥିଲା। ସମାଧାନର ସୂତ୍ର ନ ବାହାରିବାରୁ ଶୁକ୍ରବାର ପୁଣିଥରେ ବୈଠକ ବସିବାକୁ ସ୍ଥିର ହୋଇଥିଲା। ପରବର୍ତ୍ତୀ କାର୍ଯ୍ୟପନ୍ଥା ପାଇଁ ଚାଷୀ ନେତାମାନେ ମଙ୍ଗଳବାର ପରସ୍ପର ମଧ୍ୟରେ ଆଲୋଚନା କରିବେ ବୋଲି କହିଛନ୍ତି।
ବିବାଦୀୟ କୃଷି ଆଇନ ବିରୋଧରେ ପଞ୍ଜାବ, ହରିୟାଣା, ଉତ୍ତରପ୍ରଦେଶରୁ ହଜାର ହଜାର ଚାଷୀ ୪୦ ଦିନ ହେଲା ଦିଲ୍ଲୀ ସୀମାର ବିଭିନ୍ନ ସ୍ଥାନରେ ଆନ୍ଦୋଳନ ଜାରି ରଖିଛନ୍ତି। ପ୍ରବଳ ଶୀତ, ଏପରିକି ଦୁଇଦିନ ହେଲା ପ୍ରବଳ ବର୍ଷା ସତ୍ତ୍ୱେ ଚାଷୀମାନେ ଆନ୍ଦୋଳନ ସ୍ଥଳ ଛାଡ଼ିନାହାନ୍ତି।
