ମୁମ୍ବାଇ,୨୯ା୮: ମୁକେଶ ଅମ୍ବାନୀଙ୍କୁ ପଛରେ ପକାଇ ଆଦାନୀ ଗ୍ରୁପ ଚେୟାରମ୍ୟାନ ଗୌତମ ଆଦାନୀ ଭାରତ ଏବଂ ଏସିଆର ସବୁଠାରୁ ଧନୀ ବ୍ୟକ୍ତି ହୋଇପାରିଛନ୍ତି। ମୁକେଶ ଅମ୍ବାନୀ ଦୀର୍ଘଦିନ ଧରି ଭାରତର ସବୁଠାରୁ ଧନୀ ବ୍ୟକ୍ତି ଥିଲେ, କିନ୍ତୁ ବର୍ତ୍ତମାନ ଏହି ମୁକୁଟ ଗୌତମ ଆଦାନୀଙ୍କ ନିକଟକୁ ଯାଇଛି।
ଇଣ୍ଡିଆ ରିଚ୍ ୨୦୨୪ ତାଲିକା ଅନୁଯାୟୀ, ମୋଟ୍ ୧୫୩୯ ଭାରତୀୟଙ୍କ ନାମ ଏହି ତାଲିକାରେ ଅନ୍ତର୍ଭୁକ୍ତ ହୋଇଛି। ଏହି ସମସ୍ତ ବ୍ୟକ୍ତିଙ୍କର ସମ୍ପତ୍ତି ୧୦୦୦ କୋଟିରୁ ଅଧିକ ଅଟେ। ଏହି ତାଲିକାରେ ଗୌତମଙ୍କ ନାମ ଶୀର୍ଷରେ ଥିବାବେଳେ ମୁକେଶ ଦ୍ୱିତୀୟ ସ୍ଥାନରେ ଅଛନ୍ତି। ୩୧ ଜୁଲାଇ ୨୦୨୪ର ତଥ୍ୟ ଅନୁଯାୟୀ ଏହି ତାଲିକା ପ୍ରସ୍ତୁତ କରାଯାଇଛି। ଏହା ସହିତ ଗତ ବର୍ଷ ପ୍ରତି ପାଞ୍ଚ ଦିନରେ ଭାରତରେ ଜଣେ ନୂଆ ବିଲେନେୟାର ସୃଷ୍ଟି ହୋଇଛନ୍ତି।
ହୁରୁନ ଇଣ୍ଡିଆ ରିଚ୍ ୨୦୨୪ ତାଲିକା ଅନୁଯାୟୀ, ୬୨ ବର୍ଷୀୟ ଗୌତମଙ୍କ ସମ୍ପତ୍ତି ୧,୬୧,୮୦୦ କୋଟିରେ ପହଞ୍ଚିଛି। ତାଲିକାର ଦ୍ୱିତୀୟ ସ୍ଥାନରେ ମୁକେଶ ଅମ୍ବାନୀଙ୍କ ନାମ ରହିଛି, ଯାହାଙ୍କ ସମ୍ପତ୍ତି ୧,୧୪,୭୦୦ କୋଟି ଟଙ୍କା। ଏହି ତାଲିକାରେ ତୃତୀୟ ସ୍ଥାନରେ ରହିଛନ୍ତି ଏଚ୍ସିଏଲ୍ର ଶିବ ନାଡାର। ତାଙ୍କର ମୋଟ ନିଟ୍ ମୂଲ୍ୟ ହେଉଛି ୩୧୪,୦୦୦ କୋଟି ଟଙ୍କା। ଚତୁର୍ଥ ସ୍ଥାନରେ ସାଇରସ ପୁନାଓ୍ବାଲାଙ୍କ ନାମ ରହିଛି। ତାଙ୍କର ମୋଟ୍ ସମ୍ପତ୍ତିର ମୂଲ୍ୟ ୨୮୯,୯୦୦ କୋଟିରେ ପହଞ୍ଚିଛି। ଏହି ତାଲିକାରେ ପଞ୍ଚମ ସ୍ଥାନରେ ସୂର୍ଯ୍ୟ ଫାର୍ମାଙ୍କ ଦିଲୀପ ସାଙ୍ଗ୍ଭିଙ୍କ ନାମ ରହିଛି, ଯିଏ କି ମୋଟ୍ ୨୪୯,୯୦୦ କୋଟି ଟଙ୍କାର ମାଲିକ ଅଟନ୍ତି।
ଏହି ତାଲିକାରେ କୁମାର ମଙ୍ଗଲମ ବିର୍ଲା ଷଷ୍ଠ ସ୍ଥାନରେ ଅଛନ୍ତି ଏବଂ ତାଙ୍କର ମୋଟ୍ ମୂଲ୍ୟ ୨୩୫,୨୦୦ କୋଟିରେ ପହଞ୍ଚିଛି। ହିନ୍ଦୁଜାଙ୍କ ଗୋପୀଚାନ୍ଦ ହିନ୍ଦୁଜାଙ୍କ ନିଟ୍ ମୂଲ୍ୟ ୧୯୨,୭୦୦ କୋଟିରେ ପହଞ୍ଚିଛି। ୧୯୦,୯୦୦ କୋଟି ଟଙ୍କା ସମ୍ପତ୍ତି ସହିତ ରାଧାକୃଷ୍ଣ ଦାମନୀ ଏହି ତାଲିକାରେ ଅଷ୍ଟମ ସ୍ଥାନରେ ଅଛନ୍ତି। ଏହି ତାଲିକାରେ ଅଜିମ ପ୍ରେମଜୀଙ୍କ ନାମ ୯ମ ସ୍ଥାନରେ ରହିଛି, ଯାହାର ମୋଟ୍ ମୂଲ୍ୟ ୧୯୦,୭୦୦ କୋଟିରେ ପହଞ୍ଚିଛି। ଏହି ତାଲିକାରେ ନୀରଜ ବଜାଜଙ୍କ ନାମ ଦଶମ ସ୍ଥାନରେ ରହିଛି, ଯାହାଙ୍କ ମୋଟ୍ ମୂଲ୍ୟ ୧୬୨,୮୦୦ କୋଟିରେ ପହଞ୍ଚିଛି।
ଭାରତୀୟ ମନୋରଞ୍ଜନ ଶିଳ୍ପର କିଙ୍ଗ୍ ଶାହାରୁଖ ଖାନ୍ ମଧ୍ୟ ପ୍ରଥମ ଥର ପାଇଁ ଦେଶର କୋଟିପତି ତାଲିକାରେ ଯୋଗଦେବାରେ ସଫଳ ହୋଇଛନ୍ତି। ତାଙ୍କର ସମ୍ପତ୍ତି ୭,୩୦୦ କୋଟି ଟଙ୍କା ବୋଲି କୁହାଯାଉଛି। କୋଲକାତା ନାଇଟ ରାଇଡର୍ସ ଏବଂ ରେଡ୍ ଚିଲିସ ଏଣ୍ଟରଟେନ୍ମେଣ୍ଟରେ ଅଂଶଧନ ଥିବାରୁ ସେ ଏହି ତାଲିକାରେ ସ୍ଥାନ ପାଇଛନ୍ତି। କିଙ୍ଗ୍ ଖାନଙ୍କ ବ୍ୟତୀତ ଅମିତାଭ ବଚ୍ଚନ, ଜୁହି ଚାଓ୍ବଲା ଏବଂ ପରିବାର, କରଣ ଜୋହର ଏବଂ ହ୍ରିତିକ ରୋଶନଙ୍କ ଭଳି ଷ୍ଟାର୍ଙ୍କ ନାମ ମଧ୍ୟ ଏହି ତାଲିକାରେ ସ୍ଥାନ ପାଇଛି।
