ନୂଆଦିଲ୍ଲୀ,୧।୩ : ଆଗାମୀ ଇଂଲଣ୍ଡ ବିପକ୍ଷ ଦିନିକିଆ ସିରିଜ୍ ଲାଗି ଭାରତୀୟ ଦଳରେ ରବିଚନ୍ଦ୍ରନ ଅଶ୍ୱିନଙ୍କୁ ଚୟନ କରିବା ଉଚିତ। କାରଣ ଉଇକେଟ ନେବାର ଦକ୍ଷତା ସହ ତାଙ୍କୁ ସାମିଲ କରିବା ଦ୍ୱାରା ଦଳର ବ୍ୟାଟିଂ ଲାଇନଅପ୍ରେ ଗଭୀରତା ଆସିବ। ଏହା କହିଛନ୍ତି ପୂର୍ବତନ ଅଷ୍ଟ୍ରେଲିଆନ ସ୍ପିନର ବ୍ରାଡ୍ ହଗ।
ଟୁଇଟରରେ ଜଣେ ୟୁଜର ଅଷ୍ଟ୍ରେଲିଆନ ପୂର୍ବତନ ସ୍ପିନରଙ୍କୁ ପ୍ରଶ୍ନ କରିଥିଲେ, ଭାରତ ଓ ଇଂଲଣ୍ଡ ଟେଷ୍ଟ ସିରିଜ୍ ପରେ, ଅଶ୍ୱିନ ଦିନିକିଆ ଦଳକୁ ଫେରିପାରିବେ କି ? ଚୟନକର୍ତ୍ତାମାନେ ତାଙ୍କୁ ଅଲରାଉଣ୍ଡର ଭାବେ ଦଳରେ ସ୍ଥାନ ଦେଇପାରିବେ କି? ଏହାର ଉତ୍ତରରେ ବ୍ରାଡ ହଗ୍ ଲେଖିଥିଲେ, ମୋ ମତରେ ଏହା ସବୁଠୁ ଭଲ ବିକଳ୍ପ। ଅଶ୍ୱିନଙ୍କୁ ଦଳରେ ସାମିଲ କରିବା ଦ୍ୱାରା ବ୍ୟାଟିଂ ଲାଇନଅପ୍ରେ ଗଭୀରତା ଆସିବ। ଆଉ ଏହା ଉପରକ୍ରମର ବ୍ୟାଟ୍ସମ୍ୟାନଙ୍କୁ ଅଧିକ ଆକ୍ରମଣ କରିବାକୁ ସୁଯୋଗ ଦେବ। ତାଙ୍କ ନିକଟରେ ଉଇକେଟ ନେବାର ଦକ୍ଷତା ବ୍ୟତୀତ ସେ ଓଭର ପିଛା ଖୁବ କମ୍ ରନ୍ ବ୍ୟୟ କରନ୍ତି। ତାଙ୍କୁ ଫେରାଇ ଆଣ।
ଉଲ୍ଲେଖଥାଉ କି, ଅଶ୍ୱିନ ଅନ୍ତିମ ଥର ୨୦୧୭ରେ ଭାରତ ପାଇଁ ଦିନିକିଆ ଓ ଟି୨୦ ଫମାର୍ଟରେ ଖେଳିଥିଲେ। ୧୧୧ ଦିନିକିଆ ଓ ୪୬ ଟି୨୦ ମ୍ୟାଚ୍ ଖେଳିଥିବା ଅଶ୍ୱିନଙ୍କ ନାମରେ ଯଥାକ୍ରମେ ୧୫୦ ଓ ୫୨ ଉଇକେଟ ରହିଛି।
