ନୂଆଦିଲ୍ଲୀ: ଆଗାମୀ ୬ ମାସରେ ମୁକେଶ ଅମ୍ବାନୀ ତାଙ୍କ ଜିଓମାର୍ଟକୁ ହ୍ବାଟ୍ସଆପ୍ ସହ ଯୋଡ଼ିପାରନ୍ତି। ଏ ନେଇ ରିଲାଏନ୍ସ ଇଣ୍ଡଷ୍ଟ୍ରିଜ ଲିମିଟେଡ୍ ପକ୍ଷରୁ ଯୋଜନା କରାଯାଉଛି। ଫାଇନାନ୍ସିଆଲ ଖବରକାଗଜ ଡେଲି ମିଣ୍ଟରେ ଏ ନେଇ ସୋମବାର ଏକ ଖବର ପ୍ରକାଶ ପାଇଛି। ଘରୋଇ ବଜାରରେ ରିଟେଲ ଏବଂ ଗ୍ରସେରି ବାଣିଜ୍ୟକୁ ସମ୍ପ୍ରସାରଣ କରିବା ଲାଗି କମ୍ପାନୀ ଏଭଳି ଯୋଜନା ହାତକୁ ନେଇପାରେ ବୋଲି ଏହି ଖବରକାଗଜ ରିପୋର୍ଟରେ କୁହାଯାଇଛି। ଆମାଜନ ଏବଂ ଓ୍ବାଲ୍ମାର୍ଟକୁ ଟକ୍କରଦେବା ଲାଗି ରିଲାଏନ୍ସ ଗୁଗଲ ଏବଂ ଫେସ୍ବୁକ ଭଳି ବିଶ୍ୱସ୍ତରୀୟ ନିବେଶକଙ୍କଠାରୁ ୨୬ ବିଲିୟନ ଡଲାରର ନିବେଶ ଗତ ବର୍ଷ ହାସଲ କରିଛି। କମ୍ପାନୀ ଏଭଳି ଭାବେ ଆଗାମୀ ଦିନରେ ଜିଓମାର୍ଟକୁ ହ୍ବାଟ୍ସଆପ୍ ସହ ଯୋଡ଼ିବ। ଫଳରେ ହ୍ବାଟ୍ସଆପ୍ ବ୍ୟବହାରକାରୀ ମଧ୍ୟ ସିଧାସଳଖ ଜିଓମାର୍ଟରୁ ସାମଗ୍ରୀ ଅର୍ଡର କରିପାରିବେ। ଭାରତରେ ହ୍ବାଟ୍ସଆପ୍ର ୪୦ କୋଟି ୟୁଜର ଅଛନ୍ତି। ଜିଓ ଫ୍ଲାଟ୍ଫର୍ମରେ ଫେସ୍ବୁକ ୫.୭ ବିଲିୟନ ଡଲାର ନିବେଶ କରିବା ସହ ୯.୯୯% ଅଂଶଧନ ହାସଲ କରିଛି। ଗତ ବର୍ଷ ମେ ମାସରେ ଜିଓମାର୍ଟ ଶୁଭାରମ୍ଭ ହୋଇଛି। ଏହା ବର୍ତ୍ତମାନ ଦେଶର ୨୦୦ ସହରରେ ସେବା ଯୋଗାଉଛି। ରିଲାଏନ୍ସ ରିଟେଲର ଏହା ଇ-କମର୍ସ ଭେଞ୍ଚର, ଯାହା ଗ୍ରସେରି ଡେଲିଭରି ପ୍ରଦାନ କରୁଛି। ନୂଆ ଯୋଜନା ସମ୍ପର୍କରେ ରିଲାଏନ୍ସ ଏବଂ ହ୍ବାଟ୍ସଆପ୍ର ଉତ୍ତର ଲୋଡ଼ାଯାଇଥିଲେ ମଧ୍ୟ ଏହା ମିଳିପାରିନାହିଁ।
