ଗୋପାଳପୁର, ୨୪।୬(ନବୀନ ରାଜ ଆଚାରୀ): ଗଞ୍ଜାମ ଜିଲ୍ଲା ଗୋପାଳପୁର ବେଳାଭୂମିରେ କଲେଜ ଛାତ୍ରୀଙ୍କୁ ଗଣବଳାତ୍କାର ଘଟଣା ଏବେ କ୍ରାଇମବ୍ରାଞ୍ଚ (ସିଏଡବ୍ଲୁ) ତଦନ୍ତ କରୁଛି। ବ୍ରହ୍ମପୁର ପ୍ରଥମଶ୍ରେଣୀ ବିଚାର ବିଭାଗୀୟ ମାଜ୍ରିଷ୍ଟେଟ କୋର୍ଟ (ଗ୍ରାମାଞ୍ଚଳ)ଙ୍କଠାରେ କ୍ରାଇମବ୍ରାଞ୍ଚ ପକ୍ଷରୁ ରିମାଣ୍ଡ ପାଇଁ ଆବେଦନ କରାଯାଇଥିବା ବେଳେ ଦୁଇଦିନିଆ ରିମାଣ୍ଡ ମଞ୍ଜୁର ହୋଇଛି। ଏହିକ୍ରମରେ କ୍ରାଇମବ୍ରାଞ୍ଚ ଟିମ ମଙ୍ଗଳବାର ଅପରାହ୍ନରେ ବ୍ରହ୍ମପୁର ମଣ୍ଡଳ କାରାଗାରରେ ପହଞ୍ଚି ୬ଜଣ ଅଭିଯୁକ୍ତଙ୍କୁ କଡ଼ା ସୁରକ୍ଷା ବଳୟରେ ଗୋପାଳପୁର ଅଭିମୁଖେ ନେଇଥିଲା। ଏନ୍ଏସିରେ ଥିବା ପ୍ରାଥମିକ ସାସ୍ଥ୍ୟକେନ୍ଦ୍ରରେ ୬ଜଣ ଅଭିଯୁକ୍ତଙ୍କର ସାସ୍ଥ୍ୟ ଯାଞ୍ଚ କରାଯିବା ପରେ ଗୋପାଳପୁର ଥାନାକୁ ନିଅଯାଇଥିଲା। ସେଠାରେ କ୍ରାଇମବ୍ରାଞ୍ଚ ଟିମ୍ ଅଭିଯୁକ୍ତମାନଙ୍କୁ ଘଟଣା ସମ୍ପର୍କ ଜେରା କରିଥିବା ସୂଚନା ମିଳିଛି। ଏଥିସହ ସିଏଡବ୍ଲୁ ଆଇଜି ଏସ୍ ସଇନି ମଧ୍ୟ ଉପସ୍ଥିତ ରହି ସେମାନଙ୍କୁ ଜେରା କରିଥିବା ଜଣାପଡ଼ିଛି।
କ୍ରାଇମବ୍ରାଞ୍ଚ ଘଟଣା ଘଟିବା ପୂର୍ବ ଓ ପର ପାରିପାଶ୍ବିକ ସ୍ଥିତି, ଡିଜିଟାଲ ପ୍ରମାଣପତ୍ର ଓ ଅନେକ ଗୁରୁତ୍ୱପୂର୍ଣ୍ଣ ପ୍ରମାଣ ଯୋଗାଡ଼ କରି ତଦନ୍ତକୁ ଆଗେଇ ନେଉଛି। କୋର୍ଟରେ ଏଗୁଡ଼ିକ ଉପସ୍ଥାପନ କରି ଅଧିକ ଗୁରୁତ୍ୱ ଦେଇଛି। ଖୁବଶୀଘ୍ର ଏହି ମାମଲାର କ୍ରାଇମବ୍ରାଞ୍ଚ ଚାର୍ଜସିଟ କୋର୍ଟରେ ଦାଖଲ କରିବ ବୋଲି ସୂଚନା ମିଳିଛି। ଅନ୍ୟପଟେ ଘଟଣାପରଠାରୁ ଗୋପାଳପୁର ବେଳାଭୂମି ପୋଲିସ ପକ୍ଷରୁ ପାଟ୍ରୋଲିଂ କଡାକଡ଼ି କରାଯାଉଥିବା ଦେଖିବାକୁ ମିଳିଛି l ଏହି ଘଟଣା ପଲ୍ଲୀରୁ ଦିଲ୍ଲୀ ଯାଏ ବ୍ୟାପିଥିବା ବେଳେ ସବୁ ସ୍ତରରେ କଡ଼ା ନିନ୍ଦା କରାଯାଇଛି। ଜାତୀୟ ମହିଳା ଆୟୋଗ ଏହି ଘଟଣାରେ ହସ୍ତକ୍ଷେପ କରିବା ପରେ ସୋମବାର ଜାତୀୟ ମାନବାଧିକାର କମିଶନ ଆୟୋଗ ନିଜଆଡ଼ୁ ମାମଲା ରୁଜୁ କରିଛି। ପୋଲିସ ମହା ନିର୍ଦ୍ଦେଶକ ଓ ମୁଖ୍ୟ ଶାସନ ସଚିବଙ୍କୁ ସମ୍ପୂଣ୍ଣର୍ର୍ ତଦନ୍ତ ରିପୋର୍ଟକୁ ଦୁଇ ସପ୍ତାହରେ ଦାଖଲ ନିର୍ଦ୍ଦେଶ ଦେଇଛନ୍ତି।
ସୂଚନାଯୋଗ୍ୟ, ଗତ ୧୫ତାରିଖରେ ପୁରୁଷ ବନ୍ଧୁଙ୍କ ସହିତ ଯୁକ୍ତଦୁଇ ଶେଷ ବର୍ଷର ଛାତ୍ରୀ ଜଣଙ୍କ ଗୋପାଳପୁର ବେଳାଭୂମିକୁ ବୁଲିବାକୁ ଆସିଥିଲେ। ଛାତ୍ରୀଙ୍କୁ ଏକ ନିର୍ଜନ ସ୍ଥାନକୁ ଉଠାଇ ନେଇ ଉପରୋକ୍ତ ଅଭିଯୁକ୍ତମାନେ ତାଙ୍କୁ ଗଣବଳାତ୍କାର ଶିକାର ହୋଇଥିଲେ। ଏନେଇ ପୋଲିସ ତତ୍ପର ହୋଇ ୬ଅଭିଯୁକ୍ତଙ୍କୁ ଗିରଫ କରିବା ସହ ଚାରି ନାବାଳକଙ୍କୁ ଜେଜେବିରେ ହାଜର କରିଥିଲା।
