ଆର. ଉଦୟଗିରି,୩୦ା୧(ଡି.ଏନ୍.ଏ.): ଗଜପତି ଜିଲାର ବିକାଶ କେବଳ କାଗଜ କଲମରେ ହିଁ ପ୍ରଚାର ପ୍ରସାରରେ ଅଟକି ରହିଛି। ଭାରତ ସ୍ବାଧୀନ ହେବାର ଦୀର୍ଘବର୍ଷ ବିତିଲାଣି ହେଲେ ଏଥି ମଧ୍ୟରେ ଅନେକ ନେତା ମନ୍ତ୍ରୀଙ୍କୁ ଅଭିଯୋଗ ଦେଇ ଦେଇ ଜନତା ଥକି ଗଲେଣି କିନ୍ତୁ କାମ କରିବା ନଁାରେ ଖାଲି ମିଥ୍ୟା ପ୍ରତିଶ୍ରୁତି ହିଁ ମିଳୁଛି। ମୋହନା ବ୍ଲକ ଅନ୍ତର୍ଗତ ଶିକୁଳିପଦର ପଞ୍ଚାୟତର ବାଦପୁର ଗ୍ରାମ। ପଞ୍ଚାୟତଠାରୁ ମାତ୍ର ୭କିମି ଦୂର ୱାର୍ଡ ନଂ. ୨ ଓ ୱାର୍ଡ ନଂ. ୩। ଏହି ଦୁଇଟି ୱାର୍ଡ ଗୋଟିଏ ଗ୍ରାମରେ। ପରିବାର ସଂଖ୍ୟା ୧ ହଜାର ଥିବାବେଳେ ଭୋଟର ସଂଖ୍ୟା ରହିଛନ୍ତି ୧୫ ଶହରୁ ଊଦ୍ଧର୍ବ। ଲୋକ ସଂଖ୍ୟା ୨ ହଜାରରୁ ଊଦ୍ଧର୍ବ। ହେଲେ ଗ୍ରାମକୁ ଯିବା ପାଇଁ ଭଲ ରାସ୍ତା ଖଣ୍ଡେ ନାହିଁ। ବର୍ଷା ଦିନେ ଗ୍ରାମ ରାସ୍ତା କାଦୁଅ। ଗ୍ରାମକୁ ଗାଡ଼ି ଯିବା ମୁସ୍କିଲ । ବର୍ଷା ହେଲେ ପିଲାଙ୍କ ପାଠ ପଢ଼ା ବନ୍ଦ। କୌଣସି ଗର୍ଭବତୀ ମା’ଙ୍କୁ ସ୍ବାସ୍ଥ୍ୟକେନ୍ଦ୍ରକୁ ନେବାକୁ ହେଲେ ଆମ୍ବୁଲାନ୍ସ ଗ୍ରାମକୁ ପହଞ୍ଚତ୍ ପାରୁନି। ଯାହାଦ୍ୱାରା ଲୋକେ ଦୋଳାରେ ୧ କିମି ଚାଲି ଚାଲି ଯିବା ପରେ ଆମ୍ବୁଲାନ୍ସ ସେବା ମିଳିଥାଏ। ସେହିପରି ଗ୍ରାମରେ ଦୁଇଟି ଅଙ୍ଗନଓ୍ବାଡି କେନ୍ଦ୍ର ରହିଥିବା ବେଳେ ଦୁଇଟି ଯାକ ଅଙ୍ଗନଓ୍ବାଡି ଗୃହ ଅଧାଗଢ଼ା ହୋଇ ପଡି ରହିଛି। ଅଙ୍ଗନଓ୍ବାଡି ଦିଦି ପିଲାଙ୍କୁ ନିଜ ବାରଣ୍ଡାରେ ପଢାଉଛନ୍ତି। ଗ୍ରାମରେ ପିଇବା ପାଣିର ଘୋର ଅଭାବ ଥିବାରୁ ଲୋକେ ବାଧ୍ୟ ହୋଇ ପୋଖରୀର ଦୂଷିତ ଜଳ ବ୍ୟବହାର କରୁଛନ୍ତି। ଏଭଳି ଦୀର୍ଘବର୍ଷ ଧରି ବିଭିନ୍ନ ମୌଳିକ ସମସ୍ୟାରୁ ବଞ୍ଚିତ ଥିବାରୁ ବାଦପୁର ଗ୍ରାମବାସୀ ଆସନ୍ତା ପଞ୍ଚାୟତ ନିର୍ବାଚନରେ ଭୋଟ ବର୍ଜନ ପାଇଁ ନିଷ୍ପତ୍ତି ନେଇ ଜିଲାପାଳଙ୍କୁ ଅଭିଯୋଗ କରିଛନ୍ତି। ଏ ସମ୍ପର୍କରେ ସ୍ଥାନୀୟ ବିଡିଓଙ୍କୁ ମଧ୍ୟ ଜଣାଇଛନ୍ତି। ଏହା ମଧ୍ୟରେ ଦୀର୍ଘଦିନ ବିତିଯାଇଥିଲେ ମଧ୍ୟ କୌଣସି ସଫଳତା ନ ମିଳିବାରୁ ଶେଷରେ ଗ୍ରାମବାସୀ ଭୋଟ ବର୍ଜନ କରାଯିବ ବୋଲି ଚେତାବନୀ ଦେଇଛନ୍ତି।
