ଗଞ୍ଜାମ, ୫।୧୦ (ବିଦ୍ୟାଧର ସାହୁ): ଗଞ୍ଜାମ ସହରରେ ଆଲୋକୀକରଣ ବ୍ୟବସ୍ଥା ଏବେ ପ୍ରହସନରେ ପରିଣତ ହୋଇଛି। ଗତ ଅଗଷ୍ଟ ୩୧ ତାରିଖରେ ସହରରେ ଷ୍ଟ୍ରିଟ ଲାଇଟ ବ୍ୟବସ୍ଥାର ଶୁଭାରମ୍ଭ ହୋଇଥିଲା। ହେଲେ ଶୁଭାରମ୍ଭର କିଛି ଦିନ ପରେ ଅନେକ ଷ୍ଟ୍ରିଟ ଲାଇଟ ଅଚଳ ହୋଇପଡ଼ିଥିବା ବେଳେ ଏକ ମାସରୁ ଅଧିକ ସମୟ ବିତିଥିଲେ ମଧ୍ୟ ଏହାର ମରାମତି କରାଯାଇନାହିଁ। ଫଳରେ ସହରବାସୀ ଓ ବ୍ୟବସାୟୀମାନଙ୍କ ମଧ୍ୟରେ ଅସନ୍ତୋଷ ବଢ଼ିଛି।
ଜିଲାର ଅନ୍ୟ ଏନଏସିଗୁଡ଼ିକ ତୁଳନାରେ ଗଞ୍ଜାମ ଏନଏସି ବିକାଶରେ ପଛରେ ରହିଥିବା ନେଇ ଅଭିଯୋଗ ହୋଇଆସୁଛି। ଅନ୍ୟ ଏନଏସିଗୁଡ଼ିକରେ ପ୍ରାୟ ଚାରି ବର୍ଷ ପୂର୍ବରୁ ଆଲୋକୀକରଣ ବ୍ୟବସ୍ଥା ହୋଇସାରିଥିବା ବେଳେ ଗଞ୍ଜାମ ସହରରେ ଏହି ସୁବିଧା ବିଳମ୍ବରେ ଆରମ୍ଭ ହୋଇଥିଲା। ସହରରେ ଷ୍ଟ୍ରିଟ ଲାଇଟ ଲଗାଇବା ପାଇଁ ଲୋକେ ବାରମ୍ବାର ଏନଏସି ପ୍ରଶାସନକୁ ଅବଗତ କରାଇଥିଲେ। ଦୀର୍ଘ ଦିନର ଦାବି ପରେ ଅଗଷ୍ଟ ୩୧ରେ ଆଲୋକୀକରଣ ବ୍ୟବସ୍ଥାର ଶୁଭାରମ୍ଭ ହେବାରୁ ସହରବାସୀଙ୍କ ମଧ୍ୟରେ ଖୁସି ପ୍ରକାଶ ପାଇଥିଲା। ବିଶେଷକରି ବଡ଼ ବଜାର ଓ ସାନ ବଜାର ଅଞ୍ଚଳ ଆଲୋକିତ ହେବା ସହ ସହରବାସୀ ଅନ୍ଧାରରୁ ମୁକ୍ତି ପାଇବେ ବୋଲି ଆଶା କରିଥିଲେ।
ତେବେ ଏହି ଖୁସି ଅଧିକ ଦିନ ରହିଲା ନାହିଁ। କିଛି ଦିନ ମଧ୍ୟରେ ଅନେକ ଷ୍ଟ୍ରିଟ ଲାଇଟ ଜଳିବା ବନ୍ଦ ହୋଇଯାଇଥିଲା। ଏପର୍ଯ୍ୟନ୍ତ ମରାମତି ନହେବାରୁ ପୁଣି ଅନ୍ଧାରରେ ରହିଛି ସହରର ବିଭିନ୍ନ ଅଞ୍ଚଳ। ଷ୍ଟ୍ରିଟ ଲାଇଟ ଅଚଳ ରହିବା ଯୋଗୁ ରାତି ସମୟରେ ଯାତାୟାତ ସହ ଦୋକାନବଜାର ଉପରେ ମଧ୍ୟ ପ୍ରଭାବ ପଡ଼ୁଥିବା ସ୍ଥାନୀୟ ଲୋକେ କହିଛନ୍ତି। ତୁରନ୍ତ ଅଚଳ ଲାଇଟ୍ଗୁଡ଼ିକର ମରାମତି କରି ସହରକୁ ସମ୍ପୂର୍ଣ୍ଣ ଆଲୋକିତ କରିବାକୁ ସହରବାସୀ ଦାବି କରିଛନ୍ତି। ସମସ୍ୟାର ଶୀଘ୍ର ସମାଧାନ ନହେଲେ ଆଗାମୀ ଦିନରେ ଏହାକୁ ନେଇ ବଡ଼ ଧରଣର ଜନଆନ୍ଦୋଳନ ହୋଇପାରେ ବୋଲି ସହରରେ ଚର୍ଚ୍ଚା ଜୋର ଧରିଛି।