ରାହାମା, ୨ା୬(ଡି.ଏନ.ଏ.): କୁଜଙ୍ଗ ବ୍ଲକ ଅନ୍ତର୍ଗତ ପଣ୍ଡୁଆ ପଞ୍ଚାୟତ ହାତୀକେନା ଗଁାର ପ୍ରଶାନ୍ତ କୁମାର ସାହୁ (୪୭) କର୍କଟ ରୋଗରେ ଆକ୍ରାନ୍ତ ହୋଇଛନ୍ତି। ଚିକିତ୍ସା ପାଇଁ ଡାକ୍ତରଖାନା ଧାଇଁ ଧାଇଁ ନୟାନ୍ତ ହୋଇପଡିଲେଣି। ପ୍ରଶାନ୍ତ ଜଣେ ଗରିବ ବ୍ୟକ୍ତି। ସେ ମୂଲ ମଜୁରି ଲାଗି ବୃଦ୍ଧ ମା’ ବାପା, ସ୍ତ୍ରୀ ଓ ୨ ପୁଅଙ୍କୁ ମିଶାଇ ୬ ପ୍ରାଣୀ କୁଟୁମ୍ବଙ୍କୁ ପ୍ରତିପୋଷଣ କରନ୍ତି। ବର୍ତ୍ତମାନ କର୍କଟ ରୋଗରେ ପୀଡିତ ହୋଇ ପରିବାରର ଭରଣ ପୋଷଣ ତ ଦୂରର କଥା ନିଜର ଚିକିତ୍ସା ଲାଗି ଲକ୍ଷାଧିକ ଟଙ୍କା ଦରକାର ହେଉଥିବାରୁ ଚିନ୍ତାରେ ପଡିଛନ୍ତି। ସ୍ତ୍ରୀଙ୍କର ସମସ୍ତ ସୁନା ଗହଣା ବିକ୍ରି ହୋଇ ସାରିଥିଲେ ମଧ୍ୟ ଧାରକରଜ କରି ଅସହାୟ ହୋଇ ପଡିଲେଣି। ୨ ପୁଅଙ୍କର ପାଠ ପଢାରେ ଡୋରି ବନ୍ଧା ହେଲାଣି। ଏପରି ଅବସ୍ଥାରେ ତାଙ୍କ ଚିକିତ୍ସା ନିମନ୍ତେ ଅର୍ଥର ଆବଶ୍ୟକତା ରହିଛି। ତେଣୁ ବଦାନ୍ୟ ବ୍ୟକ୍ତିଙ୍କ ସହ ପ୍ରଶାସନ ପକ୍ଷରୁ ଯଦି ସାହାଯ୍ୟ ମିଳନ୍ତା ତାହାଲେ ତାଙ୍କ ଚିକିତ୍ସା ସାଙ୍ଗକୁ ପିଲା ପାଠ ପଢି ପାରନ୍ତେ ବୋଲି ସାମାଜିକ କର୍ମୀ ଡ. ସୁନାକର ବେହେରା ନିବେଦନ କରିଛନ୍ତି।
