ଲଦାଖ,୨୨।୧୨ : ଭାରତ ଏବଂ ଚାଇନ ମଧ୍ୟରେ ତିକ୍ତତା ମଧ୍ୟରେ ଭାରତୀୟ ବାୟୁସେନା ସମଗ୍ର ଏଲଏସି ଉପରେ ନଜର ରଖିବା ପାଇଁ ଭାରତୀୟ ବାୟୁସେନାର ସ୍ବତନ୍ତ୍ର ଗରୁଡ଼ ସ୍ପେଶାଲ ଫୋର୍ସ ମୁତୟନ କରିଛି। ଏହି ବାୟୁସେନା ଯବାନମାନେ କେବଳ ଆକାଶରୁ ନୁହେଁ, ଭୂମି ଉପରେ ମଧ୍ୟ ତୀକ୍ଷ୍ଣ ନଜର ରଖିବେ।
କଶ୍ମୀରରେ ଆତଙ୍କବାଦ ବିରୋଧୀ ଅପରେଶନରେ ନିଜର ଭୂମିକା ପ୍ରତିପାଦନ କରିଥିବା ଗରୁଡ଼ ଫୋର୍ସର ଯବାନମାନେ ମେ ୨୦୨୦ଠାରୁ ନିୟମିତ ବ୍ୟବଧାନରେ ଏଲଏସିରେ ମୁତୟନ ହେଉଥିଲେ। ବର୍ତ୍ତମାନ ସେମାନେ ଏଲଏସିରେ ସମ୍ପୂର୍ଣ୍ଣ ଭାବେ ନିୟୋଜିତ ହୋଇଛନ୍ତି।
ଭାରତୀୟ ବାୟୁସେନାର ଏହି ବିଶେଷ ଯବାନମାନେ ଅତ୍ୟାଧୁନିକ ଅସ୍ତ୍ରଶସ୍ତ୍ରରେ ସଜ୍ଜିତ ହୋଇଛନ୍ତି। ସୂଚନାନୁସାରେ,ସେମାନଙ୍କୁ ଦୁନିଆର ଅନ୍ୟତମ ଆଧୁନିକ ରାଇଫଲ ମଧ୍ୟରୁ ଏକେ-୨୦୩ ଦିଆଯାଇଛି। ଏହା ବ୍ୟତୀତ ଆମେରିକୀୟ ସିଗ ସାଉର୍ ଅସାଲଟ ରାଇଫଲ ମଧ୍ୟ ସେମାନଙ୍କୁ ଦିଆଯାଇଛି, ଯାହା ସେମାନଙ୍କୁ ଅତ୍ୟନ୍ତ ମାରାତ୍ମକ କରିଥାଏ।
