ମୁମ୍ବାଇ,୨୩।୭: ଦେଶ ମଧ୍ୟରେ କରୋନା ସଂକ୍ରମଣ ନିୟନ୍ତ୍ରଣକୁ ଆସିପାରୁନାହିଁ। ଏଥି ଲାଗି ରାଜ୍ୟଗୁଡିକ ସ୍ତରରେ ପୁଣି ଥରେ ଲକଡାଉନ କରିବାକୁ ପଡୁଛି। ଏଥି ଯୋଗୁ ବିଗିଡିଥିବା ବଜାର ସ୍ଥିତି ଠିକ୍ ହେବା ଲାଗି ଅଧିକ ସମୟ ଲାଗୁଛି। ଏଭଳି ସ୍ଥିତିରେ ମହାମାରୀର ପ୍ରଭାବ ଅତି ଗଭୀର ରହିବ ବୋଲି ସିଙ୍ଗାପୁର ଭିତ୍ତିକ ବ୍ରୋକରେଜ କମ୍ପାନୀ ଡିବିଏସ୍ ଏହାର ଆକଳନରେ ପ୍ରକାଶ କରିଛି। ଏହା କହିଛି ଯେ, ବଜାର ସ୍ଥିତି ଗଭୀର ଭାବେ କ୍ଷତିଗ୍ରସ୍ତ ହୋଇଥିବାରୁ ଭାରତର ଅଭିବୃଦ୍ଧି ଉପରେ ଏହାର ନକରାତ୍ମକ ପ୍ରଭାବ ପଡିବ। ଆର୍ଥତ୍କ ବର୍ଷ ୨୦୨୦-୨୧ରେ ଭାରତର ଅଭିବୃଦ୍ଧି ୬% ହ୍ରାସ ଘଟିବା ନେଇ ଏହା ପୂର୍ବାନୁମାନ କରିଛି।
ଚଳିତ ଆର୍ଥତ୍କ ବର୍ଷରେ ଭାରତର ଅଭିବୃଦ୍ଧି ୪.୮% ଖସିଯିବ ବୋଲି ଏହି ଏଜେନ୍ସି ପୂର୍ବାନୁମାନରେ କହିଥିଲା। ଭଲ ଅର୍ଥନୈତିକ କାର୍ଯ୍ୟକଳାପ ରହିଥିବା ମହାରାଷ୍ଟ୍ର, ତାମିଲନାଡୁ ଏବଂ ଗୁଜରାଟ ଭଳି ରାଜ୍ୟଗୁଡିକର ୭% ଜିଲା ଦେଶର ମୋଟ ଆର୍ଥତ୍କ ଉତ୍ପାଦନରେ ପ୍ରାୟ ୩୦% ଯୋଗଦାନ ରଖିଥାନ୍ତି। ଏହି ସ୍ଥାନଗୁଡିକରେ ପ୍ରାୟ ୭୦% କରୋନା ମାମଲା ସାମ୍ନାକୁ ଆସିଛି। ଫଳରେ ବଜାର ସ୍ଥିତିକୁ ସୁଧାରିବା ଏବଂ ଅର୍ଥନୈତିକ ଅଭିବୃଦ୍ଧି ଫେରାଇ ଆଣିବା ବର୍ତ୍ତମାନ କଷ୍ଟକର ବ୍ୟାପାର ବୋଲି କୁହାଯାଇଛି।
ବର୍ତ୍ତମାନ ଭାରତରେ ପ୍ରାୟ ୧.୧୫ ନିୟୁତ ଲୋକ କରୋନା ଦ୍ୱାରା ସଂକ୍ରମିତ ହୋଇଛନ୍ତି। ୨୯ ହଜାର ଲୋକ ଏହା ଦ୍ୱାରା ମୃତ୍ୟୁ ମୁଖରେ ପଡିଛନ୍ତି। କରୋନା ସଂକ୍ରମଣରେ ଭାରତର ସ୍ଥାନ ତୃତୀୟ ରହିଛି। ଆମେରିକାରେ ୩.୯ ନିୟୁତ ଏବଂ ବ୍ରାଜିଲରେ ୨.୨ ନିୟୁତ ଲୋକ ସଂକ୍ରମଣର ଶିକାର ହୋଇଛନ୍ତି। ଏଭଳି ସ୍ଥିତିରେ ଘରୋଇ ବଜାର ଗଭୀର କ୍ଷତି ସାମ୍ନା କରିବ ବୋଲି ଡିବିଏସ୍ର ଅର୍ଥନୀତିଜ୍ଞ ରାଧିକା ରାଓ କହିଛନ୍ତି।
