ଗଞ୍ଜାମ,୧୦।୫ (ବିଦ୍ୟାଧର ସାହୁ ): ପ୍ରଥମ ଥର ପାଇଁ ଗଞ୍ଜାମ ବ୍ଲକ ସ୍ତରୀୟ ସାମାଜିକ ଅପେରା ନାଟକ ପ୍ରତିଯୋଗିତା ଅନୁଷ୍ଠିତ ହେବ । ଆସନ୍ତା ୨୮ ରୁ ୧ ତାରିଖ ଅର୍ଥାତ ପାଞ୍ଚ ଦିନ ଧରି ଏହି ପ୍ରତିଯୋଗିତା ଅନୁଷ୍ଠିତ ହେବ । କଳାକୁ ବଞ୍ଚାଇବା ଏବଂ ଉପାର୍ଜିତ ଅର୍ଥ ଅନାଥ ଆଶ୍ରମକୁ ଦାନ କରାଯିବା ଲକ୍ଷ୍ୟରେ ଶ୍ରୀଜଗନ୍ନାଥ କଳା ସଂସ୍କୃତିକ ମଞ୍ଚ ଏହି ଭଳି ଏକ ପ୍ରତିଯୋଗିତା ଆୟୋଜନ କରୁଥିବା ଜଣା ପଡିଛି । ଏଥିପାଇଁ ସମସ୍ତ ପ୍ରସ୍ତୁତି ଶେଷ ପର୍ଯ୍ୟାୟରେ ବୋଲି ଆୟୋଜକ ସୂଚନା ଦେଇଛନ୍ତି ।
ସୁବଳୟା ଖେଳ ପଡିଆରେ ଗୋଟିଏ ମଞ୍ଚରେ ପୃଥକ ପୃଥକ ଭାବେ ପାଞ୍ଚ ଦିନ ଭିନ୍ନ ଭିନ୍ନ ଅନୁଷ୍ଠାନର ଭିନ୍ନ ଭିନ୍ନ ନାଟକ ପରିବେଶଣ ହେବ । ଏଥିପାଇଁ ସୁବଳୟା ଶାନ୍ତି କମିଟି ଓ ଆୟୋଜକଙ୍କ ମଧ୍ୟରେ ଏକ ଆଲୋଚନା ବୈଠକ ରାଧାକୃଷ୍ଣ ମନ୍ଦିର ପ୍ରାଙ୍ଗଣରେ ଅନୁଷ୍ଠିତ ହୋଇଥିଲା । ଆୟୋଜକଙ୍କ ପକ୍ଷରୁ ମଞ୍ଚ ସଭାପତି ଗୌରୀ ଶଙ୍କର ବାରିକି, କୋଷାଧକ୍ଷ ସନ୍ତୋଷ ନାହାକ, ନିର୍ଦ୍ଦେଶକ ନିରଞ୍ଜନ ମୁଦୁଲି, ଗଞ୍ଜାମ କଳା ସଂସ୍କୃତିକ ମଞ୍ଚ ସଭାପତି ଶବର କୁମାର ତରାଇ, ସୁବଳୟା ନିବାସୀ ବିଜୟ କୁମାର ବିଶ୍ୱାଳ, ଶାନ୍ତି କମିଟି ସଭାପତି ରାମହରୀ ସାହୁ, ସମ୍ପାଦକ ସୁଶାନ୍ତ କୁମାର ବେହେରା, କାଁହୁ ଚରଣ ନାୟକ, ରବୀନ୍ଦ୍ର କୁମାର ସାହୁ, ଗୋପବନ୍ଧୁ ସାହୁ ପ୍ରହଲ୍ଲାଦ ସାହୁ ପ୍ରମୁଖ ଉପସ୍ଥିତ ଥିଲେ ।
ପାଞ୍ଚ ଦିନ ଧରି ଅନୁଷ୍ଠିତ ହେବାକୁ ଥିବା ନାଟକ ପ୍ରତିଯୋଗିତାକୁ ସମସ୍ତ ସହଯୋଗ କରିବାକୁ କମିଟି ପ୍ରତିଶୃତି ଦେଇଥିଲେ । ଯାଜପୁର ଜିଲାର ବିଚାରକମାନଙ୍କ ଦ୍ୱାରା ବିବେଚିତ ଦୁଇଟି ନାଟକକୁ ପ୍ରଥମ ଓ ଦ୍ୱିତୀୟ ଶ୍ରେଷ୍ଠ ନାଟକ ଘୋଷିତ କରାଯିବ ଏବଂ ପ୍ରଥମ ହୋଇଥିବା ନାଟକ ପରିଚାଳକଙ୍କୁ ଟ୍ରଫି ସହ ପଚାଶ ହଜାର ଓ ଦ୍ୱିତୀୟଙ୍କୁ ତିରିଶ ହଜାର ଟଙ୍କା ଓ ଟ୍ରଫି ପ୍ରଦାନ କରାଯିବ ବୋଲି ମଞ୍ଚ ଆବାହକ ଶଙ୍କର ବାରିକି ଗଣମାଧ୍ୟମକୁ ସୂଚନା ଦେଇଛନ୍ତି । ଶୁଭାରମ୍ଭ ଦିବସରେ ମା ନାରାୟଣୀ ଯୁବ ନାଟ୍ୟ ସଙ୍ଘ ପକ୍ଷରୁ ନିର୍ଦ୍ଦେଶକ ଯୋଗେନ୍ଦ୍ର କୁମାର ସେଠୀଙ୍କ ରୁପା ଶଗଡ଼ରେ ସୁନା କନିଆ, ୨୯ରେ ବାବା ଲଙ୍ଗଳେଶ୍ୱର ନାଟ୍ୟ ସଙ୍ଘ ନିର୍ଦ୍ଦେଶକ ପ୍ରଶାନ୍ତ କୁମାର ଦାସଙ୍କ ନାଟକ ଏଇ ଫଗୁଣରେ ବାଜିବ ବାଜା, ୩୦ରେ ଗଞ୍ଜାମ କଳା ସଂସ୍କୃତିକ ମଞ୍ଚ ନିର୍ଦ୍ଦେଶକ ଡ଼ଃ ଗୌରୀ ଶଙ୍କର ଶତପଥୀଙ୍କ ସେଇ ଗୋଟିଏ ଭୁଲ ପାଇଁ, ୩୧ରେ ଗୋପାଳ କୃଷ୍ଣ ଯୁବ ନାଟ୍ୟ ସଙ୍ଘ (ସୁବଳୟା )ନିର୍ଦ୍ଦେଶକ ସ୍ମୃତି ରଞ୍ଜନ ବରାଳଙ୍କ ସ୍ୱାମୀ ପାଇଁ ପଛେ ନର୍କକୁ ଯିବି ଏବଂ ଜୁନ 1 ରେ ଗୋବିନ୍ଦେଶ୍ୱର ନାଟ୍ୟ ସଙ୍ଘ ନିର୍ଦ୍ଦେଶକ ସୁରେଶ ନାୟକଙ୍କ କାନ୍ଦେନା ଲୁହ ସରିଯିବ ନାଟକ ପରିବେଷଣ ହେବ ।