ଛତ୍ରପୁର,୪ା୯(ଡି.ଏନ୍.ଏ.)- ଗଞ୍ଜାମ ଜିଲାରେ କରୋନା ସ୍ଥିତିରେ ସୁଧାର ଆସିବାରେ ଲାଗିଛି । ଦୀର୍ଘ ୨ ମାସ ପରେ ଗତ ୨୪ ଘଣ୍ଟାରେ ନୂଆ ଆକ୍ରାନ୍ତଙ୍କ ସଂଖ୍ୟା ୧୦୦ ତଳକୁ ଖସିଛି। ଜିଲାରେ ୯୭ ପଜିଟିଭ ଚିହ୍ନଟ ହୋଇଛନ୍ତି। ସେଥିମଧ୍ୟରେ ୭ କରୋନା ଯୋଦ୍ଧା ଅଛନ୍ତି। ଅନ୍ୟପକ୍ଷରେ ୩୬୮ ଆକ୍ରାନ୍ତ ସୁସ୍ଥ ହୋଇଛନ୍ତି । ସାମାଜିକ ଦୂରତ୍ୱ ନିୟମ କଡାକଡି, ୩ ଥର ଘରକୁ ଘର ଯାଇ ସ୍ବାସ୍ଥ୍ୟ ସ୍କ୍ରିନିଂ, କଣ୍ଟେନ୍ମେଣ୍ଟ ପଲିସି କଡାକଡି, ଜନସାଧାରଣଙ୍କ ସହ କୋଭିଡ୍ ମନିଟର ଓ କୋଭିଡ କେୟାର କମିଟିର ଭଲ ସମ୍ପର୍କ, ବହୁ ମାତ୍ରାରେ କରୋନା ଟେଷ୍ଟ ଏବଂ ଆକ୍ରାନ୍ତଙ୍କ ଠିକ୍ ଚିକିତ୍ସା କରାଯାଇଥିବାରୁ ପଜିଟିଭ ସଂଖ୍ୟା କମିବାରେ ଲାଗିଛି ବୋଲି ଜିଲାପାଳ ବିଜୟ ଅମୃତା କୁଲାଙ୍ଗେ ଶୁକ୍ରବାର କହିଛନ୍ତି। ୧୦୦ ତଳକୁ ପଜିଟିଭ ସଂଖ୍ୟା ଖସିଥିବା ଜିଲାପାଳ ଟୁଇଟ କରି ସୂଚନା ଦେବା ସହ ଟିମ ଗଞ୍ଜାମକୁ ଧନ୍ୟବାଦ ଦେଇଛନ୍ତି ।
ଗଞ୍ଜାମ ଜିଲାରେ ଜୁଲାଇ ୧ ତାରିଖରେ ୯୫ ସଂକ୍ରମିତ ଚିହ୍ନଟ ହୋଇଥିଲେ। ପରଦିନ ଅର୍ଥାତ୍ ଜୁଲାଇ ୨ରେ ଆଉ ୨୮୩ ପଜିଟିଭ ଚିହ୍ନଟ ହୋଇଥିଲେ । ଏହାପରେ ଜିଲାରେ ଦୈନିକ ପଜିଟିଭ ସଂଖ୍ୟା ବଢ଼ିବାରେ ଲାଗିଲା । ଏପରିକି ଜୁଲାଇ ୨୩ ତାରିଖରେ ୭୩୨ ଜଣ ପଜିଟିଭ୍ ଚିହ୍ନଟ ହୋଇଥିଲେ। ଅଗଷ୍ଟ ୪ ତାରିଖରୁ ଧୀରେ ଧୀରେ ଆକ୍ରାନ୍ତଙ୍କ ସଂଖ୍ୟା କମିବାରେ ଲାଗିଛି । ସେପ୍ଟେମ୍ବରରେ ଆହୁରି ସତର୍କତା ସହ ଜରୁରୀ କୋଭିଡ୍ ଗାଇଡଲାଇନକୁ ପାଳନ କଲେ ଗଞ୍ଜାମରୁ କରୋନା ସମ୍ପୂର୍ଣ୍ଣ ହଟାଇ ହେବ ବୋଲି ଜିଲାପାଳ କହିଛନ୍ତି। ଜିଲାପାଳ ଗତ ୩ ଦିନ ହେଲା ବିଭିନ୍ନ ବ୍ଲକକୁ ଯାଇ ବିଡ଼ିଓ, ତହସିଲଦାର, ସିଡିପିଓ, ଏନଏସି ନିର୍ବାହୀ ଅଧକାରୀ, ପଞ୍ଚାୟତିରାଜ ପ୍ରତିନିଧି ଓ କୋଭିଡ ମନିଟରମାନଙ୍କ ସହ ସ୍ଥିତି ଆଲୋଚନା କରୁଛନ୍ତି । ଗଞ୍ଜାମରେ ବର୍ତ୍ତମାନ ସୁଦ୍ଧା ୧୮,୪୪୨ ଜଣ କରୋନାରେ ଆକ୍ରାନ୍ତ ହୋଇଛନ୍ତି । ସେଥିମଧ୍ୟରୁ ୧୭ ,୧୬୨ଜଣ ସୁସ୍ଥ ହୋଇଛନ୍ତି। ଯାହାକି ୯୩.୧ ପ୍ରତିଶତ ରହିଛି । ଏବେ ଜିଲାରେ ୧ ହଜାର ୭୩ ଜଣ ସକ୍ରିୟ ଆକ୍ରାନ୍ତ ଅଛନ୍ତି । ଜିଲାରେ ୧୯୯ ଆକ୍ରାନ୍ତଙ୍କ ମୃତ୍ୟୁ ହୋଇଛି । ଅଣ କୋଭିଡରେ ୮ ଜଣଙ୍କ ମୃତ୍ୟୁ ହୋଇଛି। ଗୁରୁବାର ଦିନକରେ ୯,୯୯୯ ଜଣଙ୍କ କରୋନା ଟେଷ୍ଟ କରାଯାଇଛି । ବର୍ତ୍ତମାନ ସୁଦ୍ଧା ଗଞ୍ଜାମରେ ୨ ଲକ୍ଷ ୯୦ ହଜାର ୨୧୭ ଜଣଙ୍କ କରୋନା ଟେଷ୍ଟ ହେଲାଣି। ଲକ୍ଷଣ ନ ଲୁଚାଇ ଟେଷ୍ଟ କରିବାକୁ ଜିଲାପାଳ କହିଛନ୍ତି । ଅନ୍ୟପକ୍ଷରେ କରୋନାରୁ ସୁସ୍ଥ ହେଉଥିବା ବ୍ୟକ୍ତିମାନେ ପ୍ଲାଜମା ଦାନ କରିବାକୁ ଆଗେଇ ଆସିବାକୁ ସେ ପୁଣି ଅନୁରୋଧ କରିଛନ୍ତି ।
