ପ୍ୟାରିସ, ୨୬ା୯ (ଏପି)- ପ୍ୟାରିସ୍ରେ କରୋନା ଭାଇରସ୍ ମହାମାରୀ ଅବସ୍ଥା ବିଗିଡ଼ିବାରେ ଲାଗିଛି। ଏଥିପାଇଁ ଫ୍ରେଞ୍ଚ ଓପନ ଗ୍ରାଣ୍ଡସ୍ଲାମ ଟେନିସ ପ୍ରତିଯୋଗିତାରେ ଦୈନିକ ଦର୍ଶକଙ୍କ ସଂଖ୍ୟା ବାରମ୍ବାର କାଟଛାଣ୍ଟ କରାଯାଇ ଶେଷରେ ୧,୦୦୦ରେ ସୀମିତ ରଖାଯାଇଛି। ଷ୍ଟାଡିୟମରେ ଦୈନିକ ଦର୍ଶକ ସଂଖ୍ୟା ୫,୦୦୦ରୁ ହ୍ରାସ କରାଯିବ ବୋଲି ପ୍ରଧାନମନ୍ତ୍ରୀ ଜିନ୍ କାଷ୍ଟେକ୍ସ ଗୁରୁବାର ଘୋଷଣା କରିଥିଲେ। ଶୁକ୍ରବାର ତାଙ୍କ କାର୍ଯ୍ୟାଳୟ ତରଫରୁ ସ୍ପଷ୍ଟ କରାଯାଇଛି ଯେ, କେବଳ ଦର୍ଶକଙ୍କ ସଂଖ୍ୟା କମାଇ ଦିଆଯାଇଛି। ଖେଳାଳି, କୋଚ୍, ଆୟୋଜକ ଏବଂ ରୋଲାଣ୍ଡ ଗ୍ୟାରୋସରେ କାର୍ଯ୍ୟରତ ଅନ୍ୟମାନଙ୍କ ସଂଖ୍ୟାରେ କୌଣସି ପରିବର୍ତ୍ତନ କରାଯାଇ ନାହିଁ। ଏହି ନିଷ୍ପତ୍ତି ନିଶ୍ଚିତରୂପେ ବଡ଼ ଧକ୍କା ବୋଲି ଟୁର୍ନାମେଣ୍ଟ ନିର୍ଦ୍ଦେଶକ ଗଏ ଫର୍ଗେଟ୍ ପ୍ରକାଶ କରିଛନ୍ତି। ୩ ସପ୍ତାହ ପୂର୍ବେ ଏଥର ଟୁର୍ନାମେଣ୍ଟରେ ଦୈନିକ ଦର୍ଶକଙ୍କ ସଂଖ୍ୟା ୧୧,୫୦୦ ଭିତରେ ସୀମିତ ରଖାଯିବ ବୋଲି ସ୍ଥିର କରାଯାଇଥିଲା। ଦର୍ଶକଙ୍କୁ ତିନୋଟି କୋର୍ଟରେ ବାଣ୍ଟି ଦିଆଯିବା ଲାଗି ସ୍ଥିର ହୋଇଥିଲା।
