ଆନନ୍ଦପୁର, ୨।୪(ସୁଶାନ୍ତ କୁମାର ସାହୁ): କେନ୍ଦୁଝର ଜିଲା ଆନନ୍ଦପୁର ଉପଖଣ୍ଡ ହଦଗଡ଼ ଅଞ୍ଚଳରେ ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି। ଗୁରୁବାର ଦିନ ହଦଗଡ଼ ରେଞ୍ଜ ଅଧୀନରେ ଥିବା ସ୍ଥାନୀୟ ପୋଷ୍ଟ ଅଫିସ ପରିସରରେ ଏକ ବିରାଟକାୟ ଅହିରାଜ (King Cobra) ସାପ ବାହାରିବା ଫଳରେ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଛି।
ପୋଷ୍ଟ ଅଫିସ ଭିତରେ ହଠାତ ସାପଟିକୁ ଦେଖି ସେଠାରେ ଥିବା କର୍ମଚାରୀ ଓ ସ୍ଥାନୀୟ ଲୋକେ ଭୟଭୀତ ହୋଇପଡ଼ିଥିଲେ। ଲୋକଙ୍କ ଭିଡ଼ ଜମିବା ସହ କିଛି ଉତ୍ତ୍ୟକ୍ତ ଯୁବକ ସାପଟି ଉପରକୁ ଟେକା ପଥର ଫିଙ୍ଗୁଥିବା ଦେଖିବାକୁ ମିଳିଥିଲା।
ସୂଚନାଯୋଗ୍ୟ, ହଦଗଡ଼ ଅଞ୍ଚଳଟି ଘନ ଜଙ୍ଗଲ ନିକଟବର୍ତ୍ତୀ ହୋଇଥିବାରୁ ପ୍ରାୟତଃ ବନ୍ୟଜନ୍ତୁ ଓ ବିଷଧର ସାପ ଗାଁ ଭିତରକୁ ପଶି ଆସିଥାନ୍ତି। ଖବର ପାଇ ହଦଗଡ଼ ବନ ବିଭାଗର କର୍ମଚାରୀମାନେ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ସେମାନେ ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହ ବନ୍ୟଜନ୍ତୁଙ୍କୁ ଆକ୍ରମଣ ନ କରିବାକୁ ପରାମର୍ଶ ଦେଇଥିଲେ। ବନ୍ୟପ୍ରାଣୀ ସଂରକ୍ଷଣର ଗୁରୁତ୍ୱ ବୁଝାଇବା ସହ ସାପଟିକୁ ସୁରକ୍ଷିତ ଭାବେ ଉଦ୍ଧାର କରିବା ପାଇଁ ବ୍ୟବସ୍ଥା କରାଯାଇଥିଲା।
