ଭୁବନେଶ୍ୱର,୨୦।୧୧(ବ୍ୟୁରୋ): ଗରିବ ହୃଦ୍ରୋଗୀ ଶିଶୁଙ୍କୁ ରାଜ୍ୟ ସରକାର ମାଗଣା ଚିକିତ୍ସା ଯୋଗାଇ ଦେଉଛନ୍ତି। ଏହି ସୁବିଧା ଜାରି ରଖିବା ପାଇଁ ଗୁରୁବାର ଓଡ଼ିଶା ସରକାର ପ୍ରଶାନ୍ତି ମେଡିକାଲ ସର୍ଭିସେସ୍ ଆଣ୍ଡ୍ ରିସର୍ଚ୍ଚ ସେଣ୍ଟର(ପିଏମ୍ଏସ୍ଆର୍ଏଫ୍) ସହ ଏମ୍ଓୟୁ ସ୍ବାକ୍ଷର କରିଛନ୍ତି। ଏହି ଏମ୍ଓୟୁ ଅନୁଯାୟୀ ଆସନ୍ତା ୨ବର୍ଷ ପର୍ଯ୍ୟନ୍ତ ଅହମ୍ମଦାବାଦସ୍ଥିତ ସତ୍ୟ ସାଇ ହାର୍ଟ ହସ୍ପିଟାଲରେ ରାଜ୍ୟର ଗରିବ ଶିଶୁମାନଙ୍କର ମାଗଣାରେ ହୃଦ୍ରୋଗ ଚିକିତ୍ସା କରାଯିବ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ସୁପ୍ରିମକୋର୍ଟ ବିଚାରପତି ଜଷ୍ଟିସ୍ ବିନିତ ସରନ୍, ଓଡ଼ିଶା ହାଇକୋର୍ଟ ମୁଖ୍ୟ ବିଚାରପତି ଜଷ୍ଟିସ୍ ମହମ୍ମଦ ରଫିକ୍ ଏବଂ ପୂର୍ବତନ ମୁଖ୍ୟ ବିଚାରପତି ଜଷ୍ଟିସ୍ କଳ୍ପେଶ ଜାଭେରି, ସ୍ବାସ୍ଥ୍ୟମନ୍ତ୍ରୀ ନବକିଶୋର ଦାସଙ୍କ ଉପସ୍ଥିତିରେ ଏହି ଏମ୍ଓୟୁ ସ୍ବାକ୍ଷର କରାଯାଇଛି।
୨୦୧୮ ନଭେମ୍ବରରେ ଏହି ହସ୍ପିଟାଲ ହୃଦ୍ରୋଗ ସମସ୍ୟା ଥିବା ଓଡ଼ିଶାର ଶିଶୁଙ୍କୁ ମାଗଣାରେ ଚିକିତ୍ସା ସୁବିଧା ଯୋଗାଇଦେବା ନେଇ ଘୋଷଣା କରିଥିଲା। ସେତେବେଳର ଚୁକ୍ତି ମୁତାବକ ଶିଶୁଙ୍କୁ ଚିହ୍ନଟ କରିବା ସହ ସେମାନଙ୍କ ପରିବହନ ଖର୍ଚ୍ଚ ସରକାର ବହନ କରୁଛନ୍ତି। ହସ୍ପିଟାଲରେ ସମସ୍ତ ସେବା ମାଗଣାରେ ପ୍ରଦାନ କରାଯାଉଛି। ଏବେସୁଦ୍ଧା ୧୦୧୯ ଶିଶୁ ଚିକିତ୍ସିତ ହୋଇ ସୁସ୍ଥ ଅବସ୍ଥାରେ ଘରକୁ ଫେରିଛନ୍ତି। ବର୍ତ୍ତମାନ ରାଜ୍ୟ ସରକାର ଦ୍ୱିତୀୟଥର ପାଇଁ ଏମ୍ଓୟୁ ସ୍ବାକ୍ଷର କରିଛନ୍ତି। କୋଭିଡ୍ ପରିସ୍ଥିତି ପାଇଁ କିଛିଦିନ ଲାଗି ଏହି ଚିକିତ୍ସା ସୁବିଧା ବନ୍ଦ ଥିବାବେଳେ ଏବେ ପୁଣିଥରେ ପିଲାମାନଙ୍କୁ ପଠାଯିବ।
ଏନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି, ରାଜ୍ୟବାସୀଙ୍କୁ ସ୍ବାସ୍ଥ୍ୟ ସମ୍ବନ୍ଧିତ ସମସ୍ତ ପ୍ରକାର ଚିକିତ୍ସା ସୁବିଧା ଯୋଗାଇ ଦେବାକୁ ରାଜ୍ୟ ସରକାର ପ୍ରତିଶ୍ରୁତିବଦ୍ଧ। ବିଶେଷକରି ଗରିବ ଓ ଅସହାୟ ଲୋକଙ୍କ ସ୍ବାସ୍ଥ୍ୟକଥା ବୁଝିବାକୁ ସରକାର ସବୁବେଳେ ପ୍ରଚେଷ୍ଟାରତ। ସେମାନଙ୍କୁ ମାଗଣାରେ କାର୍ଡିଆକ୍ ଚିକିତ୍ସା ଯୋଗାଇଦେଇ ଏକ ନୂତନ ଜୀବନ ପ୍ରଦାନ କରିବା ଖୁସିର ବିଷୟ। ଏଥିପାଇଁ ସେ ପିଏମ୍ଏସ୍ଆର୍ଏଫ୍କୁ କୃତଜ୍ଞତା ଜଣାଇବା ସହ ଏହି ଚିକିତ୍ସା ସେବାର ଆବଶ୍ୟକତାକୁ ଉପଲବ୍ଧି କରି ରାଜ୍ୟ ସରକାର ପୁଣିଥରେ ଏମ୍ଓୟୁର ନବୀକରଣ କରିଥିବା ମୁଖ୍ୟମନ୍ତ୍ରୀ କହିଥିଲେ। ଏହି ଅବସରରେ ମୁଖ୍ୟ ଶାସନ ସଚିବ ଅସିତ ତ୍ରିପାଠୀ, ଉନ୍ନୟନ କମିଶନର ସୁରେଶ ମହାପାତ୍ର, ମୁଖ୍ୟମନ୍ତ୍ରୀଙ୍କ ୫ଟି ସଚିବ ଭି.କେ. ପାଣ୍ଡିଆନ୍, ସତ୍ୟ ସାଇ ହାର୍ଟ ହସ୍ପିଟାଲର ପରିଚାଳନା ଟ୍ରଷ୍ଟି ମନୋଜ ଭିମାନୀ, ସ୍ବାସ୍ଥ୍ୟ ବିଭାଗ ଅତିରିକ୍ତ ମୁଖ୍ୟ ସଚିବ ପ୍ରଦୀପ୍ତ କୁମାର ମହାପାତ୍ର, ଏନ୍ଏଚ୍ଏମ୍ ଏମ୍ଡି ଶାଳିନୀ ପଣ୍ଡିତ ପ୍ରମୁଖ ଯୋଗଦେଇଥିଲେ।
