ବରପାଲି, ୮ ।୪(ଚିତ୍ତରଞ୍ଜନ ସାହୁ): ବରଗଡ଼ ଜିଲା ବରପାଲି ଥାନା ଅନ୍ତର୍ଗତ ବରମକେଲା ଗ୍ରୀଣ୍ଡୋଲା ଜଙ୍ଗଲରେ ଚାଲିଥିବା ଏକ ବଡ଼ ଧରଣର ଜୁଆ ଆଡ୍ଡା ଉପରେ ପୋଲିସ ଚଢ଼ାଉ କରିଛି। ଏହି ଘଟଣାରେ ପୋଲିସ ୧୬ ଜଣଙ୍କୁ ଗିରଫ କରିବା ସହ ସେମାନଙ୍କ ପାଖରୁ ଲକ୍ଷାଧିକ ଟଙ୍କା ଓ ଗାଡ଼ି ଜବତ କରିଛି। ଗିରଫ ଅଭିଯୁକ୍ତମାନେ ହେଲେ, ବରଗଡ଼ ଜିଲା ଭେଡେନ ଥାନା ଅନ୍ତର୍ଗତ ଜାଣ୍ଡୋଲ ଗ୍ରାମର ସଦାଶିବ ମେହେର(୩୫), ବରପାଲି ଥାନା ବରମକେଲାର କ୍ଷିରୋଦ୍ର ବାଗ (୪୯), ବରଗଡ଼ ସଦର ଥାନା ସହରାପାଲିର ପ୍ରଦିପ ଝାଙ୍କର(୩୬), ଅତାବିରା ଥାନା ଡାଲବୀର ଉପେନ୍ଦ୍ର ରଣା(୩୫), ଗ୍ରୀଣ୍ଡୋଲାର ଗୋପାଳକୃଷ୍ଣ ସାହୁ (୪୫), ଭେଡେନ ଥାନା ଲିମଟିକ୍ରାର ହେମବନ୍ତ ଗରିଆ (୩୯), ବରମକେଲାର ନିର୍ମଳ ପ୍ରଧାନ (୩୮), ବରଗଡ଼ ସଦର ଥାନା କଣ୍ଠସ୍ୱର ମନବୋଧ ନାଗ (୬୧), ବରପାଲି ଥାନା ଗ୍ରୀଣ୍ଡୋଲାର ବନବସ ଓରଫ ଲମ୍ବୋଦର ଭୋଇ (୫୦), ବରଗଡ଼ ସଦର ଥାନା ନୂଆଗଡର କେଶବ ସାହୁ(୪୮), ସୋମ ସାଥୁଆ (୪୨), ଛତିଶଗଡ଼ ରାଜ୍ୟ ଯଶପୁର ଜିଲା ତୁମୁଲା ଥାନା ସକଜୋର ଗ୍ରାମର ସୁନିଲ ଭରଦ୍ୱାଜ (୩୩), ଭେଡେନ ଥାନା ଡାଲବର ଶ୍ୟାମ ସେଠ୍ (୩୧), ସୁନ୍ଦରଗଡ଼ ଜିଲା କିନ୍ଜିରକେଲା ଥାନା କରୁଆବାହାଲ ଗ୍ରାମର ଅନିଲ ରୋହିଦାସ (୩୦), ଭେଡେନ ଥାନା ବହଲପାଲିର ଡାକ୍ତର ପ୍ରଧାନ (୩୬) ଏବଂ ସୁନ୍ଦରଗଡ଼ ଜିଲା କିନ୍ଜିରକେଲା ଥାନା କରୁଆବାହାଲ ଗ୍ରାମର ମହେନ୍ଦ୍ର ରୋହିଦାସ୍ (୪୦) ।
ବୁଧବାର ପୂର୍ବାହ୍ନରେ ଜଙ୍ଗଲ ଭିତରେ ‘ଘୁଡୁଘୁଡୁ ପଟି’ ଜୁଆ ଖେଳ ଚାଲିଥିବା ନେଇ ବରପାଲି ପୋଲିସକୁ ବିଶ୍ୱସ୍ତ ସୂତ୍ରରୁ ଖବର ମିଳିଥିଲା। ଏହାପରେ ପୋଲିସ ଏକ ଟିମ ଗଠନ କରି ସେଠାରେ ଅତର୍କିତ ଚଢ଼ାଉ କରିଥିଲା। ଚଢ଼ାଉ ସମୟରେ ଖସି ପଳାଇବାକୁ ଚେଷ୍ଟା କରୁଥିବା ୧୬ ଜଣ ଜୁଆଡ଼ିଙ୍କୁ ପୋଲିସ କାବୁ କରିଥିଲା।
ପୋଲିସ ସେମାନଙ୍କ ନିକଟରୁ ନଗଦ ୧ ଲକ୍ଷ ୯ ହଜାର ୩୮୦ ଟଙ୍କା, ୨ଟି କାର୍ ଏବଂ ୧୫ଟି ମୋଟର ସାଇକେଲ ଏବଂ ଜୁଆ ଖେଳରେ ବ୍ୟବହୃତ ଘୁଡୁଘୁଡୁ ପଟି ଜବତ କରିଛି। ଏହି ଘଟଣାକୁ ନେଇ ବରପାଲି ଥାନାରେ କେସ ନମ୍ବର ୧୪୯/୨୬ରେ ଏକ ମାମଲା ରୁଜୁ କରାଯାଇଛି। ଘଟଣାରେ ଅଧିକ ତଦନ୍ତ ଜାରି ରଖିଛି।
