ଭୁବନେଶ୍ୱର,୬।୭(ଅନୁରାଧା ମହାରଣା)ୟୁନିଟ-୨ ମାର୍କେଟ ବିଲ୍ଡିଂର ସ୍ଥାୟୀ ବ୍ୟବସାୟୀ ଓ ଉଠାଦୋକାନୀ ଙ୍କ ମଧ୍ୟରେ ଲାଗି ରହିଥିବା ବିବାଦର ସ୍ଥାୟୀ ସମାଧାନ ହେଉନାହିଁ। ଫଳରେ ଉଭୟ ଗୋଷ୍ଠୀ ବାରମ୍ବାର ମୁହଁାମୁହିଁ ହେବା ସହ ବଜାର ବନ୍ଦ, ଅଳିଆ ଉଠା ବନ୍ଦ ମାଧ୍ୟମରେ ପ୍ରତିବାଦ କରାଯାଉଛି। ମାର୍କେଟ ଆସୋସିଏଶନର ଦାବିକୁ ଭୁବନେଶ୍ୱର ମହାନଗର ନିଗମ (ବିଏମସି) ଅଣଦେଖା କରିଥିବା ଅଭିଯୋଗ କରି ଗତ ୫ଦିନ ହେବ ମାର୍କେଟରୁ ସଫେଇ ଓ ଅଳିଆ ଉଠାଇବା କାର୍ଯ୍ୟ ବନ୍ଦ କରାଯାଇଥିଲା। ଫଳରେ ମାର୍କେଟ ଅଞ୍ଚଳରେ କୁଢ଼ କୁଢ଼ ଅଳିଆ ଜମା ହୋଇଥିଲା। ଏଠାକୁ ଆସୁଥିବା ଗ୍ରାହକଙ୍କ ମଧ୍ୟରେ ଏନେଇ ଅସନ୍ତୋଷ ଦେଖିବାକୁ ମିଳିଥିଲା। ତେବେ ବୁଧବାର ମେୟର ସୁଲୋଚନା ଦାସ, ବିଏମ୍ସି କମିଶନର ବିଜୟ ଅମୃତ କୁଲାଙ୍ଗେଙ୍କ ସମେତ ଅନ୍ୟ ବରିଷ୍ଠ ଅଧିକାରୀ ଆଲୋଚନା କରିଥିଲେ। ୨ଦିନ ମଧ୍ୟରେ ଅଯୋଗ୍ୟ ଉଠାଦୋକାନୀ ମାର୍କେଟ ବିଲ୍ଡିଂରୁ ଉଠିବେ। ଏଥିସହ କୋର୍ଟରେ ଚାଲିଥିବା ଉଠାଦୋକାନୀ ଓ ମାର୍କେଟ ଆସୋସିଏଶନ ମାମଲାରେ ରି-ପିଟିଶନ କରାଯାଇ ଏହାର ପରିଚାଳନାକୁ ଗୁରୁତ୍ୱ ଦିଆଯିବ ବୋଲି ମେୟର ପ୍ରତିଶ୍ରୁତି ଦେବା ପରେ ଅଳିଆ ହଟାଇବାକୁ ଆସୋସିଏଶନ ରାଜି ହୋଇଥିଲା। ତେବେ ସା ପ୍ରାୟ ୭ଟାରେ ମାର୍କେଟ ବିଲ୍ଡିଂ ଭିତରୁ ସଫେଇଗାଡ଼ି ଅଳିଆ ଉଠାଇଥିବା ମାର୍କେଟ ଆସୋସିଏଶନ ସଭାପତି ପ୍ରଦ୍ୟୁମ୍ନ ଲେଙ୍କା ସୂଚନା ଦେଇଛନ୍ତି।
କି, ଉଠାଦୋକାନୀଙ୍କ ପାଇଁ ମାର୍କେଟ ବିଲ୍ଡିଂରେ ସ୍ଥାୟୀ ଦୋକାନ କରିଥିବା ବ୍ୟବସାୟୀଙ୍କ ବେପାର ପ୍ରଭାବିତ ହେଉଛି। ଏଥିସହ ସେମାନଙ୍କ ପାଇଁ ମାର୍କେଟ ପରିସର ଅଳିଆଆବର୍ଜନାରେ ଭର୍ତ୍ତି ହେଉଛି। ଉଠା ଦୋକାନୀଙ୍କୁ ମାର୍କେଟ ବିଲ୍ଡିଂରୁ ହଟାଇବା ସହ କେତେକ ଦାବି ନେଇ ମାର୍କେଟ ଆସୋସିଏଶନର ସଦସ୍ୟମାନେ ବିଏମ୍ସି କମିଶନର, ଅତିରିକ୍ତ କମିଶନର, ଜେଡିସି ତଥା ପୋଲିସ୍ର ସହଯୋଗ ଲୋଡିଥିଲେ। ୭ଦିନ ମଧ୍ୟରେ ନିଜେ ମାର୍କେଟକୁ ଯାଇ ସ୍ଥିତି ଯାଞ୍ଚ କରିବା ସହ ସ୍ଥାୟୀ ବ୍ୟବସାୟୀଙ୍କ ଅଭିଯୋଗ ଶୁଣିବେ ବିଏମ୍ସି କମିଶନର ବିଜୟ ଅମୃତ କୁଲାଙ୍ଗେ କହିଥିଲେ। ମାତ୍ର କମିଶନରଙ୍କ ପ୍ରତିଶ୍ରୁତିକୁ ମାସେ ବିତିଥିଲେ ମଧ୍ୟ ସମସ୍ୟାର ସମାଧାନ ଦୂରେ ଥାଇ, ଏପରିକି କମିଶନର କୁଲାଙ୍ଗେ ସେଠାକୁ ଯାଇ ବ୍ୟବସାୟୀଙ୍କ ସହ ଆଲୋଚନା ନ କରିବାରୁ ସଂଘ ଅଳିଆ ଉଠା ବନ୍ଦ କରି ପ୍ରତିବାଦ କରିଥିଲା। ଫଳରେ ଅଳିଆ ଗଦା ହୋଇ ଅସ୍ବାସ୍ଥ୍ୟକର ପରିବେଶ ସୃଷ୍ଟି ହୋଇଥିଲା। ଏହାକୁ ନେଇ ବ୍ୟବସାୟୀ ଓ ଗ୍ରାହକ ତୀବ୍ର ଅସନ୍ତୋଷ ପ୍ରକାଶ ପରିବା ବିଏମ୍ସିକୁ ଦାୟୀ କରିଥିଲେ। ବିଏମ୍ସି ଅଧିକାରୀ ଓ ସମ୍ପୃକ୍ତ ୱାର୍ଡର ସାନିଟାରୀ ଇନ୍ସପେକ୍ଟର ବର୍ଜ୍ୟ ଉଠାଇବାକୁ ଉଦ୍ୟମ କରି ବିଫଳ ହୋଇଥିଲେ।
