ପ୍ୟାରିସ୍/କୋପେନହାଗେନ୍, ୫ା୫: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଡେନ୍ମାର୍କରୁ ବୁଧବାର ପ୍ୟାରିସ୍ ଗସ୍ତ କରି ପୁନଃ ନିର୍ବାଚିତ ରାଷ୍ଟ୍ରପତି ଇମାନୁଏଲ୍ ମାକ୍ରଁଙ୍କୁ ଭେଟିଛନ୍ତି। ଫ୍ରାନ୍ସ ଭାରତର ସବୁଠୁ ବଡ଼ ସହଯୋଗୀ ବୋଲି ମୋଦି ଟୁଇଟ୍ କରିଛନ୍ତି। ରୁଷିଆ-ୟୁକ୍ରେନ୍ ଯୁଦ୍ଧ ସମୟରେ ଫ୍ରାନ୍ସ ମଧ୍ୟସ୍ଥ ଭୂମିକା ନେଉଥିବାବେଳେ ନୂଆଦିଲ୍ଲୀର ନିରପେକ୍ଷ କୂଟନୀତି ଉପରେ ରାଷ୍ଟ୍ରଗୁଡ଼ିକର ନଜର ରହିଛି। ତେଣୁ ଦୁଇନେତାଙ୍କ ଏହି ସାକ୍ଷାତକୁ ଗୁରୁତ୍ୱ ଦିଆଯାଉଛି।
ୟୁରୋପ ଗସ୍ତର ଶେଷ ଦିନରେ ମୋଦି ଡେନ୍ମାର୍କରେ ଦ୍ୱିତୀୟ ଇଣ୍ଡିଆ-ନର୍ଡିକ ସମ୍ମିଳନୀରେ ଯୋଗ ଦେଇଥିଲେ। ଏଥିରେ ଡେନ୍ମାର୍କ, ଫିନ୍ଲାଣ୍ଡ, ଆଇସ୍ଲାଣ୍ଡ, ନରଓ୍ବେ ଏବଂ ସୁଇଡେନ୍ ପ୍ରଧାନମନ୍ତ୍ରୀ ସାମିଲ ହୋଇଥିଲେ। ସମ୍ମିଳନୀରେ ମହାମାରୀ ଯୋଗୁ ପ୍ରଭାବିତ ଅର୍ଥନୀତିରେ ସୁଧାର, ଜଳବାୟୁ ପରିବର୍ତ୍ତନ, ପୁନଃ ବ୍ୟବହାରଯୋଗ୍ୟ ଶକ୍ତି ଏବଂ ବିକାଶଶୀଳ ବୈଶ୍ୱିକ ସୁରକ୍ଷା ସ୍ଥିତି ଉପରେ ଆଲୋଚନା ହୋଇଥିଲା। ଇଣ୍ଡିଆ-ନର୍ଡିକ ସମ୍ମିଳନୀ ପ୍ରଯୁକ୍ତିବିଦ୍ୟା, ପୁଞ୍ଜି ବିନିଯୋଗ, ସ୍ବଚ୍ଛ ଶକ୍ତି, ଆର୍କଟିକ୍ ଗବେଷଣା ଏବଂ ଅନ୍ୟାନ୍ୟ କ୍ଷେତ୍ରରେ ନର୍ଡିକ୍ ଦେଶଗୁଡ଼ିକ ସହିତ ବହୁମୁଖୀ ସହଯୋଗ ବୃଦ୍ଧି କରିବ ବୋଲି ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଅରିନ୍ଦମ ବାଗ୍ଚୀ ଟୁଇଟ୍ କରିଛନ୍ତି।
ଏହା ପୂର୍ବରୁ ମୋଦି ଡେନ୍ମାର୍କ ପ୍ରତିପକ୍ଷ ମେଟେ ଫ୍ରେଡେରିକ୍ସେନ୍, ନରଓ୍ବେ ପ୍ରଧାନମନ୍ତ୍ରୀ ଜୋନାସ୍ ଗହର୍ ଷ୍ଟୋର, ଆଇସଲାଣ୍ଡର କ୍ୟାଟ୍ରିନ୍ ଜାକୋବ୍ସଡୋଟିର୍, ସୁଇଡେନ୍ର ମାଗ୍ଡାଲେନା ଆଣ୍ଡରସନ୍ ଏବଂ ଫିନ୍ଲାଣ୍ଡ ପ୍ରଧାନମନ୍ତ୍ରୀ ସନା ମାରିନ୍ଙ୍କୁ ଭେଟିଥିଲେ। ଉଲ୍ଲେଖଯୋଗ୍ୟ, ଉତ୍ତର ୟୁରୋପ ଏବଂ ନର୍ଥ ଆଟ୍ଲାଣ୍ଟିକ୍ର ଭୌଗଳିକ ତଥା ସାଂସ୍କୃତିକ ଅଞ୍ଚଳକୁ ନର୍ଡିକ ରାଷ୍ଟ୍ରସମୂହ କୁହାଯାଏ। ଏଥିରେ ଡେନମାର୍କ, ଫିନଲାଣ୍ଡ, ଆଇସଲାଣ୍ଡ, ନରୱେ ଏବଂ ସୁଇଡେନ୍ ସମେତ ଫାରୋ ଦ୍ୱୀପପୁଞ୍ଜ, ଗ୍ରୀନଲାଣ୍ଡ ଓ ଆଲାଣ୍ଡ ସ୍ବଂୟଶାସିତ ଅଞ୍ଚଳ ଅନ୍ତର୍ଭୂକ୍ତ।
