କେନ୍ଦୁଝର,୨୪ା୧୦(ସ୍ବ.ପ୍ର.): କେନ୍ଦୁଝର ଜିଲାରେ ଜଣେ ଶିଶୁ କନ୍ୟାଙ୍କ ଗଳିତ ମୃତଦେହ ଜବତ ହେବାର ଦିନକ ପରେ ପୁଣି ଜଣେ ଯୁବତୀଙ୍କୁ ଘରୁ ଡାକିନେଇ ହତ୍ୟା କରାଯିବା ଘଟଣା ଆଲୋଡ଼ନ ସୃଷ୍ଟି କରିଛି। ରବିବାର ଏକ ପରିତ୍ୟକ୍ତ ସ୍ଥାନରୁ ହାତଗୋଡ଼ ବନ୍ଧା ଅବସ୍ଥାରେ ଯୁବତୀଙ ମୃତଦେହ ଜବତ ହୋଇଛି। ପଣ୍ଡାପଡ଼ା ଥାନା ଅଧୀନ ବସନ୍ତପୁର ବଡ଼ଖମଣ ସାହିରେ ଶନିବାର ରାତିରେ ଏହି ଅମାନବୀୟ ଘଟଣା ଘଟିଛି। ଶରୀରରେ କ୍ଷତଚିହ୍ନ ଥିବାରୁ ତାଙ୍କୁ କେହି ଡାକି ନେଇ ବଳାତ୍କାର ପରେ ହତ୍ୟା କରାଯାଇଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ପୋଲିସ ମୃତଦେହ ବ୍ୟବଚ୍ଛେଦ ପାଇଁ ପଠାଇ ତଦନ୍ତ ଜାରି ରଖିଛି।
ସୂଚନା ଅନୁଯାୟୀ, ଶନିବାର ରାତିରେ ଯୁବତୀ ଜଣକ ତାଙ୍କ ମା’ଙ୍କ ସହ ଘରେ ଶୋଇଥିଲେ। ରାତି ପ୍ରାୟ ୧୧ଟା ବେଳେ ମା’ଙ୍କ ନିଦ ଭାଙ୍ଗି ଯିବାରୁ ଝିଅ ପାଖରେ ନ ଥିବା ଦେଖିଥିଲେ। ପରିବାର ଲୋକେ ରାତିସାରା ଖୋଜା ଖୋଜି କରିଥିଲେ ହେଁ ଝିଅଙ୍କୁ ପାଇ ନ ଥିଲେ। ତେବେ ଯୁବତୀ ଜଣକ ବ୍ୟବହାର କରୁଥିବା ଫୋନ ମିଳି ନ ଥିବାରୁ ନାନା ସନ୍ଦେହ ସୃଷ୍ଟି ହେଉଛି। ତଦନ୍ତ ପରେ ସତ୍ୟାସତ୍ୟ ଜଣାପଡ଼ିବ ବୋଲି କେନ୍ଦୁଝର ସଦର ଏସ୍ଡିପିଓ ପି.ଜେ.ଟପ୍ପୋ କହିଛନ୍ତି।
