ପାରାଦୀପ, ୯।୧(ସ୍ବ.ପ୍ର.): ବନ୍ୟପ୍ରାଣୀ ଓ ପକ୍ଷୀ ବହୁ ସମୟରେ ଶିକାରୀମାନଙ୍କ ଶିକାର ହେଉଥିବା ବେଳେ ସେମାନଙ୍କ ସୁରକ୍ଷା ପ୍ରତି ଲୋକେ ଯତ୍ନବାନ ହେଉନାହାନ୍ତି। ଏପରିସ୍ଥଳେ ଜଗତ୍ସିଂହପୁର ଜିଲାର ପାରାଦୀପର ଗୋଟିଏ ପରିବାରର ୪ ଜଣ ସଦସ୍ୟ ବନ୍ୟଜନ୍ତୁ ସଂରକ୍ଷଣ ଓ ପକ୍ଷୀଗଣନାରେ ସାମିଲ ହୋଇ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି। ପକ୍ଷୀଗଣନାରେ ଗୋଟିଏ ପରିବାରର ଏତେଜଣ ସଦସ୍ୟ ସାମିଲ ହେବା ରାଜ୍ୟରେ ପ୍ରଥମ ଘଟଣା ବୋଲି ରାଜନଗର ଡିଏଫ୍ଓ ବିକାଶ ରଞ୍ଜନ ଦାସ କହିଛନ୍ତି। କେନ୍ଦ୍ରାପଡା ଜିଲା ମହିପାଳ ଗ୍ରାମର ମଧୁସ୍ମିତ ପତି (୫୪), ସାନଭାଇ ବିରଜା ପ୍ରସାଦ ପତି(୫୦) ଏବଂ ମଧୁସ୍ମିତଙ୍କ ୨ ପୁଅ ଶାଶ୍ବତ(୨୩)ସୌରଭ (୧୮) ଦୀର୍ଘବର୍ଷ ହେବ ବନ୍ୟପ୍ରାଣୀଙ୍କ ସେବାରେ ନିୟୋଜିତ ହୋଇଛନ୍ତି।
ମଧୁସ୍ମିତ ପିପିଏଲ୍ କମ୍ପାନୀ ପାରାଦୀପରେ ଚାକିରି କରୁଥିବାବେଳେ ଏପରି ସେବାରେ ନିୟୋଜିତ ହୋଇଥିଲେ। ୧୯୯୬ରେ ଏକ ଏନ୍ଜିଓ ନେଚର କ୍ଲବ ଗଠନ କରି ଭିତରକନିକା ଅଭୟାରଣ୍ୟରେ ବନ୍ୟଜନ୍ତୁ ସଂରକ୍ଷଣ ଉପରେ କାମ ଆରମ୍ଭ କରିଥିଲେ। ତାଙ୍କୁ ୨୦୧୧ରେ ପକ୍ଷୀ ଓ ଅଲିଭ ରିଡ୍ଲେ କଇଁଛ ଗଣନାରେ ସାମିଲ କରାଯାଇଥିଲା। ସେଦିନଠାରୁ ସେ ଏହି କାର୍ଯ୍ୟରେ ନିୟୋଜିତ ଅଛନ୍ତି। ବଡ଼ଭାଇଙ୍କ ଏପରି କାର୍ଯ୍ୟରେ ସାନଭାଇ ବିରଜା ଅନୁପ୍ରାଣିତ ହୋଇ ଉଚ୍ଚଶିକ୍ଷା (ବିଟେକ୍)ଛାଡି ଏଥିରେ ସାମିଲ ହୋଇଥିଲେ। ସେ ଏହି କାମରେ ଏତେ ମଜ୍ଜିଗଲେ ଯେ ଆଉ ସାଂସାରିକ ଜୀବନକୁ ଫେରିନାହାନ୍ତି। ଅବିବାହିତ ରହି ଘଞ୍ଚ ଜଙ୍ଗଲରେ ବନ୍ୟସଂରକ୍ଷଣ ଉପରେ କାମ କରୁଛନ୍ତି। ଏପରିକି ଜଙ୍ଗଲରେ ବିପଦରେ ପଡ଼ିଥିବା ଅନେକ ଜନ୍ତୁଙ୍କୁ ଉଦ୍ଧାର କରିଛନ୍ତି। ଅନେକ ସମୟରେ ବିଷଧର ସାପକୁ ଖାଲି ହାତରେ ଉଦ୍ଧାର କରି ଜଙ୍ଗଲରେ ଛାଡ଼ିଛନ୍ତି। ବାପା ଓ ଦାଦାଙ୍କ ଏଭଳି କାମ ଦେଖି ଶାଶ୍ବତଙ୍କ ମଧ୍ୟ ଜଙ୍ଗଲ ନିଶା ଘାରିଥିଲା। ସେ ୧୩ ବର୍ଷରୁ ଜଙ୍ଗଲ ପ୍ରତି ଆକର୍ଷତ ହୋଇଥିଲେ। ସ୍କୁଲ ଛୁଟି ସମୟରେ ଅଧକାଂଶ ସମୟ ଜଙ୍ଗଲ କାଟି ଫଟୋ ଉଠାଉଥିଲେ। ବିଶେଷ କରି ପକ୍ଷୀଙ୍କ ସମ୍ପର୍କରେ ତାଙ୍କର ଅଧିକ ରୁଚି ଥିଲା।
ସୁନ୍ଦରବନରେ ସେ ପକ୍ଷୀ ଓ ବାଘ ଫଟୋ ଉଠାଇ ବନ ବିଭାଗର ଦୃଷ୍ଟିଆକର୍ଷଣ କରିଥିଲେ। ୨୦୧୩ରୁ ତାଙ୍କୁ ପକ୍ଷୀ ଗଣନାରେ ସାମିଲ କରାଯାଇଛି। ତାଙ୍କର ଏହି କୃତିତ୍ୱ ଉଚ୍ଚଶିକ୍ଷା କ୍ଷେତ୍ରରେ ପାରଦର୍ଶିତା ଦେଇଛି। ବନ୍ୟଜନ୍ତୁ ସଂରକ୍ଷଣ ଉପରେ ସେ ଆମେରିକାର ଏ.ଆର୍. ୟୁନିଭରସିଟି କେମ୍ବ୍ରିଜ୍ରେ ଅଧ୍ୟୟନ କରୁଛନ୍ତି। ସେ ପକ୍ଷୀ ଓ ବାଘ ଉପରେ ବହୁ କ୍ଷୁଦ୍ର ଫିଲ୍ମ ନିର୍ମାଣ କରିଛନ୍ତି। ତାଙ୍କ ସାନଭାଇ ସୌରଭଙ୍କୁ ମଧ୍ୟ ବନ୍ୟପ୍ରାଣୀଙ୍କ ଫଟୋ ଉଠାଇବା ନିଶା ଘାରିଛି। ଜଣେ ପୋଖତ ଫଟୋଗ୍ରାଫର ଭଳି ଜଙ୍ଗଲରେ ଭିନ୍ନ ଭିନ୍ନ ପୋଷାକ ପିନ୍ଧି ପାଣି କାଦୁଅରେ ପଶି ଫଟୋ ଉଠାଇ ବେଶ୍ ଚର୍ଚ୍ଚିତ ହୋଇଛନ୍ତି। ଧରିତ୍ରୀ ସମେତ ଅନେକ ଗଣମାଧ୍ୟମରେ ତାଙ୍କର ଫଟୋ ଓ ଖବର ପ୍ରକାଶ ପାଇଛି। ସବୁଠାରୁ ବଡ଼କଥା ହେଲା ସେ ଉଡ଼ନ୍ତା ଚଢ଼େଇକୁ ଦେଖି ତା’ର ନାମ କହି ଦେଇପାରନ୍ତି। ତାଙ୍କୁ ମଧ୍ୟ ୪ ବର୍ଷ ହେଲା ପକ୍ଷୀଗଣନାରେ ସାମିଲ କରାଯାଇଛି। ପରିବାରର ଏହି ସଦସ୍ୟମାନେ ବନବିଭାଗ ଦ୍ବାରା ଭିନ୍ନ ଭିନ୍ନ ସ୍ଥାନରେ ଗଣନା କରୁଛନ୍ତି।
ଏସମ୍ପର୍କରେ ମଧୁସ୍ମିତ ପତି କୁହନ୍ତି, ପୃଥିବୀର ସନ୍ତୁଳନ ରକ୍ଷା ପାଇଁ ସମସ୍ତ ଜୀବଜନ୍ତୁ ସହ ପ୍ରକୃତିର ସୁରକ୍ଷା ଅପରିହାର୍ଯ୍ୟ। ଏବେଠାରୁ ଆମେ ପ୍ରୟାସ ନ କଲେ ପୃଥିବୀ ଧ୍ବଂସ ହୋଇଯିବାର ଆଶଙ୍କା ରହିଛି । ଜଙ୍ଗଲ ଓ ପରିବେଶ ବିଭାଗର ଆଞ୍ଚଳିକ ମୁଖ୍ୟ ସଂରକ୍ଷକ ମନୋଜ କୁମାର ମହାପାତ୍ର କୁହନ୍ତି, ମଧୁସ୍ମିତ ପରିବାର ସଦସ୍ୟଙ୍କ ଏପରି ଉଦ୍ୟମ ଆଗାମୀ ଯୁବପିଢ଼ୀଙ୍କ ପାଇଁ ଆଦର୍ଶ। ଡାକ୍ତର, ଇଞ୍ଜିନିୟର ହେବା ଅପେକ୍ଷା ବନ ସୁରକ୍ଷା ପାଇଁ ମନୋନିବେଶ କଲେ ପ୍ରକୃତିର ସୁରକ୍ଷା ହେବା ସହ ନିଜର ମଧ୍ୟ କ୍ୟାରିୟର ଗଢ଼ିହେବ।
