ଜୟପୁର,୨୫ା୭: ରାଜସ୍ଥାନରେ କ୍ଷମତା ଯୁଦ୍ଧକୁ ନେଇ ଦୁଇ ସପ୍ତାହ ଧରି ବଢ଼ିଚାଲିଥିବା ଉଷ୍ମତା ଜାତୀୟ ରାଜନୀତିକୁ ସରଗରମ କରିଛି। ମୁଖ୍ୟମନ୍ତ୍ରୀ ଅଶୋକ ଗେହଲଟ ଶୁକ୍ରବାର ଜୟପୁରସ୍ଥିତ ରାଜଭବନ ଆଗରେ ଶକ୍ତି ପ୍ରଦର୍ଶନ କରିଛନ୍ତି। ରାଜ୍ୟର ରାଜନୈତିକ ସ୍ଥିତି ଓ ମହାମାରୀ କରୋନା ସମ୍ପର୍କରେ ଆଲୋଚନା ପାଇଁ ବିଧାନସଭାର ସ୍ବତନ୍ତ୍ର ଅଧିବେଶନ ଡାକିବା ଦାବିରେ ଅଟଳ ଗେହଲଟ ନିଜର ୧୦୦ ବିଧାୟକଙ୍କୁ ଧରି ରାଜଭବନ ଆଗରେ ଧାରଣା ଦେଇଛନ୍ତି।
ବିଧାନସଭା ଅଧିବେଶନ ସୋମବାରଠାରୁ ଆରମ୍ଭ କରାଯାଉ ବୋଲି ମୁଖ୍ୟମନ୍ତ୍ରୀ ଗେହଲଟ ଦାବି କରିଛନ୍ତି। ଏହାସହ ରାତି ୯ଟା ୩୦ରେ ସେ ନିଜ ବାସଭବନରେ କ୍ୟାବିନେଟ ବୈଠକ କରିଛନ୍ତି। ୨୦୦ ଆସନ ବିଶିଷ୍ଟ ବିଧାନସଭାରେ ନିଜ ସରକାରଙ୍କ ସଂଖ୍ୟାଗରିଷ୍ଠତାର ପ୍ରମାଣ ଦେବାକୁ ଚାହୁଁଥିବା ଗେହଲଟ କହିଛନ୍ତି, ରାଜ୍ୟପାଳ କଲରାଜ ମିଶ୍ର ଉପର (କେନ୍ଦ୍ର ସରକାରଙ୍କ) ଚାପରେ ନ ଆସି ତୁରନ୍ତ ଅଧିବେଶନ ଡାକନ୍ତୁ। ନଚେତ୍ ରାଜସ୍ଥାନବାସୀ ରାଜଭବନ ଘେରାଓ କଲେ ରାଜ୍ୟପାଳ ଦାୟୀ ରହିବେ। ଗେହଲଟଙ୍କ ସହ ତାଙ୍କ ସମର୍ଥକ ବିଧାୟକମାନେ ରାଜ୍ୟପାଳଙ୍କୁ ଭେଟି ସୋମବାର ସୁଦ୍ଧା ଅଧିବେଶନ ଡାକିବାକୁ ଅନୁରୋଧ କରିଛନ୍ତି। ରାଜ୍ୟପାଳ ସମ୍ବିଧାନର ନିୟମ ମାନିବେ ବୋଲି ଗେହଲଟଙ୍କୁ ପ୍ରତିଶ୍ରୁତି ଦେଇଛନ୍ତି। ଏନେଇ କଂଗ୍ରେସର ରାଜସ୍ଥାନ ପ୍ରଭାରୀ ରଣଦୀପ ସୁର୍ଜଓ୍ବୋଲା ଗଣମାଧ୍ୟମକୁ ସୂଚନା ଦେଇଛନ୍ତି। ରାଜ୍ୟପାଳଙ୍କୁ ସମ୍ବିଧାନର ଅନୁଚ୍ଛେଦ ୧୭୪ ଅନୁସାରେ କାର୍ଯ୍ୟ କରିବାକୁ ପଡ଼ିବ ବୋଲି ସୁର୍ଜଓ୍ବୋଲା କହିଛନ୍ତି।
ଏହା ପୂର୍ବରୁ ଅପରାହ୍ନ ୨ଟା ୩୦ରେ ହୋଟେଲ ଫେୟାର ମାଉଣ୍ଟରୁ ଗେହଲଟଙ୍କ ଗୋଷ୍ଠୀର ବିଧାୟକମାନେ ୪ଟି ବସ୍ରେ ଯାଇ ରାଜଭବନ ସମ୍ମୁଖରେ ଧାରଣାରେ ବସିଥିଲେ। ବିଧାନସଭା ଅଧିବେଶନ ନ ଡାକିଲେ ରାଜସ୍ଥାନର ଜନସାଧାରଣ ରାଜଭବନ ଘେରାଓ କରିବେ ବୋଲି ଗେହଲଟ ରାଜ୍ୟପାଳଙ୍କୁ ଚେତାବନୀ ଦେଇଥିଲେ। ଏହାର ଜବାବରେ ରାଜ୍ୟପାଳ ମୁଖ୍ୟମନ୍ତ୍ରୀ ଗେହଲଟଙ୍କୁ ଏକ ପତ୍ର ଲେଖିଛନ୍ତି। ରାଜଭବନ ଘେରାଓ ଚେତାବନୀ ଏକ ଭୁଲ୍ ପରମ୍ପରାର ଆରମ୍ଭ ବୋଲି ରାଜ୍ୟପାଳ ଏଥିରେ ଉଲ୍ଲେଖ କରିଥିବା ଜଣାପଡ଼ିଛି।
