ପଟ୍ଟାମୁଣ୍ଡାଇ ୧।୩(ସ୍ବ.ପ୍ର.): ଆଗକୁ ଖରାଦିନ ଆସୁଛି। ଯେଉଁଭଳି ଭାବେ ପାଣିପାଗରେ ଅସ୍ବାଭାବିକ ପରିବତ୍ତର୍ର୍ନ ଦେଖାଦେଉଛି, ଚଳିତବର୍ଷ ଗ୍ରୀଷ୍ମ ପ୍ରବାହ ଅସହ୍ୟ ହେବ ବୋଲି ପୂର୍ବାନୁମାନ କରାଯାଉଛି। ଫେବୃୟାରୀରୁ ଅସହ୍ୟ ଗରମ ଯୋଗୁ ଲୋକେ ଯେତେ କାମ ଥିଲେ ବି ମଧ୍ୟାହ୍ନରୁ ବାହାରକୁ ବାହାରିବାକୁ ପସନ୍ଦ କରୁନାହାନ୍ତି। ଏପରିସ୍ଥଳେ ଯେଉଁମାନେ ବିଭିନ୍ନ କାର୍ଯ୍ୟରେ ବାହାରକୁ ଯାଉଛନ୍ତି, ସେମାନଙ୍କୁ ଶୋଷ ହେଲେ ପ୍ରାୟତଃ ଥଣ୍ଡା ପାଉଚ ପାଣି ଓ ବୋତଲ ଉପରେ ନିର୍ଭର କରୁଛନ୍ତି। ଯେଉଁ ପାଣିକୁ ଲୋକେ କିଣି ପିଉଛନ୍ତି, ତାହା ପାନୀୟଜଳ ଉପଯୋଗୀ କି ନାହିଁ ତାହା ସେମାନେ ଜାଣି ପାରୁନାହାନ୍ତି। କାରଣ ସହର କି ଗ୍ରାମାଞ୍ଚଳରେ ଆବଶ୍ୟକ ସଂଖ୍ୟକ ନଳକୂପ ନାହିଁ। ଯେଉଁଠି ଅଛି ସେସବୁ ଅଚଳ ହୋଇ ପଡିଛି। ସ୍ବଚ୍ଛ ପାନୀୟଜଳର ବ୍ୟବସ୍ଥା ନାହିଁ। ଏଣୁ ପାଉଚ ପାଣିକୁ ସ୍ବଚ୍ଛ ଭାବି ୨ଟଙ୍କା ଦେଇ ଲୋକେ ପିଉଛନ୍ତି। ହାଟ, ବଜାର, ପାନ ଦୋକାନ ସବୁଠି ଏହା ମିଳୁଛି। ବାହାଘର, ବିଭିନ୍ନ ସଭାସମିତିରେ ମଧ୍ୟ ପାଉଚ ପାଣି ପ୍ୟାକେଟ୍ର ବ୍ୟବହାର ବଢ଼ିଛି। ପାଣି ପାଉଚର ବିକ୍ରି ନିଷିଦ୍ଧ ସତ୍ତ୍ୱେ ଏହାର ବହୁଳ ବ୍ୟବହାର ହେଉଛି। ଆମେ ଯେଉଁ ପାଉଚ ପାଣି ପିଉଛୁ, ତାହାର ଶୁଦ୍ଧତା ଓ ଗୁଣବତା ଜାଣିବା ପାଇଁ ଲୋକଙ୍କ ପକ୍ଷେ କିମ୍ବା ପ୍ରଶାସନର ସମୟ ନାହିଁ। କେବେ ମଧ୍ୟ ପ୍ରଶାସନ କିମ୍ବା ସ୍ବାସ୍ଥ୍ୟ ବିଭାଗ ପକ୍ଷରୁ ଏହାର ଯାଞ୍ଚ କରାଯାଉନାହିଁ। ଏହାର ଫାଇଦା ନେଇ ବେପାରୀମାନେ ଖୋଲାଖୋଲି ବେଆଇନ ଭାବେ ପିଇବା ପାଣି ବିକ୍ରି କରୁଛନ୍ତି।
କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ସହରରେ ପିଇବା ପାଣି କାରବାରର ଏବେ ଗୁମର ଖୋଲିବାରେ ଲାଗିଛି। ଲାଇସେନ୍ସ ନ ନେଇ ଲକ୍ଷାଧିକ ଟଙ୍କାର ପିଇବା ପାଣିର କାରବାର ଚାଲିଛି। ବିଲ୍ ଭାଉଚର ମାଗିଲେ ବି ଲୋକଙ୍କୁ ଦିଆଯାଉନି। ପିଇବା ପାଣି ନଁାରେ ଲୋକଙ୍କୁ ଏଠି ଖୋଲାଖୋଲି ଠକେଇ ଚାଲିଛି। ନାମୀଦାମୀ କମ୍ପାନୀ ନଁାରେ ନକଲି ପାଣି ବୋତଲ ବି ବଜାରରେ ଯାହାକୁ ଯେତେ ମିଳୁଛି। କେବେ ଓ କେଉଁ କମ୍ପାନୀର ପାଣି ବୋତଲ ବଜାରକୁ ଆସୁଛି, ତାହାର କିଛି ସୂଚନା ଲେଖା ଯାଉ ନଥିବା ଦେଖିବାକୁ ମିଳୁଛି। ଏକ୍ସପାଏରୀ ପାଣି ପାଉଚ ଓ ବୋତଲକୁ ବିକ୍ରି କରାଯାଉଛି। ପାଣି ପାଉଚ୍ ବିକ୍ରିକୁ ସରକାରୀ ସ୍ତରରେ ରୋକ ଲାଗିଥିଲେ ବି ଏଠି କୌଣସି ନିୟମକାନୁନ କେହି ମାନୁନାହାନ୍ତି। ପାଣି ଖାଦ୍ୟ ସାମଗ୍ରୀ ତାଲିକାରେ ଯାଉଥିଲେ ବି ଫୁଡ୍ ଲାଇସେନ୍ସ ଅନେକଙ୍କ ପାଖରେ ନ ଥିବା ଅଭିଯୋଗ ହୋଇଛି। ପ୍ରସ୍ତୁତକାରୀ ସଂସ୍ଥା ମଧ୍ୟ ପାଣି ପରୀକ୍ଷଣ ରିପୋର୍ଟ କରାଉନାହାନ୍ତି। ପ୍ରତ୍ୟେକ ୭ ଦିନରେ ଥରେ ପାଣିର ନମୁନା ଲାବୋରାଟୋରିରେ ଟେଷ୍ଟ କରାଯିବା କଥା। କିନ୍ତୁ ଏଠି ମାସମାସ ଧରି ନମୁନା ପରୀକ୍ଷଣ କରାଯାଉ ନାହିଁ। ପଟ୍ଟାମୁଣ୍ଡାଇ ଅଞ୍ଚଳରେ ହାତଗଣତି କେତେ ଜଣ ଅନୁମତି ପାଇଥିବା ବେଳେ ସେମାନଙ୍କ କାରବାର ଉପରେ ବି ପ୍ରଶାସନିକ କୌଣସି ତଦାରଖ ନାହିଁ। ଏସବୁ ଭିତରେ ପାଉଚ୍ ପାଣି କେଉଁଠୁ ଆସୁଛି, କେଉଁମାନେ ପାଣି ପାଉଚ୍ କାରବାରରେ ଜଡ଼ିତ ଏହାର କୌଣସି ଖୋଜଖବର କାହା ପାଖରେ ନାହିଁ। ଏ ନେଇ ଖାଦ୍ୟ ନିରୀକ୍ଷକଙ୍କ ପକ୍ଷରୁ ମଧ୍ୟ ଯାଞ୍ଚ କରାଯାଉ ନାହିଁ। ତହସିଲଦାର ଦିଲୀପ କୁମାର ସେଠୀଙ୍କୁ ପଚାରିବାରେ ବେଆଇନ ପାଣି କାରବାର ଉପରେ ପ୍ରଶାସନିକ ଯାଞ୍ଚ ହେବ ବୋଲି କହିଛନ୍ତି। ପୌର ନିର୍ବାହୀ ଅଧିକାରୀ ସମ୍ପଦ କୁମାର ସ୍ବାଇଁଙ୍କୁ ପଚାରିବାରେ ପାଣି ପାଉଚ୍ ବିକ୍ରି ସମ୍ପୂର୍ଣ୍ଣ ବନ୍ଦ ପାଇଁ ନିର୍ଦ୍ଦେଶ ରହିଛି। ପୂର୍ବରୁ ପୌରପାଳିକା ସ୍କ୍ବାଡ୍ ଗଠନ କରି ପାଣି ପାଉଚ୍ ବିକ୍ରି ଉପରେ ରୋକ ଲଗାଇଥିଲା। ଏହାରି ଭିତରେ ଯଦି ପୁଣି ପାଣି ପାଉଚ୍ ବିକ୍ରି ଚାଲିଛି, ତେବେ ଏକ ସ୍ବତନ୍ତ୍ର ଅଭିଯାନ କରି ବେଆଇନ ପାଣି ପାଉଚ୍ ବିକ୍ରିକୁ ବନ୍ଦ କରାଯିବ ବୋଲି ସେ କହିଛନ୍ତି।
