ବୈଶିଙ୍ଗା,୧।୧୧(ରତନ ଦାଶ): ମୟୂରଭଞ୍ଜ ଜିଲାର ବୈଶିଙ୍ଗା ଥାନା ଅଞ୍ଚଳରେ ଜନୈକ ରାଇସ ମିଲ ମାଲିକଙ୍କୁ ଦିନ ଦ୍ବିପହରରେ ମାରଣାସ୍ତ୍ର ଦେଖାଇ ୧୮ ନଂ ଜାତୀୟ ରାଜପଥ ଉପରୁ ଅପହରଣ କରି ନେଇଥିଲେ। ପରେ ତାଙ୍କ ଠାରୁ ୪୦ ଲକ୍ଷ ଟଙ୍କା ଅସୁଲିଥିବା ୪ ଦୁର୍ଦ୍ଦାନ୍ତ ଅପରାଧୀଙ୍କୁ ଗିରଫ କରିବାକୁ ସକ୍ଷମ ହୋଇଛି ପୋଲିସ ପ୍ରଶାସନ।
ମିଳିଥିବା ସୂଚନା ମୁତାବକ ଗତ ୨୩ ତାରିଖ ଦିନ ୪.୩୦ ମିନିଟ ସମୟରେ ଏହି ଥାନା ଅର୍ନ୍ତଗତ ଯୁଗଳ ରେଳ ଷ୍ଟେସନ ନିକଟରେ ଥିବା କାମଧେନୁ ଏଗ୍ରୋ ଇଣ୍ଡଷ୍ଟ୍ରିଜ ନାମକ ରାଇସ ମିଲ ମାଲିକ ବାରିପଦା ଅଞ୍ଚଳର ସୁନିଲ କୁମାର ଅଗ୍ରୱାଲ ନିଜ କାରରେ ବାଲେଶ୍ୱର ଯାଉଥିଲେ। ସେହି ସମୟରେ ପଦ୍ମନାଭପୁର ଟୋଲ ପ୍ଲାଜାର ଅଳ୍ପ ଦୂରରେ ହଠାତ ଦୁଇଟି ବୁଲେଟ ଓ ଏକ କାରରେ ଆଠ ନଅ ଜଣ ଦୁର୍ବୃତ୍ତ ତାଙ୍କୁ ଅଟକାଇ କଟୁରୀ ଓ ବନ୍ଧୁକ ଦେଖାଇ ଭୟଭୀତ କରି ଅପହରଣ କରି ବାଲେଶ୍ୱର ଜିଲ୍ଲାର ରୁପ୍ସା ଅଞ୍ଚଳକୁ ଆଖିରେ କଳାପଟି ବାନ୍ଧି ନେଇଯାଇଥିଲେ।
ସେମାନେ ତାଙ୍କୁ ୮୦ ଲକ୍ଷ ଟଙ୍କା ତୁରନ୍ତ ଦେବାକୁ କହିଥିଲେ ଅନ୍ୟଥା ଜୀବନରୁ ମାରିଦେବାକୁ ଧମକ ଦେଇଥିଲେ। ବାଧ୍ୟହୋଇ ସୁନୀଲ ତାଙ୍କ ମ୍ୟାନେଜରଙ୍କୁ ଫୋନ କରି ଟଙ୍କା ଯୋଗାଡ କରିବାକୁ କହିବାରୁ ୪୦ ଲକ୍ଷ ଟଙ୍କା ଯୋଗାଡ ହୋଇଥିଲା। ସେତିକି ଟଙ୍କା ନେଇ ଅପହର୍ତ୍ତା ମାନେ ତାଙ୍କୁ ଛାଡିଥିଲେ ଏବଂ ଅବଶିଷ୍ଟ ଟଙ୍କା ଅତିଶିଘ୍ର ନଦେଲେ ଭୟଙ୍କର ପରିସ୍ଥିତିର ସାମ୍ନା କରିବାକୁ ପଡିବ ବୋଲି ଚେତାଇ ଦେଇଥିଲେ। ତେବେ ଏହାକୁ ନେଇ ପୋଲିସ ନିକଟରେ ଅଭିଯୋଗ କରିଥିଲେ ବ୍ୟବସାୟୀ।
ଏଭଳି ଅଭିଯୋଗ ପାଇବା ପରେ ତଦନ୍ତ ଆରମ୍ଭ କରିିଥିଲା ସମଗ୍ର ପୋଲିସ ପ୍ରଶାସନ। ଏସ୍ପି ବରୁଣ ଗୁଣ୍ଟୁପାଲିଙ୍କ ନେତୃତ୍ୱରେ ବେତନଟୀ ପୋଲିସ ଉପଖଣ୍ଡ ଅଧିକାରୀ ସୁଶ୍ରୀ ମିନତୀ ବିଶ୍ବାଳ ଓ ବୈଶିଙ୍ଗା ଥାନାଧିକାରୀ ବାରିଣୀ ଦାସଙ୍କୁ ନେଇ ଗଠିତ ପୋଲିସ ଟିମ ବିଭିନ୍ନ ସ୍ଥାନରେ ଚଢ଼ାଉ କରି ରୁପ୍ସା ଅଞ୍ଚଳରୁ ଅରମାନ ଖାଁ ଓରଫ ଜାଫର ଅହମ୍ମଦ ଖାଁ(୩୪), ରାଜେଶ ବାରିକ(୩୦), ଭବେଶ ବେହେରା(୧୯) ଓ ବଳରାମ ରାଉତ(୨୦)ଙ୍କୁ ଗିରଫ କରି ଶନିବାର ସାରେ କୋର୍ଟ ଚାଲାଣ କରିଛି। ସେମାନଙ୍କ ନିକଟରୁ ନଗଦ ୮ ଲକ୍ଷ ୬୪ ହଜାର ୭୦୦ ଟଙ୍କା ସହିତ ଚାରୋଟି ତେଲେଙ୍ଗା କଟୁରୀ , ସାତଟି ମୋବାଇଲ , ଏକ କିଆ ସେଲ୍ଟର କାର୍ ଓ ଏକ ହୁଣ୍ଡାଇ କ୍ରେଟା କାର୍ ଜବତ କରାଯାଇଛି।
ଏହାକୁ ନେଇ ପୋଲିସ ଏସପି ବରୁଣ ଗୁଣ୍ଟୁପାଲି , ଏଏସ୍ପି ଦୀପକ କୁମାର ଗୋଚ୍ଛାୟତ, ବେତନଟୀ ପୋଲିସ ଉପଖଣ୍ଡ ଅଧିକାରୀ ସୁଶ୍ରୀ ମିନତୀ ବିଶ୍ବାଳ ଓ ବୈଶିଙ୍ଗା ଥାନାଧିକାରୀ ବାରିଣୀ ଦାସଙ୍କ ଉପସ୍ଥିତିରେ ଶନିବାର ସା ସମୟରେ ଏକ ଖବରଦାତା ସମ୍ମିଳନୀ କରାଯାଇଛି। ଖୁବଶୀଘ୍ର ଫେରାର ଥିବା ଅନ୍ୟ ଅଭିଯୁକ୍ତଙ୍କୁ ଗିରଫ କରାଯିବାକୁ ସମସ୍ତ ପ୍ରୟାସ ଚାଲିଛି ବୋଲି ସୂଚନା ଦିଆଯାଇଛି।
