ବସ୍ତି, ୨୨ା୧:ଉତ୍ତରପ୍ରଦେଶର ବସ୍ତି ଜିଲାରୁ ଏକ ଅଜବ ପ୍ରେମ ବିବାହ ଘଟଣା ସାମ୍ନାକୁ ଆସିଛି। ପ୍ରେମିକା ଅନୁ ସୋନୀ(୩୦)ଙ୍କୁ ବିବାହ କରିବା ପାଇଁ ସଦ୍ଦାମ ହୁସେନ(୩୪) ନାମକ ଜଣେ ମୁସଲମାନ ଯୁବକ ନିଜ ଧର୍ମ ପରିବର୍ତ୍ତନ କରି ଶିବଶଙ୍କର ହୋଇଛନ୍ତି। ସେ ହିନ୍ଦୁଧର୍ମ ଗ୍ରହଣ କରି ପ୍ରଥମେ ନିଜକୁ ଗଙ୍ଗା ଜଳରେ ପବିତ୍ର କରାଇଥିଲେ ଓ ଏହାପରେ ଅନୁଙ୍କୁ ବିବାହ କରିଥିଲେ।
ବସ୍ତି ଜିଲା ନଗର ବଜାର ଗ୍ରାମରେ ଉଭୟ ସଦ୍ଦାମ ଓ ଅନୁ ପରିବାର ସହ ରହୁଥିଲେ। ଦୀର୍ଘ ୧୦ ବର୍ଷ ଧରି ଦୁହେଁ ପରସ୍ପରକୁ ଭଲ ପାଉଥିଲେ। ତେବେ ଦୁହିଙ୍କର ଧର୍ମ ଅଲଗା ହୋଇଥିବାରୁ ବିବାହ କରିବା ସେମାନଙ୍କ ପକ୍ଷେ ସମ୍ଭବ ନ ଥିଲା। ବିବାହ ପାଇଁ ସଦ୍ଦାମଙ୍କ ପରିବାର ଲୋକେ ଅରାଜି ହେଉଥିଲେ।
ଅନୁ ଅନେକଥର ବିବାହ କରିବା ଲାଗି ସଦ୍ଦାମଙ୍କ ଉପରେ ଚାପ ପକାଉଥିଲେ ମଧ୍ୟ ତାଙ୍କୁ ସଫଳତା ମିଳି ନ ଥିଲା। ଏଥିରେ ଉତ୍କ୍ଷିପ୍ତ ହୋଇ ଅନୁ ଗତ ଶୁକ୍ରବାର ସଦ୍ଦାମ ଓ ତାଙ୍କ ପରିବାର ବିରୋଧରେ ବିବାହ ବାହାନାରେ ବଳାତ୍କାର, ହତ୍ୟା ଧମକ ଆଦି ଅଭିଯୋଗ କରିଥିଲେ। ଅନୁଙ୍କ ଅଭିଯୋଗ ଆଧାରରେ ପୋଲିସ ସଦ୍ଦାମ ଓ ତାଙ୍କ ପରିବାର ବିରୋଧରେ ମାମଲା ମଧ୍ୟ ରୁଜୁ କରିଥିଲା। ତେବେ ଏହାର ଠିକ୍ ୩ ଦିନ ପରେ ସୋମବାର ନଗର ବଜାର ଗ୍ରାମର ଏକ ମନ୍ଦିରରେ ହିନ୍ଦୁ ରୀତିନୀତି ଅନୁଯାୟୀ ସଦ୍ଦାମ ପ୍ରେମିକା ଅନୁଙ୍କୁ ବିବାହ କରିଥିଲେ। ଉଭୟ ସଦ୍ଦାମ ଓ ଅନୁ ନିଜ ଇଚ୍ଛାରେ ବିବାହ କରିଛନ୍ତି ବୋଲି ପୋଲିସକୁ ଜଣାଇଛନ୍ତି। ହିନ୍ଦୁଧର୍ମ ଗ୍ରହଣ କରିବା ସହ ନିଜ ନାମ ପରିବର୍ତ୍ତନ କରିଥିବା ସଦ୍ଦାମ କହିଛନ୍ତି, ସେ ଗତ କିଛିଦିନ ହେବ ହିନ୍ଦୁଧର୍ମକୁ ପସନ୍ଦ କରୁଥିଲେ। କିନ୍ତୁ ଅଲଗା ଧର୍ମର ହୋଇଥିବାରୁ ଏବଂ ପାରିବାରିକ ଚାପ କାରଣରୁ ସେ ଖୋଲାଖୋଲି ଭାବେ ହିନ୍ଦୁଧର୍ମକୁ ସ୍ବୀକାର କରି ପାରୁ ନ ଥିଲେ। ସୁଯୋଗ ମିଳିବା ମାତ୍ରେ ସେ ସ୍ଥାନୀୟ ହିନ୍ଦୁ ସଙ୍ଗଠନର ସହଯୋଗରେ ଇସ୍ଲାମ ଧର୍ମ ଛାଡ଼ି ହିନ୍ଦୁ ଧର୍ମକୁ ଅପଣାଇଥିବା ସଦ୍ଦାମ କହିଛନ୍ତି। ସେହିପରି ଅନୁ କହିଛନ୍ତି, ସଦ୍ଦାମଙ୍କ ସହ ବିବାହ ପାଇଁ ତାଙ୍କ ପରିବାର ଲୋକେ ରାଜି ଥିଲେ ହେଲେ ସଦ୍ଦାମଙ୍କ ପରିବାର ଏହି ସମ୍ପର୍କକୁ ଚାହୁଁ ନ ଥିଲେ। ତେଣୁ ସଦ୍ଦାମ ବାଧ୍ୟହୋଇ ନିଜ ପରିବାରକୁ ଛାଡ଼ି ତାଙ୍କୁ ବିବାହ କରିବାକୁ ନିଷ୍ପତ୍ତି ନେଇଥିଲେ।
