ଇସଲାମାବାଦ,୧୮।୨ : ପାକିସ୍ତାନରେ ଯୁବବର୍ଗଙ୍କ ଭବିଷ୍ୟତ ଅନ୍ଧକାର ହେବାରେ ଲାଗିଛି। ଫଳରେ ଏବେ ଯୁବବର୍ଗ ଦେଶଛାଡ଼ି ବିଦେଶ ମୁହାଁ ହେବାରେ ଲାଗିଛନ୍ତି। ପାକିସ୍ତାନରେ ଳାଗି ରହିଥିବା ଆର୍ଥିକ ସଙ୍କଟ ଏବଂ ଭବିଷ୍ୟତ ଅନିଶ୍ଚିତତା ଯୋଗୁ ହଜାର ହଜାର ଲୋକ କାମ ଖୋଜିବା ପାଇଁ ବିଦେଶ ଯିବା ଆରମ୍ଭ କରିଛନ୍ତି। ସେମାନଙ୍କ ମଧ୍ୟରେ ବହୁ ସଂଖ୍ୟକ ଶିକ୍ଷିତ ବ୍ୟକ୍ତି ଏବଂ କୁଶଳୀ ଶ୍ରମିକ ଅଛନ୍ତି । ବିଶେଷଜ୍ଞମାନେ କହିଛନ୍ତି ଯେ ଯଦି ଏହି ପ୍ରକ୍ରିୟା ବନ୍ଦ ନ ହୁଏ ତେବେ ପାକିସ୍ତାନର ଦୀର୍ଘମିଆଦି ଭବିଷ୍ୟତ ଯୋଜନା ମଧ୍ୟ ଅନ୍ଧକାର ହୋଇଯିବ।
ବ୍ୟୁରୋ ଅଫ ଇମିଗ୍ରେଶନ ଏବଂ ଓଭରସିଜ ଏମ୍ପ୍ଲୟମେଣ୍ଟ, ପାକିସ୍ତାନ ସରକାରଙ୍କ ସର୍ବଶେଷ ତଥ୍ୟ ଅନୁଯାୟୀ, ୨୦୨୨ମସିହାରେ ୮,୩୨,୩୩୯ ପାକିସ୍ତାନୀ ବିଦେଶ ଯାଇଥିଲେ। ୨୦୧୬ପରେ, ଏତେ ସଂଖ୍ୟକ ଲୋକ ପାକିସ୍ତାନରୁ ବାହାରକୁ ଯାଇ ନ ଥିଲେ। ଗତ ବର୍ଷ ସର୍ବାଧିକ ସଂଖ୍ୟକ ଲୋକ ସୌଦି ଆରବ ଯାଇଥିଲେ। ସେମାନଙ୍କ ସଂଖ୍ୟା ପାଞ୍ଚ ଲକ୍ଷ ୧୪ ହଜାରରୁ ଅଧିକ ଥିଲା।
କ୍ୱେଟା ଭିତ୍ତିକ ଇମିଗ୍ରେଶନ ଓକିଲ ଅହମ୍ମଦ ଜମାଲଙ୍କ ଅନୁଯାୟୀ, ବିଦେଶ ଯାଇଥିବା ଲୋକଙ୍କ ସଂଖ୍ୟା ସରକାରୀ ଭାବେ ରେକର୍ଡ ହୋଇଥିବା ସଂଖ୍ୟାଠାରୁ ଅଧିକ। ସେ କହିଛନ୍ତି ଯେ ଏହି ସଂଖ୍ୟାଗୁଡିକ କେବଳ କାର୍ଯ୍ୟ ଭିଜା ନେଇ ବିଦେଶ ଯାଇଥିବା ଲୋକଙ୍କ ସଂଖ୍ୟା ଦର୍ଶାଉଛି। ଯଦି ଭ୍ରମଣ ଭିଜା, ସ୍ଥାୟୀ ଆବାସ ଭିଜା, ଛାତ୍ର ଭିଜା ଏବଂ ସେଟମେଣ୍ଟ ଭିଜା ଆଦି ଲୋକଙ୍କ ସଂଖ୍ୟା ମଧ୍ୟ ବିଚାରକୁ ନିଆଯାଏ, ତେବେ ମୋଟ ସଂଖ୍ୟା ବହୁତ ଅଧିକ ହେବ ।
ସାଧାରଣ ଲୋକଙ୍କ ଅନୁସାରେ ଦେଶରେ ଚାଲିଥିବା ପରିସ୍ଥିତି ମଧ୍ୟରେ କେହି ଏଠାରେ ରହିବାକୁ ପସନ୍ଦ କରୁ ନାହାନ୍ତି । ଦେଶର ଅର୍ଥନୀତି ବିପର୍ଯ୍ୟସ୍ତ ହୋଇପଡିଛି। ଜାନୁଆରୀରେ ମୁଦ୍ରାସ୍ଫୀତି ହାର ୨୭.୬ ପ୍ରତିଶତ ରହିଥିଲା। ଦେଶରେ ମାତ୍ର ତିନି ବିଲିୟନ ଡଲାର ବୈଦେଶିକ ମୁଦ୍ରା ରହିଛି। ପାକିସ୍ତାନର ମୁଣ୍ଡପିଛା ବାର୍ଷିକ ଆୟ ୧,୬୫୮ ଡଲାରକୁ ଖସି ଆସିଛି।
ବିଶେଷଜ୍ଞଙ୍କ ଅନୁଯାୟୀ, ଯୁବବର୍ଗମାନେ ଦେଶରେ ସେମାନଙ୍କର ଭବିଷ୍ୟତ ଅନ୍ଧାର ହେଉଥିବା ଅନୁଭବ କରିବା ଆରମ୍ଭ କରିଛନ୍ତି। ଦେଶର ୬୦ ପ୍ରତିଶତରୁ ଅଧିକ ଜନସଂଖ୍ୟା ୩୦ ବର୍ଷରୁ କମ। ସାଧାରଣ ସୁରକ୍ଷା ଠାରୁ ଆରମ୍ଭ କରି ଅର୍ଥନୀତି ପର୍ଯ୍ୟନ୍ତ ଅନେକ କାରଣ ରହିଛି, ଯାହା ଯୁବବର୍ଗମାନଙ୍କୁ ବିଦେଶ ଯିବାକୁ ବାଧ୍ୟ କରୁଛି ବୋଲି ଅର୍ଥନୀତିଜ୍ଞମାନେ ମତପୋଷଣ କରିଛନ୍ତି।
