ଦୁବାଇ,୨୬।୯(ପି.ଟି.): ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଅଧିନାୟକ ବିରାଟ କୋହଲିଙ୍କ ଉପରେ ମନ୍ତବ୍ୟ ଦେଇ କିମ୍ବଦନ୍ତୀ ବ୍ୟାଟ୍ସମ୍ୟାନ ସୁନୀଲ ଗାଭାସ୍କର ବିବାଦରେ ପଡିଛନ୍ତି। ଏଥିପାଇଁ କୋହଲିଙ୍କ ସ୍ତ୍ରୀ ତଥା ବଲିଉଡ୍ ଅଭିନେତ୍ରୀ ଅନୁଷ୍କା ଶର୍ମା ଗାଭାସ୍କରଙ୍କୁ କଡ଼ା ସମାଲୋଚନା କରିଛନ୍ତି।
ଶୁକ୍ରବାର ଅନୁଷ୍ଠିତ କିଙ୍ଗ୍ସ ଏକାଦଶ ପଞ୍ଜାବ ବିପକ୍ଷ ମ୍ୟାଚ୍ରେ କୋହଲି ଅଧିନାୟକ ଲୋକେଶ ରାହୁଲଙ୍କ ଦୁଇଟି ସହଜ କ୍ୟାଚ୍ ମିସ୍ କରିବା ସହ ବ୍ୟାଟିଂରେ ମାତ୍ର ୧ ରନ୍ କରି ଆଉଟ ହୋଇଥିଲେ। କମେଣ୍ଟ୍ରି ବକ୍ସରେ ବସିଥିବା ଗାଭାସ୍କର ଏ ନେଇ ମତ ରଖିଥିଲେ। କୋହଲିଙ୍କ ଏହି ବିଫଳତା ପାଇଁ ସେ ଅନୁଷ୍କାଙ୍କୁ ଦାୟୀ କରିଥିଲେ। ତେବେ ଅନୁଷ୍କା ଏହାର କଡ଼ା ଜବାବ୍ ଦେଇଛନ୍ତି। ଗାଭାସ୍କରଙ୍କ ଏଭଳି ମନ୍ତବ୍ୟ ଗ୍ରହଣୀୟ ନୁହେଁ ଓ ଏହା ନିହାତି ଅପ୍ରିୟ ବୋଲି ସେ କହିଛନ୍ତି। ଏପରିକି ଗାଭାସ୍କରଙ୍କୁ କମେଣ୍ଟ୍ରି ପ୍ୟାନେଲରୁ ହଟାଇବାକୁ କୋହଲିଙ୍କ ପ୍ରଶଂସକମାନେ ଦାବି କରିଛନ୍ତି।
ନିଜ ଇନ୍ଷ୍ଟାଗ୍ରାମ ପେଜ୍ରେ ଅନୁଷ୍କା ଗାଭାସ୍କରଙ୍କ ମନ୍ତବ୍ୟ ପାଇଁ କଡ଼ା ସମାଲୋଚନା କରି ପୋଷ୍ଟ କରିବା ସହ ନିଜର ପ୍ରତିକ୍ରିୟା ପ୍ରକାଶ କରିଛନ୍ତି। ଗାଭାସ୍କର ନିଜ ମନ୍ତବ୍ୟର ବ୍ୟାଖ୍ୟା କରିବା ଉଚିତ। ସ୍ବାମୀଙ୍କ ପ୍ରଦର୍ଶନ ନେଇ ତାଙ୍କ ସ୍ତ୍ରୀଙ୍କୁ ଦାୟୀ କରାଯିବା କେତେଦୂର ଠିକ୍ ବୋଲି ଅନୁଷ୍କା ପ୍ରଶ୍ନ ପଚାରିଛନ୍ତି।
ଗତ କେତେ ବର୍ଷ ହେବ ଆପଣ ସବୁ କ୍ରିକେଟରଙ୍କ ବ୍ୟକ୍ତିଗତ ଜୀବନକୁ ସମ୍ମାନ ଦେଇଆସିଛନ୍ତି। କ୍ରିକେଟରମାନଙ୍କ ଖେଳ ଉପରେ ମନ୍ତବ୍ୟ ଦେବା ବେଳେ ଆପଣ କେବେବି କାହାକୁ ଦାୟୀ କରିନାହାନ୍ତି। ତେଣୁ ଆପଣ ମଧ୍ୟ ସମାନ ଭାବେ ମୋତେ ସମ୍ମାନ କରିବା ଦରକାର ବୋଲି ଅନୁଷ୍କା ଗାଭାସ୍କରଙ୍କୁ ଆକ୍ଷେପ କରି ପୋଷ୍ଟ କରିଛନ୍ତି। ମୋ ସ୍ବାମୀଙ୍କ ପ୍ରଦର୍ଶନକୁ ସମାଲୋଚନା କରିବାକୁ ଆପଣଙ୍କର ଅଧିକାର ଅଛି। ସେଥିପାଇଁ ଆପଣ ତାଙ୍କୁ ଦାୟୀ କରିପାରିଥାନ୍ତେ। ଆପଣ ଜଣେ ମହାନ୍ କ୍ରିକେଟର। କ୍ରିକେଟରେ ଆପଣଙ୍କ ନାମ ସମ୍ମାନର ସହିତ ନିଆଯାଇଥାଏ। କିନ୍ତୁ ମୋତେ ଏଥିପାଇଁ କାହିଁକି ଦାୟୀ କରୁଛନ୍ତି ବୋଲି ସେ ପ୍ରଶ୍ନ ପଚାରିଛନ୍ତି।
ଉଲ୍ଲେଖଥାଉ କି, ଗତ କେତେବର୍ଷ ହେବ କୋହଲି ଯେତେବେଳେ ଖରାପ୍ ପ୍ରଦର୍ଶନ କରିଛନ୍ତି ସେଥିପାଇଁ ଅନୁଷ୍କାଙ୍କୁ ଦାୟୀ କରାଯାଇ ଆସିଛି। ୨୦୨୦ରେ ଆମେ ରହୁଥିବା ବେଳେ ଏଥିରେ ପରିବର୍ତ୍ତନ ଆସିନାହିଁ। ଏଭଳି ଅବାଞ୍ଚିତ ପ୍ରକ୍ରିୟା କେବେ ବନ୍ଦ ହେବ ବୋଲି ଅନୁଷ୍କା ପ୍ରଶ୍ନ କରିଛନ୍ତି।