ଜଗତ୍ସିଂହପୁର ଅଫିସ, ୨୭ା୮: ଜଗତ୍ସିଂହପୁର ଚାଟରା ବିଶୋଇ ସାହିର ଟୁନି ଦେଈ(୮୩) ୨ ପୁଅ ଓ ଗୋଟିଏ ଝିଅ ଜନ୍ମ କରି ମଧ୍ୟ ଅସହାୟ। କାରଣ ଯେଉଁ ୨ ପୁଅଙ୍କ କାନ୍ଧରେ ଢିରା ଦେଇ ଶେଷ ଜୀବନ କାଟିଦେବେ ବୋଲି ଭାବିଥିଲେ ତାହା ସ୍ବପ୍ନରେ ରହିଗଲା। ପୁଅ ଦୁହେଁ ପଚାରିଲେ ନାହିଁ। ଝିଅଟି ଦୃଷ୍ଟି ଶକ୍ତି ହରାଇଥିବାରୁ ତାର ବୋଝ ବୃଦ୍ଧାଙ୍କୁ ମୁଣ୍ଡାଇବାକୁ ପଡୁଛି। ଏଣେ ଆଖି ସମସ୍ୟା ବୋଝ ଉପରେ ନଳିତା ବିଡା ସଦୃଶ ହୋଇଛି। କିଛି ଦିନ ପୂର୍ବରୁ ଚାଟରାରେ ଏକ ବେସରକାରୀ ଅନୁଷ୍ଠାନ ପକ୍ଷରୁ ଆଇ କ୍ୟାମ୍ପ ପଡ଼ିିଥିଲା। ଗାଁ ଲୋକଙ୍କ ପରାମର୍ଶକ୍ରମେ ବୃଦ୍ଧା ସେଠାକୁ ଗଲାପରେ ଆଶ୍ୱାସନା ମିଳିଥିଲା। ମାଗଣାରେ ମୋତିଆବିନ୍ଦୁ ଅସ୍ତ୍ରୋପଚାର ପାଇଁ ଶୁକ୍ରବାର ଦିନଧାର୍ଯ୍ୟ କରାଯାଇଥିଲା। ଏହି ଅନୁଯାୟୀ ବୃଦ୍ଧା ଜଗତ୍ସିଂହପୁରସ୍ଥିତ ଉକ୍ତ ଭିଜନ କେୟାରରେ ପହଞ୍ଚତ୍ଥିଲେ। ସେଠାରେ ଆଖି ପରୀକ୍ଷା କଲାବେଳେ ଚମ ମାଡି ଯାଇଥିବା ଜଣାଯାଇଥିଲା । ତେଣୁ ପ୍ରଥମେ ଏହି ଅସ୍ତ୍ରୋପଚାର କରାଯିବା ଜରୁରୀ ଏବଂ ଏନେଇ ୮ ହଜାର ଟଙ୍କା ଆବଶ୍ୟକ ବୋଲି କୁହାଯାଇଥିଲା। ଏତେ ଟଙ୍କା ବୃଦ୍ଧାଙ୍କ ପକ୍ଷରେ ଯୋଗାଡ କରିବା ଅସମ୍ଭବ ଥିଲା। ସେଠାରେ ଉପସ୍ଥିତ ନାଉଗାଁ ବ୍ଲକ ଅନ୍ତର୍ଗତ ଏରଡ଼ା ଗ୍ରାମର ଅନ୍ତର୍ଯ୍ୟାମୀ ବିଶ୍ୱାଳ ବୃଦ୍ଧାଙ୍କୁ କେଉଁ ପ୍ରକାରେ ସହଯୋଗ କରିହେବ ଚିନ୍ତା କରିଥିଲେ। ନାଉଗାଁ ଡେଭେଲପମେଣ୍ଟ ଫୋରମ୍ ହ୍ବାଟ୍ସ ଆପ୍ ଗ୍ରୁପ୍ରେ ସହାୟତା ପାଇଁ ପୋଷ୍ଟ କରିଥିଲେ। କିଛି ସମୟ ପରେ ଫୋରମ୍ ପକ୍ଷରୁ ମାଗଣା ଅସ୍ତ୍ରୋପଚାର ପାଇଁ ପ୍ରତିଶ୍ରୁତି ମିଳିଥିଲା। ଏ ସମ୍ପର୍କରେ ଫୋରମ୍ ସଦସ୍ୟ ଚନ୍ଦନ କୁମାର ଲେଙ୍କା, ଅନୁପ ବିଶ୍ୱାଳ, ବିଜନ କୁମାର ଲେଙ୍କା ଓ ରାଜା ତାରେଣିଆ ପ୍ରମୁଖ କହିଛନ୍ତି, ବୃଦ୍ଧାଙ୍କ ଆଖି ଅସ୍ତ୍ରୋପଚାର ଦାୟିତ୍ୱ ସେମାନେ ନେବେ। ଆସନ୍ତା ଗୁରୁବାର ଅନ୍ୟ ଏକ ଚକ୍ଷୁ ଚିକିତ୍ସାଳୟରେ ମାଗଣା ଅସ୍ତ୍ରୋପଚାର ପାଇଁ ସହାୟତା କରିବେ। ତାର ୫ରୁ ୬ ଦିନ ପରେ ଜଗତ୍ସିଂହପୁରସ୍ଥିତ ଭିଜନ କେୟାରରେ ଟୁନି ବିଜୁ ସ୍ବାସ୍ଥ୍ୟ କଲ୍ୟାଣ କାର୍ଡ ମାଧ୍ୟମରେ ମାଗଣା ମୋତିଆବିନ୍ଦୁ ଅସ୍ତ୍ରୋପଚାର କରିପାରିବେ । ଫୋରମ ପକ୍ଷରୁ ଏହି ପ୍ରତିଶ୍ରୁତି ମିଳିଲା ପରେ ଏବେ ବୃଦ୍ଧା ଆତ୍ମସନ୍ତୋଷ ଲାଭ କରିବା ସହ ଆଶାବାଦୀ ଅଛନ୍ତି । ଏ ସମ୍ପର୍କରେ ଟୁନି କହିଛନ୍ତି ଦୃଷ୍ଟିହୀନ ଝିଅଟିର ସମସ୍ତ ଦାୟିତ୍ୱ ତାଙ୍କ ଉପରେ ନ୍ୟସ୍ତ। ତାଙ୍କ ଆଖିକୁ ଦେଖା ନ ଗଲେ ଝିଅ ବଞ୍ଚତ୍ବା କଷ୍ଟକର ହୋଇପଡିବ। ସୂଚନାଯୋଗ୍ୟ, ବୃଦ୍ଧାଙ୍କ ନାଁରେ ରାଶନ କାର୍ଡ ରହିଥିବାରୁ ୫ କିଲୋଗ୍ରାମ ଚାଉଳ ଓ ବାର୍ଦ୍ଧକ୍ୟ ଭତ୍ତା ପାଉଛନ୍ତି। ଝିଅକୁ ମଧ୍ୟ ଭିନ୍ନକ୍ଷମ ଭତ୍ତା ମିଳୁଛି । ଭତ୍ତା ଟଙ୍କାରେ ସେମାନେ କଷ୍ଟେମଷ୍ଟେ ଚଳିଯାଉଛନ୍ତି ।
